ზუგდიდის ბოტანიკურ ბაღში, მოქმედი ტარიფების გაუქმების მოთხოვნით, ადგილობრივი მერიის მოპირდაპირე შენობიდან საპროტესტო ბანერი გამოფინეს.

"გააღე ბოტანიკურის ჭიშკარი", "ბოტანიკური ბაღი უნდა იყოს უფასო", - ამ შინაარსის გზავნილები დაიტანეს მასზე მოძრაობა "ხმის" წარმომადგენლებმა, რომლებიც არ ეთანხმებიან ხელისუფლების გადაწყვეტილებას და სხვადასხვა ფორმით განაგრძობენ პროტესტს.

იგივე შინაარსის ბანერი განათავსეს ქალაქის ცენტრში, ინსტალაციაზეც - "მე მიყვარს" ზუგდიდი.

"ბრძოლა გრძელდება, სანამ ბოტანიკური ბაღი არ გახდება უფასო. შემოგვიერთდით", - აცხადებენ მოძრაობის წევრები და ირწმუნებიან, რომ მანამ, სანამ მათი მოთხოვნა არ დაკმაყოფილდება, აქციები და პროტესტი გაგრძელდება.

ზუგდიდის ბოტანიკურ ბაღში შესვლა 1-ელი თებერვლიდან ფასიანი გახდა. ბაღის ადმინისტრაციამ ეს გადაწყვეტილება შემდეგი გარემოებებით ახსნა - ამ სივრცეს უნდა ჰქონდეს საკუთარი შემოსავალი და მეტიც, მუნიციპალურ ბიუჯეტს ეტაპობრივად უნდა ჩამოშორდეს. ადმინისტრაციისვე ცნობით, კიდევ ერთი მიზეზი, ტერიტორიაზე "ვანდალიზმის ფაქტების" პრევენციაა.

მოძრაობა "ხმა" ამ არგუმენტებს არ იზიარებს და ვანდალიზმში სწორედ ხელისუფლებას ადანაშაულებს. მათი თქმით, ის, რომ ბაღი რეკონსტრუქციიდან სამი თვის თავზე იტბორება და მრავალწლოვანი ხეების წაქცევას იწვევს, ნიშნავს იმას, რომ ყველაზე მეტი, რეკონსტრუქციის სამუშაოების დროს დაშავდა.

ზუგდიდის ბოტანიკურ ბაღში ტარიფების დაწესება მოქალაქეთა ნაწილმა რამდენჯერმე გააპროტესტა. აქციების პარარელურად, შეგროვდა ხელმოწერებიც.

მათი თქმით იმ ფონზე, როცა ქვეყანაში ეკონომიკური კრიზისია, ბევრია უმუშევარი და დასაქმებულების ყოველთვიური ანაზღაურებაც კი მიზერულია, ბოტანიკური ბაღი ტარიფებს არ უნდა აწესებდეს.