პარტია "ქართული ოცნების" თავმჯდომარე ირაკლი კობახიძის განცხადებით, იურიდიულ საკითხთა კომიტეტთან შეიქმნება სამუშაო ჯგუფი, რომელიც დეოლიგარქიზაციის კანონპროექტზე იმუშავებს. კანონპროექტს პარლამენტს ინიციატივის წესით წარედგინება არაუგვიანეს 5 ოქტომბრისა, საკანონმდებლო ორგანო კი მას 29 ნოემბრამდე მიიღებს.

მანვე, მმართველი პარტიის პოლიტსაბჭოს დასრულების შემდეგ ასევე ისაუბრა დეპოლარიზაციაზე და აღნიშნა, რომ ამით ხელისუფლება და ოპოზიცია თანაბრად უნდა იყოს დაინტერესებული. კობახიძისვე განცხადებით, დეპოლარიზაცია არ არის მარტივი საკითხი, მითუმეტეს, რომ მხოლოდ ერთ მხარეზე არ არის დამოკიდებული ამ პუნქტის შესრულება. ეს საჭიროებს ორივე მხარის ჯანსაღ მიდგომას ამ საკითხის მიმართ.

"ამ ეტაპზე, ვხედავთ, რომ სერიოზული სირთულეები არის ამ კუთხით. იმედი გვაქვს, რომ ეს სირთულეები დაიძლევა, თუმცა, კიდევ ერთხელ გავიმეორებ, რომ ეს არ არის მხოლოდ ჩვენი პრეროგატივა. ორივე მხარე თანაბრად უნდა იყოს დაინტერსებული დეპოლარიზაციით იმისთვის, რომ ეს პუნქტი სრულფასოვნად შესრულდეს. ჩვენ ჩვენი მხრივ, ყველაფერს გავაკეთებთ იმისთვის, რომ საზოგადოებაში ნაკლები პოლარიზაცია იყოს, საზოგადოებაში არც არის პოლარიზაციის მაღალი ხარისხი, პოლიტიკურ სპექტრში უნდა იყოს ნაკლები პოლარიზაცია, ამისთვის ჩვენი მხრიდან ყველაფერი გაკეთდება, ეს არის ჩვენი პასუხისმგებლობა", - განაცხადა კობახიძემ.

საქართველომ წლის ბოლომდე უნდა შეასრულოს ევროკავშირის მიერ განსაზღვრული 12 პუნქტი, კანდიდატის სტატუსის მისანიჭებლად. ერთ-ერთი სწორედ დეოლიგარქიზაციას ეხება.

ევროსაბჭომ უკრაინას და მოლდოვას კანდიდატის სტატუსი, საქართველოს კი ევროპული პერსპექტივა მიანიჭა. ევროპული საბჭოს გადაწყვეტილებით, ისინი მზად არიან ქვეყანას კანდიდატის სტატუსი მიანიჭონ მაშინ, როცა პირობები შესრულდება.