საქართველოს პრემიერ-მინისტრ ირაკლი ღარიბაშვილის განცხადებით, პრეზიდენტი სალომე ზურაბიშვილი, როგორც ჩანს, შეცდომაშია შეყვანილი და გაუგებრობაშია. პრემიერის სიტყვებით, იმედი აქვს, რომ ძალიან მალე ალბათ ყველაფერი გაირკვევა და კითხვებიც მოიხსნება. მან ამის შესახებ განცხადება ჟურნალისტებთან "ქართული ოცნების" ოფისში გააკეთა. მედიის წარმომადგენლებმა მას მმართველი პარტიის მიერ დღეს გამოქვეყნებულ განცხადებაზე სთხოვეს კომენტარი, რომელის თანახმადაც, "ქართული ოცნება" იძულებული ხდება, მიმართოს საკონსტიტუციო სასამართლოს, რათა საქართველოს პრეზიდენტის მხრიდან კონსტიტუციის დარღვევის დადასტურება მოითხოვოს.

"მე აღარ გავიმეორებ რა თქმა უნდა იმას, რაც ჩვენი პოლიტსაბჭოს წერილში იყო ახსნილი, განმარტებული. მე ერთს დავამატებდი, რომ საქართველოს თითოეული მოქალაქე და პირველ რიგში, უმაღლესი პოლიტიკური თანამდებობის პირებს გვევალება, ეს არის ჩვენი პასუხისმგებლობა, მოვალეობა, რომ პატივი ვცეთ და დავიცვათ ჩვენი ქვეყნის მთავარი კანონი, ანუ კონსტიტუცია. რა თქმა უნდა, ძალიან სამწუხაროა, რომ ასეთ თემებზე გვიწევს საუბარი მაშინ, როდესაც ჩვენს ქვეყანას და მოსახლეობას ამდენი გამოწვევა და პრობლემა აქვს, იქნება ეს სოციალურ-ეკონომიკური თუ ტერიტორიული პრობლემები, თუ სხვა, რეგიონში მიმდინარე ძალიან რთული პროცესები, ამ დროს, ასეთ ვითარებაში გვიწევს საუბარი ისეთ საკითხებზე, რომელიც არის განმარტებული, ცხადი და ნათელი. ამ ყველაფერს განმარტავს საქართველოს კონსტიტუცია. როგორც ჩანს, სამწუხაროდ, საქართველოს პრეზიდენტი არის შეცდომაში შეყვანილი. ვარაუდი მინდა გამოვთქვა, რომ იგი ამ გაუგებრობაში აღმოჩნდა. აქვე მინდა, იმედი გამოვთქვა, რომ ძალიან მალე ალბათ ყველაფერი გაირკვევა და ეს კითხვებიც მოიხსნება", – განაცხადა ირაკლი ღარიბაშვილმა.

საქართველოს პრემიერ-მინისტრმა ასევე განმარტა მიზეზი, თუ რატომ არ დართეს სალომე ზურაბიშვილს ნება ოფიციალური ვიზიტები გაემართა.

"მაშინ, როცა ასეთი რთული პროცესებია რეგიონში, ფართომასშტაბიანი ომი მიმდინარეობს უკრაინაში, მე მიმაჩნდა და მთავრობის თითოეულ წევრს მიაჩნდა, რომ საქართველოს პრეზიდენტი, მთავარსარდალი უნდა იყოს ქვეყანაში, ეს იყო მთავარი არგუმენტი, მოტივაცია, უარი გვეთქვა მის ვიზიტზე. კონსტიტუციის მიხედვით, საგარეო პოლიტიკას განსაზღვრავს საქართველოს პარლამენტი და აღასრულებს საქართველოს მთავრობა. პრეზიდენტის ნებისმიერი ვიზიტი უნდა თანხმდებოდეს საქართველოს მთავრობასთან", - განაცხადა ღარიბაშვილმა.

"ქართული ოცნების" წევრების უკმაყოფილება მოჰყვა პრეზიდენტ ზურაბიშვილის სიტყვით გამოსვლას პარლამენტში 14 მარტს. როგორც პრეზიდენტმა აღნიშნა, უკრაინაში მიმდინარე მოვლენების გამო საჭიროდ მიაჩნდა საერთაშორისო პარტნიორებთან საქართველოს საკითხის განხილვა, თუმცა, ხელისუფლების მხრიდან უარი მიიღო პარიზში, ბრიუსელში, ბერლინსა და ვარშავაში სამუშაო ვიზიტების გამართვაზე. მიუხედავად ამისა, როგორც ზურაბიშვილმა აღნიშნა საჭიროდ მიიჩნია პირადი კონტაქტების გამოყენება და არაოფიციალურ ფორმატში ვიზიტები მაინც განახორციელა, სადაც გამოჩნდა ევროკავშირის ქვეყნების პოზიტიური სიგნალები საქართველოს მიმართ. დღეს კი, 15 მარტს გამოაქვეყნა "ქართულმა ოცნებამ" განცხადება, სდაც პრეზიდენტს კონსტიტუციის დარღვევაში ადანაშაულებენ. განცხადების თანახმად, "ქართული ოცნება" იძულებულია მიმართოს საკონსტიტუციო სასამართლოს და საქართველოს პრეზიდენტის მხრიდან კონსტიტუციის დარღვევის დადასტურება მოითხოვოს.