უკრაინელი სამხედროების მიერ გათავისუფლებულ ხარკოვის ოლქის ქალაქ იზიუმში, დაღუპული მოქალაქეების მაჩვენებელი შეიძლება ბევრად მეტი იყოს ვიდრე ბუჩაში. ამის შესახებ "უკრაინსკაია პრავდა" განსაკუთრებულ ვითარებაში უგზო-უკვლოდ დაკარგულთა კომისარ ოლეგ კოტენკოზე დაყრდნობით წერს.

იზიუმის დეოკუპაციის შემდეგ ცნობილი გახდა, რომ იპოვეს სასაფლაო, სადაც 440-ზე მეტი მოკლული ადამიანია დამარხული.

"ახლა ჩვენ ვმუშაობთ სამხედრო მოსამსახურეების ცხედრების ექსჰუმაციაზე, შემდეგ კი ცხედრები ექსპერტებს გადაეცემათ დაღუპულთა იდენტიფიკაციისთვის. სამწუხაროდ, ეს სამუშაოს მხოლოდ დასაწყისია. ჯერ კიდევ რამდენი ასეთი ადგილი იქნება დეოკუპირებულ ტერიტორიებზე, უცნობია, მაგრამ მწარე რეალობა იმაზე მეტყველებს, რომ იზიუმში დაღუპულთა რიცხვი შეიძლება რამდენჯერმე აღემატებოდეს ბუჩის ტრაგედიას", - აცხადებს ოლეგ კოტენკო. მისივე თქმით, მასობრივი სამარხის ერთ-ერთი ლოკაცია რუსეთის მოქალაქეების მიერ სოციალურ ქსელში გამოქვეყნებული ვიდეოს დახმარებით იპოვეს.

შეგახსენებთ, რომ კიევის ოლქის ქალაქ ბუჩაში მშვიდობიანი მოქალაქეების მასობრივი სამარხი აპრილში, ქალაქიდან რუსი სამხედროების გასვლის შემდეგ იპოვეს. საუბარი იყო 100-ობით ცხედარზე, რომლებსაც წამების კვალი აღენიშნებოდათ.

5 სექტემბრიდან უკრაინის შეიარაღებული ძალები გადავიდნენ ინტენსიურ კონტრშეტევაზე. ოფიციალური ინფორმაციის თანახმად, უკრაინელმა სამხედროებმა დაიბრუნეს რუსული არმიის მიერ ოკუპირებული 400-მდე დასახლება.

რუსული არმია უკრაინაში 2022 წლის 24 თებერვალს, გამთენიისას შეიჭრა. საჰაერო და საარტილერიო თავდასხმები ამ დრომდე გრძელდება, რასაც ასობით სამხედრო პირი და მშვიდობიანი მოქალაქე ემსხვერპლა.