თბილისის გარდა, ყველა დანარჩენ მუნიციპალიტეტში, სადაც არჩევნების მეორე ტური გაიმართა, ახლადარჩეული მერები უფლებამოსილების შესრულებას ხვალიდან, 21 ოქტომბრიდან შეუდგებიან.

სამეგრელოს მუნიციპალიტეტებში გამართული მეორე ტურის შედეგების მიხედვით, მუშაობას დაიწყებენ "ქართული ოცნების" წარმომადგნლები, წალენჯიხის გარდა. წალენჯიხა ქვეყნის მასშტაბით გამონაკლისი შემთხვევაა, სადაც ადგილობრივებს ოპოზიციონერი მერი, გიორგი ხარჩილავა ჰყავთ.

ზუგდიდის მერი მამუკა წოწერიაა, სენაკის ვახტანგ გადელია, მარტვილში თორნიკე ჯანასია, ჩხოროწყუში დათო გოგუა, ხობში დავით ბუკია, ფოთში კი ბექა ვაჭარაძე.

ცენტრალური საარჩევნო კომისიის განმარტებით, ახალარჩეული მერის უფლებამოსილება იწყება, ხოლო ძველი მერის უფლებამოსილება წყდება შესაბამისი საარჩევნო კომისიის მიერ არჩევნების შედეგების შემაჯამებელი ოქმის შედგენიდან, მერის არჩეულად გამოცხადებიდან მე-11 დღეს. შესაბამისად, თბილისის მერის უფლებამოსილება იწყება 24 ნოემბერს, ხოლო იმ მუნიციპალიტეტების მერების, სადაც არჩევნების მეორე ტური ჩატარდა - 21 ნოემბერს.

თბილისის მერი კახა კალაძე უფლებამოსილების შესრულებას 24 ნოემბერს შეუდგება.

რაც შეეხება საკრებულოებს, ახალი შემადგენლობის უფლებამოსილება იწყება, ძველის კი წყდება ახალარჩეული საკრებულოს პირველი შეკრებისთანავე.

"საქართველოს საარჩევნო კოდექსის თანახმად, საქართველოს მთელ ტერიტორიაზე მუნიციპალიტეტის წარმომადგენლობითი ორგანოს - საკრებულოს პირველ სხდომას იწვევს ცესკო არჩევნების საბოლოო შედეგების შეჯამებიდან 30 დღის ვადაში, არაუგვიანეს 13 დეკემბრისა. ცესკომ თბილისის მერის არჩევნების მეორე ტური და თბილისის საკრებულოს 2021 წლის 2 ოქტომბრის არჩევნების შედეგები 13 ნოემბერს შეაჯამა. შესაბამისად, ვადის ათვლაც საბოლოო შედეგების შეჯამებიდან დაიწყო. საკრებულოების პირველი სხდომის მოწვევის თარიღის შესახებ გადაწყვეტილებას ცენტრალური საარჩევნო კომისია უახლოეს სხდომაზე მიიღებს", - აცხადებს ცესკო.