1 თებერვლიდან ზუგდიდის ბოტანიკურ ბაღში შესვლა ფასიანი გახდება. გამონაკლისია მხოლოდ მოქალაქეთა ნაწილი. ბაღის ადმინისტრაციის ინფორმაციით, "ბაღში ვიზიტი უფასო რჩება ომის მონაწილეებისთვის, პენსიონრებისთვის, საპატიო ზუგდიდელებისთვის, ობოლი, მშობელთა მზრუნველობას მოკლებული მოზარდებისთვის, საქართველოს შეიარაღებული ძალების ვეტერანებისა და მათთან გათანაბრებული პირებისთვის, ოჯახებისთვის, რომელთა სოციალური სარეიტინგო ქულა არ აღემატება 100-000-ს".

განსხვავებულია ტარიფები საქართველოს და უცხო ქვეყნის მოქალაქეებისთვის. როგორც ბოტანიკური ბაღის ადმინისტრაცია იუწყება, ერთჯერადი საშვი საქართველოს მოქალაქისთვის 2 ლარი, ხოლო უცხო ქვეყნის მოქალაქისთვის 5 ლარი ეღირება.

საქართველოს აკრედიტებული უმაღლესი სასწავლებლების სტუდენტებისთვის ერთჯერადი საშვის ღირებულება 1 ლარი იქნება. იგივე თანხას გადაიხდიან სკოლის მოსწავლეები 10 წელზე ზევით.

ერთთვიანი საშვი 1 ვიზიტორზე - 10 ლარი, სამთვიანი - 25 ლარი, ექვსთვიანი - 40 ლარი, ერთწლიანი -70 ლარი იქნება;

ერთთვიანი საოჯახო " მეგობარათი" (მოიცავს არაუმეტეს 5 ადამიანს) - 20 ლარი, სამთვიანი - 35ლარი ეღირება;

პიკნიკი 1 ვიზიტორზე ( საქართველოს მოქალაქე) - 10 ლარი, უცხო ქვეყნის მოქალაქისთვის - 15 ლარი იქნება;

ბაღში ფოტოსესიის მსურველებს 50 ლარის გადახდა მოუწევთ.

ცნობისთვის, ზუგდიდის ბოტანიკურ ბაღში, სადაც შესვლა ამდრომდე უფასოა, სახელმწიფო აუდიტის სამსახურის ინფორმაციით, 2020 წელს დასაქმებული იყო 6 მოლარე-კონსულტანტი, რომელთა ხელფასებზე დაიხარჯა 50.3 ათასი ლარი.

აუდიტის ჯგუფმა ბოტანიკური ბაღის დათვალიერებით გამოავლინა, რომ ბაღში სალაროები არ ფუნქციონირებს. შესაბამისად, ხელფასები გაიცემა პირებზე, რომელთა ფუნქცია-მოვალეობები არ არის შესრულებადი.

ბაღის დირექტორმა ზვიად ქარჩავამ "ლაივპრესს" უთხრა, რომ ბაღში ვიზიტი ფასიანი იყო, მისი გახსნიდან დაახლოებით სამი თვის განმავლობაში. პანდემიის პირობებში კი მიიღეს გადაწყვეტილება, რადგან რეკრეაციული სივრცე იყო, მოქალაქეებს თავისუფლად, თანხის გარეშე შეძლებოდათ შესვლა. ამიტომ, მათ ვიზიტორთათვის ტემპერატურის გაზომვა და ერთ ლოკაციაზე 5 ადამიანზე მეტის არშეკრების მონიტორინგი დაევალათ.