არასამთავრობო ორგანიზაციების ნაწილმა საზოგადოებას საკუთარი ხედვა გააცნო ევროკავშირის რეკომენდაციების 12 პუნქტის შესასრულებლად. მათი განცხადებით, იმისთვის, რომ პირველი პუნქტი - პოლარიზაციის დასრულება შესრულდეს, ხელისუფლების და ოპოზიციის წარმომადგენლები უნდა დაუბრუნდნენ შარლ მიშელის დოკუმენტს.

არასამთავრობოების განმარტებით, ისინი გაეცნენ მმართველი პარტიის მიერ წარმოდგენილ გეგმას, რომელიც მოიცავს მხოლოდ პროცედურულ საკითხებს, სამუშაო ჯგუფებს, კონკრეტული ნაბიჯები კი ამ მიმართულებით ვერ დაინახეს. ისინი ფიქრობენ, რომ ეს იქნება ფორმალური პროცესი, ის გაიწელება დროში და წლის ბოლომდე არ გადაიდგმება ნაბიჯები, რაც კანდიდატის სტატუსის მისანიჭებლადაა საჭირო.

"უნდა დავუბრუნდეთ შარლ მიშელის დოკუმენტს, სადაც ძალიან კარგად იყო გაწერილი, რომ პოლარიზაციის დასრულებისთვის პარლამენტში უნდა მოხდეს ძალთა დაბალანსება. მაგალითად, ხუთ კომიტეტს ოპოზიცია თავმჯდომარეობდეს და მათ შორის ორი იყოს ისეთი კომიტეტი, როგორიც არის საბიუჯეტო კომიტეტი. ეს არის შესასრულებელი ძალიან მარტივად. სჭირდება ხმათა 75%.

ასევე, მაგალითად, მნიშვნელოვანია საკონსტიტუციო ცვლილებები, რომლებიც ერთი მოსმენით უკვე იყო მიღებული და სჭირდება კიდევ ორი მოსმენა, რომ იყოს მიღებული და ესეც ძალიან მარტივად არის შესასრულებელი.

გარდა ამისა, როდესაც არჩევნებს ვეხებით, ძალიან მნიშვნელოვანია საარჩევნო კანონმდებლობაში ცვლილება, რომელიც ეხება ცესკო-ს დამოუკიდებლობას და ცესკო-ს თავმჯდომარისა და წევრების, ასევე კონსენსუსი საფუძველზე მიღებას, იმიტომ, რომ ეს იქნება მთავარი არჩევნებისადმი ნდობის ასამაღლებლად.

ჩვენ წარმოდგენილი გვაქვს ასევე გეგმა, როგორ უნდა განხორციელდეს მართლმსაჯულების რეფორმა, რომელთაგან ძალიან მარტივად არის განსახორციელებელი იუსტიციის საბჭოს რეფორმა, ან იუსტიციის უმაღლესი საბჭოს არამოსამართლე წევრების არჩევა.

ასევე, ჩვენ გვაქვს წარმოდგენილი ხედვა კორუფციასთან ბრძოლასთან დაკავშირებით, რომ შეიქმნას სააგენტო, რომელიც გააერთიანებს სხვადასხვა უწყებებში კორუფციასთან ბრძოლის მექანიზმებს და იქნება უფრო ეფექტური", - განაცხადა "სამართლიანი არჩევნების" წარმომადგენელმა, ნინო დოლიძემ.

მისივე თქმით, თუ 11 პუნქტი შესრულდება, ეს ძალაუფლების გადანაწილებას გამოიწვევს და ავტომატურად შესრულდება მე-5, დეოლიგარქიზაციის პუნქტიც - შესუსტება ოლიგარქიული მმართველობა.

ნინო დოლიძემ განმარტა, რომ თუკი იქნება პოლიტიკური ნება, ყველა რეკომენდაცია იოლი შესასრულებელია.

გეგმა წარმოადგინეს - "საიამ", "სამართლიანმა არჩევნებმა", "საფარმა", "ღია საზოგადოების ფონდმა", "სოციალური სამართლიანობის ცენტრმა", "კოალიციამ მედიის ადვოკატირევისთვის", "საერთაშორისო გამჭვირვალობა საქართველომ".

მანამდე, ხელისუფლებამ გააცნო საზოგადოებას გეგმა, როგორ აპირებენ ისინი 12 პუნქტის შესრულებას წლის ბოლომდე.

თუმცა, მოძრაობა "შინ ევროპისკენ" წევრებს, რომელიც პოლიტიკურ პარტიებთან ერთად, სხვადასხვა სფეროს წარმომადგენლებს აერთიანებს, არ სჯერათ, რომ მთავრობა კანდიდატის სტატუსის მისაღებად რეკომდენდაციებს წლის ბოლომდე შეასრულებს. სწორედ ამიტომ ითხოვენ, ეს მისია იკისროს "ეროვნული თანხმობის მთავრობამ - ევროკავშირისთვის".

ამიტომ, დღეს პარლამენტთან აქცია გაიმართება, რომელსაც რეგიონებიდან, მათ შორის სამეგრელო-ზემო სვანეთიდანაც შეუერთდებიან.

აქცია-პერფორმანსი დაგეგმილია ზუგდიდშიც.

ევროსაბჭომ უკრაინას და მოლდოვას კანდიდატის სტატუსი, საქართველოს კი ევროპული პერსპექტივა მიანიჭა. ევროპული საბჭოს გადაწყვეტილებით, ისინი მზად არიან ქვეყანას კანდიდატის სტატუსი მიანიჭონ მაშინ, როცა პირობები შესრულდება. ეს პირობები კი 12 პუნქტს მოიცავს და წლის ბოლომდე უნდა შესრულდეს.