1 თებერვლიდან ზუგდიდის ბოტანიკურ ბაღში შესვლაზე ერთჯერადი და სააბონენტო ტარიფების დაწესებასთან დაკავშირებით, მუნიციპალიტეტის მერია განცხადებას აქვეყნებს. სოციალურ ქსელში მოქალაქეების მიერ ამ თემაზე გამოთქმული უკმაყოფილებისა და დღეს დაგეგმილი საპროტესტო აქციის მიუხედავად, მერია გადაწყვეტილების შეცვლას არ გეგმავს. განცხადებაში ვკითხულობთ, რომ ბოტანიკური ბაღის ერთჯერადი და სააბონენტო ტარიფების შესახებ გადაწყვეტილება და შესაბამისი სატარიფო განაკვეთი 2020 წლის მარტში, ზუგდიდის მუნიციპალიტეტის საკრებულოს ეკონომიკის, ურბანული განვითარებისა და ქონების მართვის საკითხთა კომისიამ მიიღო.

"ფასიანი მომსახურებით ბოტანიკური ბაღის ადმინისტრაცია დამატებით შემოსავლის მობილიზებას გეგმავს, რათა ბოტანიკური ბაღის ინფრასტრუქტურა უფრო განვითარდეს, იყოს მოვლილი და დაცული", - აცხადებენ მერიაში.

მათივე განმარტებით, ზუგდიდის ბოტანიკური ბაღისთვის შერჩეული ტარიფები ქვეყნის სხვა ბაღებთან შედარებით ყველაზე იაფია.

განცხადებაში მერია მოქალაქეებს ახსენებს, რომ ზუგდიდის ბოტანიკური ბაღი 2019 წლის ბოლოს განახლდა, რომ სარესტავრაციო სამუშაოების შედეგად, ბაღის ტერიტორიაზე მოეწყო სასეირნო ბილიკები, ხელოვნური ტბა, დაემატა მცენარეთა ახალი ჯიშები და სხვა. პროექტის ღირებულებამ - 10 მლნ ლარზე მეტი შეადგინა.

შეგახსენებთ, რომ ზუგდიდის ბოტანიკურ ბაღში 1 თებერვლიდან შესვლა ფასიანი ხდება. გამონაკლისი მხოლოდ მოქალაქეთა ნაწილისთვის დაიშვება. ტერიტორიის უფასოდ დათვალიერების უფლებით ისარგებლებენ: პენსიონრები; საპატიო ზუგდიდელები; ობოლი, მშობელთა მზრუნველობას მოკლებული მოზარდები; ომის მონაწილეები, საქართველოს შეიარაღებული ძალების ვეტერანები და მათთან გათანაბრებული პირები; ოჯახები, რომელთა სოციალური სარეიტინგო ქულა არ აღემატება 100-000 ქულას.

პირველი თებერვილდან ბაღში შესვლისას იმოქმედებს შემდეგი ტარიფები:

• საქართველოს მოქალაქე - 2 ლარი;
• უცხო ქვეყნის მოქალაქე - 5 ლარი;
• საქართველოს აკრედიტებული უმაღლესი სასწავლებლების სტუდენტები -1 ლარი;
• სკოლის მოსწავლე 10 წელზე ზევით - 1 ლარი;
• ერთთვიანი აბონემენტი 1 ვიზიტორზე - 10 ლარი;
• სამთვიანი აბონემენტი 1 ვიზიტორზე - 25 ლარი;
• ექვსთვიანი აბონემენტი 1 ვიზიტორზე - 40 ლარი;
• ერთწლიანი აბონემენტი 1 ვიზიტორზე-70 ლარი;
• ერთთვიანი საოჯახო " მეგობარათი" აბონემენტი (არაუმეტეს 5 ადამიანი) - 20ლარი;
• სამთვიანი საოჯახო აბონემენტი "მეგობარათი" (არაუმეტეს 5 ადამიანი) - 35ლარი;
• პიკნიკი 1 ვიზიტორზე - 10 ლარი;
• კემპინგი 1 ვიზიტორზე - 15 ლარი;
• სადღესასწაულო, საქორწილო წინასწარ დაგეგმილი ფოტოსესია - 50 ლარი.