იუსტიციის მინისტრ რატი ბრეგაძის განცხადებით, ექსპრეზიდენტ მიხეილ სააკაშვილს კლინიკა "ვივამედში" გადაყვანას სთავაზობენ. ამის შესახებ მან მთავრობის ადმინისტრაციაში გამართულ ბრიფინგზე ისაუბრა.

მინისტრის განმარტებით, მიზეზი მესამე პრეზიდენტის ჯანმრთელობის მდგომარეობის გაურესების პრევენციაა. მანვე აღნიშნა, რომ მსჯავრდებულს დანიშნული აქვს მედიკამენტოზური მკურნალობა, თუმცა ის შერჩევით იღებს მხოლოდ წამლების ნაწილს, რითაც ფაქტობრივად, უარს ამბობს საკუთარი გადაწყვეტილებით სრულფასოვან მკურნალობაზე.

"იგი საკვებსაც იღებს საკუთარი გადაწყვეტილებით მხოლოდ შერჩევით და ბუნებრივია, ამით საფთხეს უქმნის საკუთარ ჯანმრთელობას. ჩვენ, როგორც პასუხისმგებლიანი სახელმწიფო, ვმოქმედებთ ნებიემიერი ადამიანის ჯანმრთელობის და სიცოცხლის ინტერესებიდან გამომდინარე. შესაბამისად, როგორც ნებისმიერი სხვა პატიმრის შემთხვევაში, მიხეილ სააკაშვილს შესაძლო გართულებების თავიდან არიდების მიზნით გაუკეთდება შეთავაზება, რომ გაყვანილ იქნეს კლინიკა "ვივამედში" სადაც მას ჩაუტარდება გამოკვლევები და საჭიროების შემთხვევაში შესაბამისი მკურნალობა", - განაცხადა რატი ბრეგაძემ.

სახალხო დამცველის კონსილიუმის წევრებმა 27 აპრილს ექსპრეზიდენტი მიხეილ სააკაშვილი მოინახულეს. მათი შეფასებით, ბოლო ვიზიტთან შედარებით, რომელიც იანვარში შედგა, პაციენტის მდგომარეობა დამატებით მნიშვნელოვნადაა გაუარესებული.

ამასთან, 16 არასამთავრობო ორგანიზაცია აცხადებს, რომ საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის გაუარესების გამო, მისი სათანადო მკურნალობის შესახებ გადაწყვეტილება დაუყოვნებლივ უნდა მიიღონ, მათ შორის, ქვეყნის ფარგლებს გარეთაც.

იგივეს ითხოვს ენმ.

სპეციალური პენიტენციური სამსახური კი ირწმუნება, რომ ექსპრეზიდენტი მუდმივი მონიტორინგის ქვეშაა და მას სათანადო მკურნალობა უტარდება.