რუსეთის მიერ ოკუპირებულ აფხაზეთში 24 საათის განმავლობაში აღრიცხული კორონავირუსის რაოდენობის მაჩვენებელმა რეკორდულ ციფრს მიაღწია. დე ფაქტო რესპუბლიკის ოპერატიული შტაბის ინფორმაციით, ბოლო დღე-ღამეში ტესტირება ჩაუტარდა 1160 ადამიანს, საიდანაც ვირუსი დაუდასტურდა 607-ს, რაც პანდემიის განმავლობაში ყველაზე მაღალი მაჩვენებელია.

აფხაზეთში იანვრის შუა რიცხვებიდან ცირკულირებს კორონავირუსის სწრაფად გავრცელებადი ვარიანტი "ომიკრონი". მძიმე ეპიდვითარების გამო 27 იანვრიდან 4 თებერვლის ჩათვლით სოხუმში სკოლები დაიხურა.

ვირუსის გავრცელებიდან დღემდე დღეისთვის აფხაზეთში კორონავირუსის 42065 შემთხვევაა დადასტურებული. გარდაიცვალა 590 პაციენტი, 36063 კი გამოჯანმრთელდა.