მსოფლიო ჭიდაობის გაერთიანებამ 2022 წლის პირველი რეიტინგ-სია გამოაქვეყნა. ამ რეიტინგში, ხობელი ბერძნულ-რომაული სტილით მოჭიდავე ნუგზარ წურწუმია, რომელიც 55 კილოგრამ წონაში ასპარეზობს, მეოთხე პოზიციაზეა.

ინფორმაციას საქართველოს ჭიდაობის ეროვნული ფედერაცია აქვეყნებს.

ნუგზარ წურწუმია მსოფლიო და ევროპის ჩემპიონია.

ფედერაციისვე ცნობით, ქართველმა მძიმეწონოსანმა იაკობ ქაჯაიამ (130 კგ), მეორე პოზიციიდან პირველზე გადაინაცვლა.

განახლებულ რეიტინგში, პირველ ათეულში, ქაჯაიას და წურწუმიას გარდა კიდევ რამდენიმე ქართველია - ლერი აბულაძე 63 კილოგრამ წონით კატეგორიაში მეორე ადგილს იკავებს. რამაზ ზოიძე (67 კგ) მესამეა, ხოლო ლაშა გობაძე (87 კგ) და გიორგი მელია (97 კგ) - მეექვსე.

თავისუფალი სტილით მოჭიდავეთა ნაკრების წევრებს შორის, ყველაზე უკეთესი პირადი რეიტინგი კვლავ გენო პეტრიაშვილს აქვს. ის 125 კილოგრამ წონით კატეგორიაში მეორე პოზიციაზეა.

თავიანთ წონებში, მოწინავე ათეულში კიდევ ოთხი ქართველია: ზურაბ იაკობიშვილი (70 კგ) მესამე პოზიციას იკავებს, ნიკა კენჭაძე (79 კგ) - მეოთხეს, ირაკლი მწითური (79 კგ) - მეშვიდეს და ავთანდილ კენჭაძე (74 კგ) - მერვეს.