თბილისის საქალაქო სასამართლოს სისხლის სამართლის საქმეთა კოლეგიამ გამამტყუნებელი განაჩენი დაადგინა ჯგუფურად ჩადენილ ნიკოლოზ კვარაცხელიას განზრახ მკვლელობის ფაქტზე და ბრალდებულ აკაკი ჭელიძეს სასჯელის სახედ და ზომად მაქსიმალური სასჯელი - 17 წლით თავისუფლების აღკვეთა, ხოლო ბრალდებულ გიორგი კავილაძეს 16 წლით თავისუფლების აღკვეთა განესაზღვრა.

აკაკი ჭელიძეს და გიორგი კავილაძეს ბრალად ედებოდათ ჯგუფურად ჩადენილი განზრახ მკვლელობა და ცეცხლსასროლი იარაღისა და საბრძოლო მასალის მართლსაწინააღმდეგოდ შეძენა, შენახვა და ტარება, ჩადენილი ჯგუფურად.

თბილისის საქალაქო სასამართლოს ინფორმაციით, საქმის არსებითად განხილვისას სასამართლომ სრულად გაიზიარა ბრალდების მხარის მიერ წარმოდგენილი მტკიცებულებები როგორც განზრახ მკვლელობის, ისე ცეცხლსასროლი იარაღის შეძენა-შენახვა და ტარების ჯგუფურად ჩადენის ნაწილში.

"კერძოდ, მოწმეთა ჩვენებებით, შემთხვევის ადგილის დათვალიერებისა და ამოღების ოქმებით, დაქტილოსკოპიური და ბიოლოგიური ექსპერტიზის დასკვნებით, შემთხვევის ადგილის ამსახველი ვიდეო ჩანაწერით და საქმეში არსებულ სხვა მასალათა ერთობლიობით, სასამართლომ დადასტურებულად მიიჩნია ბრალდებულთა მხრიდან ბრალად შერაცხულ დანაშაულთა ჩადენა. განაჩენი შეიძლება გასაჩივრდეს გამოცხადებიდან 1 თვის ვადაში, თბილისის სააპელაციო სასამართლოს სისხლის სამართლის საქმეთა პალატაში თბილისის საქალაქო სასამართლოს მეშვეობით", - ნათქვამია ინფორმაციაში.

22 წლის ნიკა კვარაცხელია, 2021 წლის 15 სექტემბერს თბილისში, საცხოვრებელ კორპუსთან ახლოს, ცეცხლსასროლი იარაღიდან ათზე მეტი გასროლით, სასიკვდილოდ დაჭრეს. ის საავადმყოფოში მიყვანიდან მალევე გარდაიცვალა. პოლიციამ კვარაცხელიას მკვლელობაში ბრალდებული, ძებნილი პირები ქალაქ თბილისში, წყნეთში დააკავა 2021 წლის ოქტომბერში. 

გამოძიებით დადგინდა, რომ დაკავებულებმა აკაკი ჭელიძემ და გიორგი კავილაძემ დაგეგმეს ნიკა კვარაცხელიას მკვლელობა, რისთვისაც მათ მართლსაწინააღმდეგოდ შეიძინეს ცეცხლსასროლი იარაღი, საბრძოლო მასალა და ერთ-ერთი მოქალაქისგან იქირავეს ავტომობილი. მიმდინარე წლის 15 სექტემბერს, აღნიშნული პირები ნაქირავები ავტომანქანით თბილისში, ვერიკო ანჯაფარიძის ქუჩაზე ჩაუსაფრდნენ კვარაცხელიას.