რუსეთის მიერ ოკუპირებულ აფხაზეთში ბელარუსის პრეზიდენტი ალექსანდრ ლუკაშენკო ჩავიდა. აფხაზური საინფორმაციო სააგენტო "აფსნიპრესი" წერს, რომ ლუკაშენკო დე ფაქტო რესპუბლიკის პრეზიდენტ ასლან ბჟანიას ბიჭვინთის სახელმწიფო აგარაკზე შეხვდა. როგორც სააგენტო წერს, ბჟანიამ ბელარუსის პრეზიდენტის მისალმებისას თქვა, რომ ის "დიდი ხნის ნანატრი სტუმარია".

ე.წ. აფხაზეთის პრეზიდენტმა გამოთქვა იმედი, რომ ბელარუსის პრეზიდენტის ვიზიტი ახალი ბიძგის მიმცემი იქნება "ორ სახელმწიფოს შორის ურთერთობებში".

"ჩვენ აუცილებლად გავაკეთებთ ისე, რომ ისინი [ურთიერთობები] ისეთივე იყოს, როგორიც კარგ საბჭოთა დროს იყო. კეთილი იყოს თქვენი მობრძანება აფხაზეთში!" - ციტირებს ბჟანიას სიტყვებს "აფსნიპრესი".

თავისმხრივ ალექსანდრ ლუკაშენკომ მადლობა გადაუხადა ასლან ბჟანიას კეთილი სიტყვებისთვის.

"ნოსტალგია არასოდეს გვტოვებს. ადრე, ალბათ, 25-27 წლის ასაკში ვიყავი ამ წმინდა მიწაზე. ბუნებრივია, არა პრეზიდენტის რანგში. შეიძლება ითქვას, როგორც ჩვეულებრივი ადამიანი, პარლამენტის წევრი. გუშინ ჩვენ აფხაზეთის პრობლემები განვიხილეთ ჩვენს უფროს ძმასთან ვლადიმირ პუტინთან. ჩვენ დიდხანს, დაღამებამდე ვიმსჯელეთ ამ საკითხებზე და მივედით დასკვნამდე, რომ აფხაზეთი არ უნდა იყოს მიტოვებული. მას დახმარება სჭირდება, რათა ამ აყვავებულ მიწაზე, ხალხმა ნორმალურად იცხოვროს", - განაცხადა ალექსანდრ ლუკაშენკომ.

მანვე აღნიშნა, რომ მისი ვიზიტი რაიმე განსაკუთრებული მიზეზით არ ხდება და ეს ურთიერთობების გაღრმავებას უკავშირდება, თუმცა აქვე დასძინა, რომ ახლა "ერთმანეთის გაძლიერების"დროა.

ლუკაშენკოს თქმითვე, ბელარუსი და რუსეთი შეთანხმებულად მოქმედებენ.

"რუსეთი მზად არის ხელის გაწვდენისთვის. ალბათ დადგა დრო. დღეს, როგორც არასდროს, ჩვენ ვნახეთ როგორი გახდა სამყარო. მშვიდად ცხოვრების უფლებას არ მოგვცემენ. ამიტომ, მეგობრებთან ურთიერთობა უნდა გავამყაროთ", - განაცხადა მან.
ასლან ბჟანიამ დაადასტურა, რომ მსოფლიოში ძალიან მძიმე მდგომარეობაა.

"ჩვენ ყურადღებით ვაკვირდებით მოვლენებს, რომლებიც მსოფლიოში ხდება. აფხაზეთის ყველა მოქალაქე შეშფოთებულია ამით. თქვენ ალბათ იცით, რომ ჩვენი მოქალაქეები დღეს დონბასში იბრძვიან. სამწუხაროდ, აფხაზეთის მოქალაქეებიც დაღუპნენ", - განაცხადა ბჟანიამ.

როგორც "აფსნიპრესი" იუწყება, შეხვედრა დახურულ კარს მიღმა გაგრძელდა.