სენაკში საკრებულოს შუალედური არჩევნები, გამოკლებული წევრის ასარჩევად დასრულდა. ხმის დათვლის ელექტრონული აპარატებიდან წინასწარი შედეგების ამსახველი ამონაწერები საარჩევნო უბნებზე შესაბამის პროცედურების დასრულებისთანავე ამოიბეჭდა.

ხმების 96,68% , რაც 962 ხმაა, მიიღო "ქართული ოცნების" კანდიდატმა ზაზა ყურაშვილმა. მისმა ერთადერთმა კონკურენტმა, "მამუკა ტუსკაძე - სოციალური სამართლიანობისთვის" თავმჯდომარე მამუკა ტუსკაძემ კი 3, 32%, რაც 33 ხმაა.

ამონაწერის თანახმად, კენჭისყრაში მონაწილეობა მიიღო 1021-მა ამომრჩეველმა, რაც სამივე უბანზე რეგისტრირებულთა საერთო რაოდენობის 44,26%-ია.

"ელექტრონული ტექნოლოგიების გამოყენებამ მოგვცა საშუალება, კენჭისყრის დასრულებიდან უმოკლეს დროში წარმოგიდგინოთ პირველადი, წინასწარი შედეგები", - განაცხადეს ცესკოში.

სენაკში საარჩევნო უბნებზე ზოგიერთი საარჩევნო პროცედურა საპილოტე რეჟიმში ელექტრონული ტექნოლოგიების გამოყენებით განხორციელდა. სამივე საარჩევნო უბანზე განთავსებული იყო ვერიფიკაციის აპარატები, ხმის მიცემისა და დათვლის ელექტრონული საშუალებები.

ოპოზიციურ პარტიებს, მათ შორის "ნაციონალურ მოძრაობას", გახარია საქართველოსთვის" და "ლელოს" არჩევნებში პროტესტის ნიშნად არ მიუღიათ მონაწილეობა.

ოპოზიციის და არასამთავრობოების შეფასებით, დღევანდელი არჩევნები ცდება სამართლებრივ ჩარჩოს და მხოლოდ "ქართული ოცნების" ინტერესებს ემსახურება.

მმართველი პარტიის კანდიდატის ერთადერთი კონკურენტი, "მამუკა ტუსკაძე - სოციალური სამართლიანობისთვის" თავმჯდომარე მამუკა ტუსკაძე იყო.

საია სენაკში შუალედური არჩევნების გაუქმებას ითხოვდა. ორგანიზაციას მიაჩნია, რომ სენაკში საკრებულოს შუალედური არჩევნების დანიშვნა კანონს არ შეესაბამება, ვინაიდან ეს საკრებულო უკვე 6 თვეზე მეტია არ შეკრებილა, რის გამოც მისი უფლებამოსილების შეწყვეტის უპირობო საფუძველი და შესაბამისად, მუნიციპალიტეტში რიგგარეშე არჩევნების დანიშვნის წინაპირობები არსებობდა.

ბრალდებები უარყო ცესკომ. ცენტრალური საარჩევნო კომისია ირწმუნება, რომ სენაკის საკრებულოს შუალედური არჩევნები დაინიშნა და ჩატარდა კანონმდებლობის სრული დაცვით, რაც დადასტურებულია სასამართლოს ორი ინსტანციის გადაწყვეტილებით. ამიტომ, კონკრეტული პოლიტიკური ძალების მხრიდან საუბარი სამართლებრივი ჩარჩოდან გასვლის შესახებ მანიპულაციურად და უსაფუძვლოდ მიაჩნიათ.

"ქართულ ოცნებას" სენაკის საკრებულოში ჯერჯერობით 16 წევრი ჰყავს.

ოპოზიცია 17 წევრით იყო წარმოდგენილი. მათგან 13 "ნაციონალური მოძრაობის" წევრი იყო. ეს მანამ, სანამ ენმ-ის დეპუტატი წარმომადგენლობით ორგანოს დატოვებდა. 4 კი "საქართველოსთვის" დეპუტატია.