გორის სამხედრო ჰოსპიტალში ყოფილი პრეზიდენტი მიხეილ სააკაშვილი კონსილიუმის წევრებმა მოინახულეს. მათი თქმით, პაციენტის მდგომარეობა გაუმჯობესდა. იღებს საკვებს და ფიზიკურადაც უფრო აქტიურია.

"ლაბორატორიული მონიტორინგის საფუძველზე რეგულარულად ხორციელდება მისაღები მედიკამენტების, პარალელურად კვების დოზირების კორექცია. ფიზიკურად დღეს უფრო აქტიურია. გადაადგილება აუცილებლად გაუჭირდებოდა ადამიანს, ვისაც ჰქონდა შიმშილობის ეს კონკრეტული ვადა. ბევრად უკეთესია მისი კლინიკური მდგომარეობა", - განაცხადა ექიმმა ნინო შარაშენიძემ.

კონსილიუმის კიდევ ერთი წევრი, სანდრო ცისკარიძე ამბობს, რომ ზოგადი ტენდენცია პოზიტიურია. რჩება გარკვეული ნევროლოგიური დარღვევები. ამ პროცესში, ექიმის განმარტებით, განსაკუთრებით მნიშვნელოვანია კვების აღდგენა, რაც საფუძველი უნდა გახდეს პაციენტის მდგომარეობის თანდათან გაუმჯობესების.

"აქ არ არის საუბარი რომელიმე ერთ ორგანოთა სისტემაზე. დამატებით მედიკამენტური მკურნალობა მიდის მიკროელემენტებით, ვიტამინებით შევსება, რომ თავიდან იყოს აცილებული ასეთი ხანგრძლივი, 50-დღიანი შიმშილობის შედეგები", - აღნიშნა მან.

მიხეილ სააკაშვილი, რომელიც უკრაინიდან საქართველოში ჩამოსვლისას, პირველ ოქტომბერს დააკავეს, 50-ე დღე შიმშილობდა, რის გამოც მისი ჯანმრთელობის მდგომარეობა დამძიმდა.

18 ნოემბრის საღამოს მან ადვოკატებთან შეხვედრისას გონება დაკარგა.19 ნოემბერს, იუსტიციის მინისტრმა რატი ბრეგაძემ ბრიფინგზე ისაუბრა, რომ ექსპრეზიდენტს სთავაზობენ გორის სამხედრო ჰოსპიტალში გადაყვანას, რასაც ყოფილი პრეზიდენტი დათანხმდა.