საქართველოსა და რუსეთს შორის 27 თებერვალს გასამართი მატჩი გაურკვეველი ვადით გადაიდო. ამის შესახებინფორმაციას რაგბის კავშირი ავრცელებს.

"2022 წლის რაგბი ევროპის ჩემპიონატის მესამე ტურში, ბორჯღალოსნებს რუსეთთან უნდა ეთამაშათ, თუმცა რაგბი ევროპამ თამაში ჯერჯერობით უცნობი ვადით გადადო.

"შექმნილი სიტუაციიდან გამომდინარე, რაგბი ევროპამ 27 თებერვალს თბილისში, საქართველოსა და რუსეთს შორის გასამართი მატჩის გადადების გადაწყვეტილება მიიღო" – წერია რაგბი ევროპის ოფიციალურ განცხადებაში.

რაგბის კავშირის განცხადებითვე, რადგან თამაში 2023 წლის მსოფლიო თასის ეგიდითაც უნდა გამართულიყო, რაგბი ევროპა კონსულტაციებს გადის მსოფლიო რაგბთან, რის შემდეგაც მატჩის ჩატარების სავარაუდო ვადები გაირკვევა.

ასევე, გაუქმდა 27-28 თებერვალს მოსკოვში გასამართი თოვლის რაგბის ჩემპიონატი, 26 თებერვალს ესპანეთსა და რუსეთის ქალთა ნაკრებებს შორის მადრიდში გასამართი მატჩი კი, ჯერჯერობით ძალაში რჩება", - წერია რაგბის კავშირის განცხადებაში.

24 თებერვალს, დაახლოებით 05:00 საათზე მძიმე შეიარაღების გამოყენებით რუსეთის ძალები უკრაინას თავს დაესხნენ რუსეთისა და ბელარუსის ტერიტორიიდან. კიევი ათობით მსხვერპლის შესახებაც იუწყება როგორც სამხედროებში, ისე მშვიდობიან მოქალაქეებს შორის. უკრაინამ გაწყვიტა რუსეთთან დიპლომატიური ურთიერთობები. მანამდე, ქვეყანაში საომარი მდგომარეობა გამოცხადდა.