რუსეთის პრეზიდენტმა ვლადიმირ პუტინმა ფრანგ კოლეგა ემანუელ მაკრონს უთხრა, რომ კიევსა და უკრაინის სხვა ქალაქებზე სარაკეტო თავდასხმები არ ყოფილა და ეს ყველაფერი "ანტირუსული დეზინფორმაციული კამპანიის" ნაწილია. პუტინისა და მაკრონის სატელეფონო საუბარის შესახებ ინფორმაცია კრემლის ვებ-გვერდზე გამოქვეყნდა.

დიალოგისას პუტინმა მაკრონს უკრაინასთან მოლაპარაკების ორი მთავარი პირობა გააცნო - უკრაინის დემილიტარიზაცია და ნეიტრალური სტატუსი. მისი სიტყვებით, მოლაპარაკებების გადადება კი კიევისთვის ახალი პირობების წაყენებას გამოიწვევს.

რუსეთის პრეზიდენტი ირწმუნება, რომ "სამხედრო ოპერაცია გეგმის მიხედვით მიდის" და რუსი სამხედროები ყველაფერს აკეთებენ "მშვიდობიანი მოსახლეობის სიცოცხლის გადასარჩენად".

"მაღალი სიზუსტის იარაღი გამოიყენება მხოლოდ სამხედრო ინფრასტრუქტურის გასანადგურებლად. ბრალდებები კიევის, ასევე სხვა ქალაქების სარაკეტო თავდასხმებისა და დაბომბვების შესახებ, არ შეესაბამება სიმართლეს და წარმოადგენს ანტირუსული დეზინფორმაციული კამპანიის ნაწილს", - აცხადებს კრემლი.

ამავე ინფორმაციის თანახმად, ვლადიმერ პუტინმა დაადასტურა რუსეთის მზადყოფნა ითანამშრომლოს უცხოელ პარტნიორებთან "მწვავე ჰუმანიტარული პრობლემების გადასაჭრელად". მან მოუწოდა მაკრონს ჩაერთოს უკრაინიდან უცხო ქვეყნის მოქალაქეების ევაკუაციის პროცესში. ამ კონტექსტში ახსენა ხარკოვში ინდოელი სტუდენტების ჯგუფი. მისი თქმით, უკრაინის უშიშროების ძალებს ისინი "ფაქტობრივად მძევლად ჰყავთ აყვანილი". კრემლის ინფორმაციითვე, ემანუელ მაკრონმა პირობა დადო, რომ კიევის ხელმძღვანელობასთან ამ საკითხზე ისაუბრებს.

რუსეთის მიერ უკრაინაში შეჭრიდან მერვე დღეს, კვლავ გრძელდება საჰაერო და სახმელეთო თავდასხმები უკრაინულ ქალაქებზე. რუსეთი უკრაინას თავს 24 თებერვალს, გამთენიისას დაესხა.

უკრაინაზე თავდასხმის გამო, რუსეთს სანქციები დაუწესეს ევროკავშირმა, დიდმა ბრიტანეთმა, ამერიკის შეერთებულიმა შტატებმა და სხვა სახელმწიფოებმა.

მსოფლიოს მასშტაბით მოქალაქეები გამოდიან უკრაინის მხარდასაჭერად და რუსეთის მხრიდან აგრესიის დასაგმობად. აქციები იმართება საქართველოს დედაქალაქში ასევე სხვა ქალაქებში, მათ შორის ზუგდიდში.