საგანგებო სიტუაციების მართვის სამსახური მოუწოდებს მოსახლეობას, გამოიჩინონ მაღალი სამოქალაქო პასუხისმგებლობა, არ დაანთონ ცეცხლი სასოფლო სამეურნეო სავარგულებზე, ტყის ან მინდვრის სიახლოვეს და არ დატოვონ შემდეგ ეს კერები უყურადღებოდ.

მათივე ცნობით, საყოფაცხოვრებო ნარჩენებს თვითაალება შეუძლიათ.

"გაცნობებთ, რომ მომავალი დღეების განმავლობაში მთელი საქართველოს მასშტაბით შენარჩუნდება მომატებული ტემპერატურა და უნალექო ამინდები. გარდა ამისა, მთიან რეგიონებში, ჰაერის მაღალ ტემპერატურასთან ერთად, მოსალოდნელია ძლიერი ქარიც, რაც ტყის ხანძრების გაჩენის ხელშემწყობ ფაქტორებს შექმნის", - ვკითხულობთ განცხადებაში.

ზაფხულობით და შემოდგომაზე, ქვეყნის მასშტაბით გახშირებულია ხანძრები, რომლის ერთ-ერთი მიზეზიც, მაღალი ტემპერატურის გარდა, ნარჩენების დაწვაა.

ადმინისტრაციულ სამართალდარღვევათა კოდექსის მიხედვით, ტყეებში სახანძრო უსაფრთხოების მოთხოვნათა დარღვევა, რასაც მოჰყვა ტყეში ხანძრის გაჩენა ან მისი გავრცელება გარკვეულ ფართობზე, აგრეთვე, ტყის მოსპობა ან დაზიანება ცეცხლის წაკიდების ან ცეცხლისადმი დაუდევრად მოპყრობის შედეგად - გამოიწვევს დაჯარიმებას 300 - დან 500- ლარამდე. ტყეში დაუდევრობით გამოწვეული ხანძრის შემთხვევაში, კანონი ითვალისწინებს თავისუფლების აღკვეთას ოთხიდან რვა წლამდე.