ერთიანი ეროვნული გამოცდები ხვალ, 4 ივლისს, ქართული ენისა და ლიტერატურის გამოცდით დაიწყება. ქვეყნის მასშტაბით გახსნილია 22 საგამოცდო ცენტრი.

წელს ზუგდიდში, საგამოცდო ცენტრი მეორე საჯარო სკოლის ნაცვლად, მეოთხე საჯარო სკოლა იქნება.

ფოთში კი აბიტურიენტებს ივანე ჯავახიშვილის სახელობის ქალაქ ფოთის №3 საჯარო სკოლაში ელოდებიან.

წელს დარეგისტრირებულია 41 000-ზე მეტი აბიტურიენტი.

რეგისტრაცია ყველა საგამოცდო ცენტრში ერთდროულად ზუსტად 08:00 საათზე, გამოცდა კი 09:00 საათზე დაიწყება.

მეორე სესიაზე რეგისტრაციის დაწყების დროა 14:00 საათი, გამოცდისა კი - 15:00 საათი.

გამოცდების ეროვნული ცენტრის ინფორმაციით, სურვილის შემთხვევაში, აბიტურიენტს შეუძლია თან იქონიოს წყალი პლასტმასის ბოთლით; საწერი კალამი შესაბამისი პარამეტრებით (გელიანი (ე. წ. ტუშის), შავი ფერის, 0,5-0,7 მმ. ბურთულიანი წვერით).

"წელსაც, ყველა ცენტრი აღჭურვილია გაგრილების სისტემითა და საჭირო ინფრასტრუქტურით. საგამოცდო ცენტრების მიმდებარე ტერიტორიაზე მობილიზებული იქნება სასწრაფო დახმარების მანქანები, სამაშველო სამსახური და საპატრულო პოლიცია", - ვკითხულობთ ინფორმაციაში.