სახალხო დამცველმა 2021 წლის ადგილობრივი თვითმმართველობის არჩევნების წინა პერიოდში მომხდარ ორ ფაქტზე შრომით ურთიერთობებში პოლიტიკური ნიშნით დისკრიმინაცია დაადგინა. მათ შორის არის ზუგდიდის მერიის ააიპ მოსწავლე-ახალგაზრდობის სასახლის ადმინისტრატორ-კოორდინატორის თანამდებობიდან თანამშრომლის გათავისუფლების ფაქტი.

ანგარიშში მოყვანილი მეორე შემთხვევა ეხება გორის მუნიციპალიტეტის ტრანსპორტის სააგენტოს ფინანსური მენეჯერის პოზიციიდან ხელშეკრულების ვადის გასვლის გამო პირის გათავისუფლებას.

როგორც სახალხო დამცველის მიერ გამოქვეყნებულ ინფორმაციაში ვკითხულობთ, სახელმწიფო სამსახურებთან დაკავშირებული ორგანიზაციების თანამშრომლები, ერთ შემთხვევაში პოლიტიკურ პარტიაში - "საქართველოსთვის" აქტივობის, ხოლო მეორე შემთხვევაში - ამავე პარტიასთან ოჯახის წევრის ასოცირების გამო გაათავისუფლეს.

"განმცხადებელი გაათავისუფლეს ზუგდიდის მოსწავლე-ახალგაზრდობის სასახლის ადმინისტრატორ-კოორდინატორის თანამდებობიდან შექმნილი ეპიდემიოლოგიური ვითარების გამო. მოპასუხე მხარის განმარტებით, მუშაობის დისტანციურ რეჟიმზე გადასვლა შეუძლებელს ხდიდა განმცხადებელზე დაკისრებული ვალდებულებების შესრულებას. განმცხადებელი კი მიუთითებდა, რომ დამსაქმებელმა შრომითი ხელშეკრულება ვადაზე ადრე მხოლოდ მასთან შეწყვიტა, მისი პოლიტიკურ პარტიაში "საქართველოსთვის" აქტივობის გამო. საგულისხმოა, რომ მოპასუხეს არ წარმოუდგენია მტკიცებულებები, რაც დაადასტურებდა, რომ განმცხადებელზე დაკისრებული ფუნქციების გაუქმება ნამდვილად ეპიდემიოლოგიურ მდგომარეობასთან იყო დაკავშირებული, მაშინ როდესაც განმცხადებელს ხელშეკრულება სწორედ კოვიდპანდემიის პირობებში გაუფორმდა. ასევე, ხელშეკრულების შეწყვეტა იმ პერიოდს დაემთხვა, როდესაც მოსწავლე-ახალგაზრდობის სასახლე სექტემბრიდან - საგანმანათლებლო პერიოდის დაწყებიდან - მუშაობის აქტიურ ფაზაში უნდა ყოფილიყო. გარდა ამისა, მოსწავლე-ახალგაზრდობის სასახლეს არ მიუთითებია, რატომ შეუწყდა ეპიდემიოლოგიური მდგომარეობის გამო ხელშეკრულება მხოლოდ განმცხადებელს", - ნათქვამია ინფორმაციაში.

საქართველოს სახალხო დამცველი მიმართავს ააიპ ზუგდიდის მუნიციპალიტეტის მოსწავლე-ახალგაზრდობის სასახლეს: აღმოფხვრას კ. წ.-ს მიმართ დისკრიმინაციული მოპყრობის შედეგი სამუშაოზე აღდგენის გზით; მომავალში არ დაუშვას შრომით ურთიერთობაში პოლიტიკური მოსაზრების ან/და სხვა ნიშნით დისკრიმინაციული მოპყრობა და საქმიანობა წარმართოს თანასწორობის პრინციპის დაცვით, მათ შორის, უზრუნველყოს შიდა ორგანიზაციული აქტებისა და პოლიტიკის "დისკრიმინაციის ყველა ფორმის აღმოფხვრის შესახებ" საქართველოს კანონთან შესაბამისობა. გთხოვთ, თქვენ მიერ გატარებული ღონისძიებების თაობაზე მაცნობოთ "საქართველოს სახალხო დამცველის შესახებ" საქართველოს ორგანული კანონის 24-ე მუხლით დადგენილ ვადაში.

ცნობისთვის, ზუგდიდის მერიის ააიპ მოსწავლე-ახალგაზრდობის განვითარების სასახლე კიდევ ერთმა თანამშრომელმა დაადანაშაულა პოლიტიკური ნიშნით გათავისუფლებაში. მატერიალურ-ტექნიკურ საკითხთა განყოფილების ყოფილმა უფროსმა თამარ ქომეთიანმა 2022 წლის იანვარში, საჯაროდ განაცხადა, რომ ის სამსახურიდან ექსპრემიერ გიორგი გახარიას მხარდაჭერის გამო გაათავისუფლეს. თამარ ქომეთიანის თქმით, მასზე სასახლეში ზეწოლა ხორციელდებოდა, იბარებდნენ კაბინეტში მოთხოვნით, რომ სამსახური პირადი განცხადების საფუძველზე დაეტოვებინა. მანვე აღნიშნა, რომ საკუთარი უფლებების დასაცავად სასამართლოს გზით იბრძოლებს.

"მოსწავლე-ახალგაზრდობის განვითარების სასახლეში" უარყოფენ ყოფილი თანამშრომლის ბრალდებებს. დირექტორის მოადგილე მაკა სამუშიამ "ლაივპრესს" უთხრა, რომ თამარ ქომეთიანსშრომითი ხელშეკრულების ვადა დაუსრულდა და აღარ გაუგრძელდა. თუ რატომ, მისი განმარტებით,  თამარ ქომეთიანი არ ემორჩილებოდა ორგანიზაციის შინაგანაწესის მოთხოვნებს, უარს აცხადებდა შინაგანაწესის გაცნობაზე და პროტესტის ნიშნად არც რეგისტრაციის ჟურნალს აწერდა ხელს. შესაბამისად, ეს გარემოებაც გახდა იმის საფუძველი, რომ მასთან თანამშრომლობა არ გაგრძელდა.