პარლამენტთან მიმდინარე აქციის ერთ-ერთმა ორგანიზატორმა, შოთა დიღმელაშვილმა შეკრებილებს მოუწოდა, ერთი ღამე რუსთაველზე გაათიონ. მისი თქმით, სამოქმედო გეგმას ეტაპობრივად გაამხელენ, რადგან სრულად გამხელა საფრთხეში აგდებს მის წარმატებულად განხორციელება.

"ხვალ ხომ არის ერთიანი ეროვნული გამოცდები. ერთი ეროვნული გამოცდა უნდა ჩავაბაროთ აქაც. და ეს ეროვნული გამოცდა იქნება, დავრჩეთ აქ დილამდე. გავათიოთ ღამე და გზაში გეტტყვით, როგორ მივაღწევთ შედეგს. შეგიქმნით ყველა კომფორტს იმისთვის, რომ თქვენი აქ ყოფნა იყო მაქსიმალურად ადვილად გადასატანი. მაგრამ მგონი შეგვიძლია, ერთი ღამე გავათიოთ საკუთარი ქვეყნისთვის. იმიტომ, რომ მერე შეიძლება ბევრი ღამის გათენება მოგვიწიოს სხვა ქვეყანაში", - განაცხადა შოთა დიღმელაშვილმა.

მოძრაობა "შინ ევროპისკენ" წევრმა, გიორგი მშვენიერაძემ მიმართა შეკრებილებს, 3 ათასი ადამიანი გამოეყოს აქციას და გაემართონ "ქართული ოცნების" ოფისისკენ, სადაც არაძალადობრივ მანიფესტაციას გამართავენ.

აქციის ორგანიზატორებმა დღეს კიდევ ერთხელ ისაუბრეს პრემიერ-მინისტრ ირაკლი ღარიბაშვილის გადადგომასა და ეროვნული თანხმობის მთავრობის შექმნაზე. ულტიმატუმის ვადა დღეს იწურება.

მოძრაობა "შინ ევროპისკენ" წევრებს, რომელიც პოლიტიკურ პარტიებთან ერთად, სხვადასხვა სფეროს წარმომადგენლებს აერთიანებს, არ სჯერათ, რომ მთავრობა კანდიდატის სტატუსის მისაღებად რეკომენდაციებს წლის ბოლომდე შეასრულებს.

ხელისუფლება კი ირწმუნება, რომ მზად არის იმუშაოს ევროკომისიის პირობებზე და ამისთვის გეგმაც წარმოადგინა. მმართველი პარტიის განცხადებით, სამუშაო პროცესში ოპოზიციის ჩართულობაც აუცილებელია.

ევროსაბჭომ უკრაინას და მოლდოვას კანდიდატის სტატუსი, საქართველოს კი ევროპული პერსპექტივა მიანიჭა. ევროპული საბჭოს გადაწყვეტილებით, ისინი მზად არიან ქვეყანას კანდიდატის სტატუსი მიანიჭონ მაშინ, როცა პირობები შესრულდება. ეს პირობები კი 12 პუნქტს მოიცავს და წლის ბოლომდე უნდა შესრულდეს.