ამერიკის შეერთებული შტატების ელჩის განცხადებით, ყველა იმ პირობის შესრულება, რასაც ევროკომისია ითხოვს, საქართველოს დეოლიგარქიზაციამდე მიიყვანს. კელი დეგნანი ამბობს, რომ მე-19 საუკუნეში ამერიკაც იდგა იგივე გამოწვევების წინაშე, თუმცა პრობლემა შესაბამისი კანონის მიღების შემდეგ გადაიჭრა.

"კონტროლი ეკონომიკაზე, საზოგადოებაზე, რა თქმა უნდა ეს ყველაფერი მიუღებელია. ევროკომისიის რეკომენდაციებში რა ჩამონათვალიც არის, ნაბიჯები, რაც უნდა გადაიდგას, მათ შორის მართლმსაჯულება, კანონის უზენაესობა, ანტიკორუფციული რეფორმების განხორციელება, საბოლოო ჯამში მიგვიყვანს დეოლიგარქიზაციამდე. მთავარი არის ერთი რამ - ისეთი სისტემა შეიქმნას, რაც უზრუნველყოფს სამართლიან ეკონომიკურ-პოლიტიკურ, ძლიერი საზოგადოების და ქვეყნის ჩამოყალიბებას. აქ ერთმანეთისგან უნდა გაიმიჯნოს და არ უნდა იყოს ერთმანეთთან დაკავშირებული ფული და პოლიტიკა. არ უნდა იყოს პერსონიფიცირებული, ერთი პირი არ უნდა აკონტროლებდეს ან პოლიტიკას, ან ეკონომიკას. დეოლიგარქიზაცია არ ნიშნავს, რომ რომელიმე ერთ პერსონაზე იყოს საუბარი. არაპროდუქტიულია ცალკეულ პერსონებზე საუბარი", - განაცხადა ელჩმა "ლაივპრესთან" ინტერვიუში.

კელი დეგნანის თქმით, მთავარია საზოგადოების ნდობა და შესაბამისი, სწორი სისტემის ჩამოყალიბება და თუ მოსახლეობას ექნება ნდობა პროცესების მიმართ, მაშინ ეს უკვე ნიშნავს, რომ საქმე ნამდვილად გვაქვს დემოკრატიულ სისტემასთან. ამ ყველაფრის შედეგი კი, ელჩის განმარტებით, სწორედ დეოლიგარქიზაცია იქნება.

დეოლიგარქიზაცია ევროკომისიის 12 პუნქტიანი რეკომენდაციის ერთ-ერთი პირობაა. თავის მხრივ, საქართველოში ოპოზიცია წლებია საუბრობს, რომ ქვეყანა ერთი ადამიანის, "ქართული ოცნების" დამფუძნებელ ბიძინა ივანიშვილის მიერ იმართება ამ დრომდე. ხელისუფლება კი ირწმუნება, რომ ივანიშვილი პოლიტიკას ჩამოშორდა და სახელმწიფოს მართვის პროცესში აღარ მონაწილეობს.

მმართველი პარტიის თავმჯდომარე ირაკლი კობახიძემ, კანდიდატის სტატუსის მისაღებად აუცილებელი 12 პუნქტის შესასრულებლად შემუშავებული გეგმა პირველ ივლისს წარადგინა. მათ შორის საუბარი შეეხება დეოლიგარქიზაციასაც. მისი თქმით, იურიდიულ საკითხთა კომიტეტთან შეიქმნება სამუშაო ჯგუფი, რომელიც დეოლიგარქიზაციის კანონპროექტზე იმუშავებს. კანონპროექტს პარლამენტს ინიციატივის წესით წარედგინება არაუგვიანეს 5 ოქტომბრისა, საკანონმდებლო ორგანო კი მას 29 ნოემბრამდე მიიღებს.