ბელარუსის პრეზიდენტმა ალექსანდრე ლუკაშენკომ 28 სექტემბერს შავი ზღვის ჩრდილო-აღმოსავლეთ სანაპიროს ისტორიული ადგილები მოინახულა. შეხვედრა გაიმართა აფხაზურ მიწაზეც, - ვკითხულობთ ინფორმაციაში, რომელსაც ბელარუსის პრეზიდენტის ადმინისტრაცია ავრცელებს.

მასში აღნიშნულია, რომ ალექსანდრ ლუკაშენკომ ასლან ბჟანიასთან ერთად ეკონომიკური პროექტები განიხილა, თანამშრომლობის პერსპექტიული საკითხები ბელარუსსა და აფხაზეთს შორის. თუმცა პრესრელიზში ბჟანია სტატუსის გარეშეა მოხსენიებული.

ბელარუსის პრეზიდენტის თქმით, ერთი დღით ადრე მან რუსეთის პრეზიდენტ ვლადიმერ პუტინთან განიხილა აფხაზეთის პრობლემები.

"ამ საკითხებზე ღამემდე ბევრი ვიმსჯელეთ. ის ჩემზე მეტად არის ჩაფლული აფხაზეთის პრობლემებსა და საქმეებში. ამაზე დიდხანს არ ვისაუბრებ, მაგრამ ერთ დასკვნამდე მივედით: აფხაზეთი არსებობს, რუკიდან ვერ წაშლი. ამას ვერანაირი სანქციები ვერ გააკეთებს. აფხაზეთი, როგორც ის ამბობს, არ უნდა იყოს მიტოვებული, ჩვენ უნდა დავეხმაროთ, რომ ამ აყვავებულმა რეგიონმა და აქ მცხოვრებმა ხალხმა ნორმალურად იცხოვროს", - ნათქვამია გამოქვეყნებულ ინფორმაციაში.

ალექსანდრ ლუკაშენკომ აღნიშნა, რომ ის აქ არ მოსულა იმიტომ, რომ "რაღაც განსაკუთრებული სიტუაციაა". მისი განმარტებით, ვითარება ნორმალურია, არ აწუხებთ არანაირი გეოპოლიტიკა. უბრალოდ აქვთ სურვილი თანხმობაში ცხოვრების.

ბელარუსის პრეზიდენტი ალექსანდრ ლუკაშენკო დე ფაქტო რესპუბლიკის პრეზიდენტ ასლან ბჟანიას ბიჭვინთის სახელმწიფო აგარაკზე 28 სექტემბერს შეხვდა.

ლუკაშენსკოს თქმით, მისი ვიზიტი რაიმე განსაკუთრებული მიზეზით არ ხდება და ეს ურთიერთობების გაღრმავებას უკავშირდება, თუმცა აქვე დასძინა, რომ ახლა "ერთმანეთის გაძლიერების"დროა.

ე.წ. პრეზიდენტმა ასლან ბჟანიამ კი იმედი გამოთქვა, რომ ნაბიჯ-ნაბიჯ ბელარუსის მხრიდან აფხაზეთის "აღიარებამდეც" მივლენ.

აფხაზეთში მის ჩასვლას გამოეხმაურნენ თბილისში. სახელმწიფო საზღვრის დარღვევით ალექსანდრე ლუკაშენკოს "ვიზიტს" საგარეო საქმეთა სამინისტრომ უხეშად დარღვევა უწოდა საერთაშორისო სამართლის ფუნდამენტური პრინციპების და ნორმების. იგივე თქვეს პრეზიდენტმა და პრემიერ-მინისტრმაც. მათ ასევე აღნიშნეს, რომ ვიზიტი ეწინააღმდეგება საერთაშორისო სამართალს, ისევე როგორც ორმხრივ ურთიერთობებს საქართველოს და ბელარუსს შორის.

მანამდე, საგარეო საქმეთა სამინისტროში პროტესტის ნიშნად საქართველოში ბელარუსის ელჩი ანატოლი ლისი დაიბარეს და დამატებით განმარტებები მოსთხოვეს.