ევროკავშირის მიერ დაფინანსებულმა პროექტმა EU4Culture, მობილობის გრანტების მეორე კონკურსი გამოაცხადა. მიზანი საქართველოში, აზერბაიჯანში, მოლდოვასა და სომხეთში, კულტურის სფეროს წარმომადგენლების მხარდაჭერაა.

კანდიდატებმა ონლაინ სააპლიკაციო ფორმის გამოყენებით უნდა მოამზადონ სამოქმედო გეგმა და დაურთონ ბიუჯეტი საერთაშორისო მობილობისთვის. შემდეგ კი, განაცხადი გოეთეს ინსტიტუტის სააპლიკაციო პორტალის (GAP) საშუალებით უნდა შეიტანონ.

განაცხადებების წარდგენის ბოლოო ვადა, მიმდინარე წლის 31 აგვისტოა.

კონკურსში მონაწილეობა შეუძლიათ მხატვრებს და კულტურის ყველა სფეროს პროფესიონალებს, რომლებსაც შეუსრულდათ 18 წელი და რომლებიც ზემოთ უკვე ჩამოთვლილი ჩამოთვლილი ქვეყნების მოქალაქეები, ან კანონიერი რეზიდენტები არიან.

გრანტები განკუთვნილია ინტერნატურისთვის, სასწავლო ვიზიტებისთვის, კონფერენციებისთვის, პროფესიული განვითარებისთვის და სხვა იმ სახის საქმიანობისთვის, რომელიც ხელს უწყობს ცოდნის გაზიარებას და კულტურათაშორის დიალოგს.

საკონკურსო დაფინანსება მოკლევადიანი მობილობისთვის (7-10 კალენდარული დღე) 1,500-მდე ევროა, საშუალოვადიანი მობილობისთვის (5 კვირამდე პერიოდი) - 3,500-მდე ევრო, გრძელვადიანი მობილობისთვის (12 კვირამდე პერიოდი) - 5,000-მდე ევრო, ხოლო ვირტუალური მობილობისთვის 1,000-მდე ევრო. ეს უკანასკნელი გულისხმობს არა მოგზაურობას, არამედ სხვა ქვეყანაში მიმდინარე ღონისძიებაში ონლაინ მონაწილეობას.

მობილობის პროექტების განხორციელება 2022 წლის 17 ოქტომბრიდან 2023 წლის 27 ოქტომბრამდე პერიოდში, ევროკავშირის წევრ სახელმწიფოებში, ევროკავშირის პარტნიორ ქვეყნებსა და ევროპის სხვა ქვეყნებშია შესაძლებელი.

პროექტს, EU4Culture გოეთეს ინსტიტუტი (ხელმძღვანელი), ჩეხეთის ცენტრები, დანიის კულტურის ინსტიტუტი და საქართველოს ფრანგული ინსტიტუტი (Institut Français de Géorgie) ახორციელებენ.

2022-2024 წლებში, პროექტი მობილობის გრანტებზე, ჯამში ექვს კონკურსს გამოაცხადებს და 250-მდე ინდივიდუალურ გრანტს გასცემს.