სენაკის რაიონულმა სასამართლომ გააუქმა სენაკის მუნიციპალიტეტის საკრებულოს მიერ, 19 და 23 თებერვალს მიღებული გადაწყვეტილებები. მათ შორის ოპოზიციის მიერ საკრებულოს თავმჯდომარედ ექსპრემიერ გიორგი გახარიას პარტია "საქართველოსთვის" წევრის, ირაკლი კაჭარავას არჩევა. სასამართლომ ამით სრულად დააკმაყოფილა პარტია "ქართული ოცნების" მიერ თებერვალში შეტანილი სარჩელი.

სასამართლო სხდომის დასრულების შემდეგ "ქართული ოცნების" ადვოკატმა, ნათია ბოკუჩავამ განაცხადა, რომ 19 და 23 თებერვალს საკრებულოს სხდომა ჩატარდა კვორუმის გარეშე. შესაბამისად, გაუქმდა ამ სხდომებზე მიღებული შვიდივე გადაწყვეტილება, რომელთა შორის ასევე არის საკრებულოდან წასული გახარიას გუნდის წევრის ადგილმონაცვლის, ნიკოლოზ შამათავას უფლებამოსილების ცნობა, დროებითი სამანდატო და დროებითი ხმის დამთვლელი კომისიების არჩევა.

ადვოკატის სიტყვებით, სასამართლოს დღევანდელი გადაწყვეტილების შემდეგ, სენაკის საკრებულოში პროცესები დაუბრუნდება 9 თებერვლამდე არსებულ მდგომარეობას და ყველა ჩამოთვლილი საკითხი თავიდან ექნებათ დეპუტატებს განსახილველი.

სასამართლოს გადაწყვეტილებით უკმაყოფილოა სენაკის საკრებულოს ოპოზიცია, თუმცა ჯერ არ გადაუწყვეტიათ, გაასაჩივრებენ თუ არა მას.

ფრაქცია "სენაკი საქართველოსთვის" თავმჯდომარის მოადგილე, ედიშერ ბაღათურია აცხადებს, რომ სენაკის რაიონულმა სასამართლომ მიიღო უკანონო გადაწყვეტილება, რაც ოპოზიციისთვის მოულოდნელი არ ყოფილა.

"სასამართლოს ამ გადაწყვეტილებით კიდევ ერთხელ დადასტურდა, რომ სამწუხაროდ, ჯერ კიდევ შორს ვართ დამოუკიდებელი სასამართლოსგან და ამ კუთხით ქვეყანას ბევრი სამუშაო აქვს. ამ ყველაფერს მივყავართ ავტოკრატიის ჩამოყალიბებისკენ, როცა მთავრობა ცდილობს ძალაუფლების მთლიანად შენარჩუნებას, ან კიდევ ეს მიუთითებს იმას, რომ ხელისუფლებას წყალი აქვს უკვე შემდგარი და მათი წუთები დათვლილია", - განაცხადა ედიშერ ბაღათურიამ.

ფრაქცია "ერთიანი ნაციონალური მოძრაობის" თავმჯდომარის მოადგილე, ბორის სოსელიას განმარტებით, 17 დეკემბრიდან 9 თებერვლამდე 9 სხდომა იყო ჩანიშნული და არცერთში არ მიუღია "ქართულ ოცნებას" მონაწილეობა, რათა პროცესი სწორედ ასე წარემართა.

სენაკის საკრებულოში "ქართული ოცნების" ფრაქციის წევრი, საბა ოდიშარია სასამართლოს გადაწყვეტილებით კმაყოფილია. ამბობს, რომ გადაწყვეტილების დასაბუთებისას ამოსავალ წერტილად სასამართლომ მიიჩნია ის, რასაც "ქართული ოცნება" თავიდანვე უსვამდა ხაზს, რომ საკრებულო უფლებამოსილია მხოლოდ მაშინ, როდესაც არის კვორუმით გახსნილი:

"ანუ, როცა სხდომას ესწრება სიის შემადგენლობის ნახევარზე მეტი. სენაკის შემთხვევაში ეს წარმოადგენდა საკრებულოს 17 წევრს, თუმცა ოპოზიციურმა პარტიებმა 16 წევრით გადაწყვიტეს მიეღოთ ის გადაწყვეტილებები, რომელიც სასამართლომ დღეს ბათილად ცნო", - განაცხადა საბა ოდიშარიამ.

სენაკის საკრებულოს ოპოზიციას მიაჩნია, რომ სენაკის მუნიციპალიტეტში, გამომდინარე იქიდან, რომ 6 თვეა რაც საკრებულოს სხდომა არ გამართულა, უნდა ჩატარდეს საკრებულოს რიგგარეშე არჩევნები. თვლიან, რომ უკანონოა თბილისის საქალაქო სასამართლოს გადაწყვეტილებაც, რომლითაც არ დაკმაყოფილდა "საქართველოს ახალგაზრდა იურისტთა ასოციაციის" მოთხოვნა და სენაკში შუალედური არჩევნების დანიშვნის გადაწყვეტილება არ გაუქმდა.

ორგანიზაციას მიაჩნია, რომ სენაკში საკრებულოს შუალედური არჩევნების დანიშვნა კანონს არ შეესაბამება, ვინაიდან ეს საკრებულო უკვე 6 თვეზე მეტია არ შეკრებილა, რის გამოც მისი უფლებამოსილების შეწყვეტის უპირობო საფუძველი და შესაბამისად, მუნიციპალიტეტში რიგგარეშე არჩევნების დანიშვნის წინაპირობები არსებობს.

ცესკოს განკარგულებით, სენაკის მუნიციპალიტეტის საკრებულოს შუალედური არჩევნები პირველ ოქტომბერს გაიმართება. შუალედური არჩევნები სენაკის საკრებულოს გამოკლებული წევრის ასარჩევად ტარდება. კენჭისყრა მაჟორიტარული საარჩევნო სისტემით, სამ საარჩევნო უბანზე უნდა ჩატარდეს.

სენაკის მუნიციპალიტეტის წარმომადგენლობითი ორგანო ბოლოს 2021 წლის 17 დეკემბერს შეიკრიბა. ამ თარიღის შემდეგ იყო სხდომის ჩატარების 10-ზე მეტი მცდელობა, თუმცა ისინი, კვორუმის არარსებობის გამო ვერ გაიმართა. მიმდინარე წლის 9 თებერვალს, სენაკის საკრებულოს 16 დეპუტატი, პარტია "გახარია საქართველოსთვის" და "ერთიანი ნაციონალური მოძრაობიდან", შეიკრიბა საკრებულოს სხდომათა დარბაზში. მიუხედავად იმისა, რომ სხდომის გახსნის კვორუმი არ ჰქონდათ (ამისთვის საჭირო იყო 17 დეპუტატის რეგისტრაცია), მათ ჩათვალეს, რომ ისევ მოქმედებდა 2021 წლის 3 დეკემბრის კვორუმი და სხდომა უფლებამოსილი იყო მიეღო გადაწყვეტილებები. ამ მოტივაციაზე დაყრდნობით, დეპუტატებმა ცნეს დამატებით ერთი წევრის (პროპორციული წესით არჩეული დეპუტატის ადგილმონაცვლე, გახარია საქართველოსთვის პარტიიდან) უფლებამოსილება. აგრეთვე, გადაირჩიეს დროებითი ხმის დამთვლელი და სამანდატო კომისიები. ამავე შემადგენლობამ, 23 თებერვალს საკრებულოს თავმჯდომარეც აირჩია. აღნიშნული გადაწყვეტილებები პარტია "ქართულმა ოცნებამ" სენაკის რაიონულ სასამართლოში გაასაჩივრა.