უკრაინაში დაღუპული მებრძოლი, 40 წლის ალიკა ცაავა საკუთარ სახლში, წალენჯიხის მუნიციპალიტეტის ქალაქ ჯვარში ჩამოასვენეს. მებრძოლისთვის პატივის მისაგებად ჯვარში ადგილობრივი მცხოვრებლები საქართველოს და უკრაინის დროშებით შეირიბნენ.

"ჩამოიყვანეს ჩვენი ვაჟკაცი, ჩვენი გმირი. ვაჟკაცურად გაიზარდა პარტიზანის ოჯახში. მამამისიც პარტიზანი იყო. საქართველოს თავისუფლებას შეეწირა ბაბუაც, მამაც. ეს ომი არ არის მარტო უკრაინის, ეს ყველა ქვეყნის ომია… გული გვტკივა, სული გვეწვის, რომ ასეთი ვაჟკაცი დავკარგეთ",- უთხრა ჟურნალისტებს დაღუპული მებრძოლის ოჯახის ახლობელმა, ნანა ლუკავამ.

ქართველი მებრძოლები ალიკა ცაავა და ზაზა ბიწაძე ლუგანსკში, 16 აპრილს დაიღუპნენ. მებრძოლები აფეთქებას ემსხვერპლნენ, როცა კიდევ ერთი ქართველი ჯარისკაცის, არკადი კასრაძის ცხედრის გამოყვანას ცდილობდნენ.

ალიკა ცაავას და 50 წლის ზაზა ბიწაძის ცხედრები ვარშავა-თბილისის რეისით თბილისის საერთაშორისო აეროპორტში დღეს, 24 აპრილს ჩამოსვენეს.

ომის დაწყებიდან დღემდე უკრაინაში 9 ქართველი მებრძოლი დაიღუპა. მათ აორის ესენი არიან: დავით რატიანი, გია ბერიაშვილი, ნიკა შანავა, დავით მენაბდიშვილი, ბახვა ჩიქობავა, დავით გობეჯიშვილი, არკადი კასრაძე, ზაზა ბიწაძე და ალიკა ცაავა. ამ დრომდე ვერ ხერხდება მარიუპლში დაღუპული ბახვა ჩიქობავას სამშობლოში გადმოსვენება, რადგან ქალაქი რუსი საოკუპაციო ძალების ალყაშია.