ზუგდიდში მიუსაფარ ცხოველებზე ძალადობა გააპროტესტეს. აქციის მონაწილეები ტრანსფარანტებით შეიკრიბნენ ცენტრალური ბულვარის ტერირორიაზე, ძაღლების ფოტოებთან ერთად და საზოგადოებას შეახსენეს, რომ მათი წამება დანაშაულია.

აქციის მონაწილე მეგი გულაია ამბობს, რომ მიუსაფარი ცხოველების პრობლემა ძალიან აწუხებს. სწორედ ამ მიზეზით გამოვიდა დღეს ქუჩაში. თავად მიუსაფარი კატა შეიკედლა და უვლის. ფიქრობს, ეს ის საკითხია, რომელიც არ შეიძლება ადამიანმა გულგრილად გვერდზე გადადოს. პირიქით, პრიორიტეტი უნდა გახდეს მათი სიცოცხლის შენარჩუნებაზე ზრუნვა. ამ პროცესში კი, თითოეული მოქალაქის ხმა მნიშვნელოვანია.

"ჯერ კიდევ ვერ ამაღლდა ადამიანების ცნობიერება იმ დონემდე, რომ გაიაზრონ, რამდენად მნიშვნელოვანია იცოცხლოს კონკრეტულმა არსებამ. ვფიქრობ ახალგაზრდების ხმა ძალიან ბევრ რამეს შეცვლის, რაც უფრო ბევრნი გამოვალთ ხვალ. ძალიან ხშირად მხვდება ფაქტები, როცა ისე ვექცევით ცხოველებს, თითქოს მათი სიცოცხლე არაფერს ნიშნავს", - აცხადებს მეგი გულაია.

აქციის ორგანიზატორ დავით ვაჩეიშვილის თქმით, დღევანდელი შეკრების მიზანია კონკრეტულ, გადაწყვეტილების მიმღებ ორგანოებს და საზოგადოებას დაანახონ ის საჭიროებები, რაც მიუსაფარ ცხოველებს აქვთ. მათ შორის ადამიანების დამოკიდებულების გამო.

"ძალიან ხშირად შემიმჩნევია ძაღლზე ძალადობა და გულთან მიმაქვს ეს ყველაფერი. ვფიქრობ, შესაბამისმა ორგანოებმა უნდა გაამკაცრონ კანონი. დასჯადი უნდა იყოს ცხოველზე ძალადობა. უნდა აიკრძალოს ცხოველის დასმა, მოხდეს მათი დაჩიპვა და შეწყდეს ძალადობა", - აღნიშნა დავით ვაჩეიშვილმა.

კიდევ ერთი მოთხოვნაა, სავალდებულო გახდეს ცხოველების კასტრაცია-სტერილიზაცია.

აქციის მონაწილეების თქმით, იმისთვის, რომ მათი მოთხოვნები დაკმაყოფილდეს, პერიოდულად უნდა შეიკრიბონ მიუსაფარ ცხოველთა უფლებების დასაცავად.

ამ მოთხოვნით მოქალაქეებმა ზუგდიდში მანამდეც რამდენჯერმე გამართეს აქცია. ერთ-ერთი მოთხოვნა მიუსაფარი ცხოველების თავშესაფარია.

რეგიონული განვითარების სამინისტრომ 2018 წელს დააანონსა, რომ მიუსაფარ ცხოველთა თავშესაფარი ყველა რეგიონს 2019 წლის ბოლოსთვის ექნებოდა. სამეგრელოში საამისოდ ზუგდიდში, სოფელ ჭითაწყარის ტერიტორია შეირჩა. მომზადდა პროექტი, თუმცა შემდეგ მუნიციპალური განვითარების ფონდში გვითხრეს, რომ პანდემიის გამო, ბიუჯეტში კორექტირება მოხდა და ამ ეტაპზე ძაღლების თავშესაფრის მშენებლობა გეგმაში არ აქვთ.