თბილისში მოშიმშილეებს, ზუგდიდიდან 10 პირი შეუერთდა. მათ შორის 6 საკრებულოს წევრია. ენმ-ის წარმომადგენელ ანა წითლიძის განცხადებით, მიხეილ სააკაშვილის გათავისუფლების მოთხოვნით იშიმშილებენ დეპუტატები - ირაკლი და გიორგი სორდიები, კახა ჩანგელია, ლაშა ბეჭვაია, მირანდა ესებუა და გია მამფორია.

მათთან ერთად საპროტესტო აქციას უერთდება - "ნაციონალური მოძრაობის" წევრი ელდარ კეზუა და საშკა ხოჭოლავა და ორი მოქალაქე, ვიკა ბაძაღუა და მერაბ ბოჭოია.

მანამდე შიმშილობა დაიწყო ექიმმა და მაჟორიტარი დეპუტატობის ყოფილმა კანდიდატმა ენმ-დან, მალხაზ ჯალაღონიამ.

"ნაციონალურმა მოძრაობამ" შიმშილობის "მასობრივი აქცია" 21 დეკემბრიდან დაიწყო. ამის შესახებ პარტიის ლიდერმა ნიკა მელიამ, პარლამენტთან მიმდინარე საპროტესტო აქციაზე განაცხადა. მიხეილ სააკაშვილის გათავისუფლების მოთხოვნით, პარტიის მხარდამჭერთა ნაწილი თბილისში, ენმ-ის ოფისის წინ მოწყობილ კარვებში შიმშილობს.

ენმ პარარელურად სხვა ტიპის საპროტესტო აქციებსაც აანონსებს.