"მამუკა ტუსკაძე - სოციალური სამართლიანობისთვის" თავმჯდომარე მამუკა ტუსკაძემაც საკუთარი არჩევანი დააფიქსირა სენაკის საკრებულოს შუალედურ არჩევნებზე. ის მმართველი პარტიის ერთადერთი კონკურენტია დღეს. ამბობს, რომ მისმა გუნდმა გადაწყვიტა კანდიდატად სწორედ ის დასახელებულიყო და კენჭისყრაც კონკურენტუნარიან გარემოში ჩატარებულიყო.

მამუკა ტუსკაძის განცხადებით, მათთვის, როგორც ახალი პოლიტიკური მოძრაობისთვის, მთავარია რაც შეიძლება მეტჯერ გამოჩნდნენ საზოგადოების წინაშე, ჰქონდეთ მეტი საშუალება, მოსახლეობას საკუთარი პროგრამა გააცნონ, რაც შეძლეს და განახორციელეს კიდც თეკლათის თემში.

"დიდი იმედი მაქვს, რომ 2% ნიშნულს კი არადა, მეტ შედეგსაც მივიღებთ ამ არჩევნებში. კარგი საარჩევნო კამპანია გვქონდა, თავისუფალ გარემოში. მთელმა ოპოზიციურმა სპექტრმა დათმო ეს არჩევნები და იმედი მაქვს, რომ 2024 წელსაც ასე იზამენ და დაუთმობენ ჩვენს პოლიტიკურ სპექტრს. შევძელით, რომ თითეულ ოჯახში შევედით თეკლათში. ყველგან ვიყავი მისული ჩემს მხარდამჭერებთან ერთად. თუ უნდათ, რომ მათი პრობლემები უფრო მაღალ დონეზე იყოს, ჩამოსულ კანდიდატს უნდა მისცენ ხმა", - აღნიშნა მამუკა ტუსკაძემ.

მისგან განსხვავებით, სენაკის საკრებულოში ფრაქცია "ერთიანი ნაციონალური მოძრაობის" თავმჯდომარე ლაშა კუჭავა აცხადებს, რომ დღევანდელი არჩევნები არ ჯდება სამართლებრივ ჩარჩოებში და ემსახურება მხოლოდ "ქართული ოცნების" ინტერესებს. სწორედ ეს არის ოპოზიციის ბოიკოტის მიზეზი.

თავის მხრივ, მმართველი პარტიის კანდიდატმა ზაზა ყურაშვილმა თქვა, რომ ოპოზიციის ბოიკოტის მიზეზი მარცხია, რომლისთვისაც ისინი განწირულები არიან.

სენაკში საკრებულოს შუალედური არჩევნები, გამოკლებული წევრის ასარჩევად ტარდება. მოსახლეობა თეკლათისა და ჭალადიდის ოლქის მაჟორიტარ დეპუტატს ირჩევს.