შინაგან საქმეთა სამინისტროს განცხადებით, საქართველოს სხვადასხვა ქალაქებში, საკრებულოს სხდომების პარალელურად მიმდინარე აქციებზე პოლიციამ რამდენიმე ადამიანი დააკავა.

კერძოდ, სამართალდამცველთა კანონიერი მოთხოვნისადმი დაუმორჩილებლობის, სამართალდარღვევის ფაქტზე, პოლიციამ ზუგდიდში 2 პირი, ხოლო აჭარაში 4 პირი ადმინისტრაციული წესით დააკავა.

"შინაგან საქმეთა სამინისტროს თანამშრომლები მიმდინარე აქციებთან დაკავშირებით მობილიზებული რჩებიან და დაიცავენ საზოგადოებრივ წესრიგს. მართლწესრიგის დასაცავად იმყოფებიან შინაგან საქმეთა სამინისტროს ყველა შესაბამისი დანაყოფი. შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს აქციის ორგანიზატორებს, პოლიტიკურ ლიდერებს და შეკრებილ მოქალაქეებს - შეკრებისა და გამოხატვის დროს დაიცვან კანონის მოთხოვნები და დაემორჩილონ პოლიციელთა კანონიერ მოთხოვნებს. წინააღმდეგ შემთხვევაში, პოლიცია იმოქმედებს საკუთარი მანდატის ფარგლებში და სამართალდარღვევის თითოეული ფაქტი დაუყოვნებლივ იქნება აღკვეთილი", - აცხადებს შსს.

ზუგდიდში აქციის მონაწილეები მაშინ დააკავეს, როცა ისინი საკრებულოს შენობის წინ, ტროტუარზე, საპროტესტო წარწერების დატოვებას ცდილობდნენ.

ენმ-ის წარმომადგენელ ანა წითლიძის ინფორმაციით, დაკავებულთაგან ერთი, ახლადარჩეული საკრებულოს წევრი დათო ფიფიაა.

ზუგდიდის საკრებულომ 2022 წლის ბიუჯეტი საპროტესტო ქციის ფონზე, ოპოზიციის გარეშე დაამტკიცა. სხდომიდან ოპოზიციის წარმომადგენლები პოლიციამ ძალის გამოყენებით გაიყვანა. მათი თქმით, "ვადაგასულმა" საკრებულომ უკანონოდ მიიღო მთავარი ფინანსური დოკუმენტი, რომელზეც პასუხისმგებლობა ახალ საკრებულოს უნდა აეღო.

თავის მხრივ, ადგილობრივ ხელისუფლებაში აღიარებენ, რომ ბიუჯეტის ნაჩქარევად დამტკიცება პოლიტიკური გადაწყვეტილება იყო, რათა პროექტი ახალ საკრებულოს არ ჩაეგდო და მუნიციპალიტეტი კრიზისში არ შეეყვანა.

ახალ საკრებულოში მმართველ პარტიას არ აქვს უმრავლესობა. მას 20 წევრი ჰყავს, ენმ-ს 22, "გახარია-საქართველოსთვის" კი სამი.