წალენჯიხის მუნიციპალიტეტის მერი, გია ხარჩილავა, მისი ავტომანქანის დაწვის ფაქტს გარკვეულ აქტად აფასებს, რომელიც რაღაც გზავნილს მოიცავს. მერი ჟურნალისტებთან საუბარში ირწმუნება, რომ ტრანსპორტი გამართული იყო და არანაირი პრობლემა არ ჰქონია. მითუმტეს ელექტრობასთან დაკავშირებული.

გია ხარჩილავას თქმით, წალენჯიხა არის ერთადერთი ოპოზიციური მუნიციპალიტეტი, რომელიც რეფორმებს ახორციელებს, ანტიკორუფციულ სქემებს შიფრავს და ამხელს და შესაძლოა ამან ვიღაც გააღიზიანა.

"ჩვენ ვცხოვრობთ რუსეთში, ჩვენ პირდაპირ მოსკოვის სისტემიზირებული იპერიის გუბერნია, განშტოება ვართ და ის მეთოდები, რომელიც ძალიან ბუნებრივია რუსეთში, ჩანერგილია ალბათ აქ", - ამბობს მერი.

გია ხარჩილავას მტკიცებით, ავტომანქანაში, რომელიც პულტით იმართება, ყველაფერი გამორთული იყო, სწორედ ამიტომ გამორიცხავს თვითაალების ვერსიას. მისივე განმარტებით, გამთენიას, 4-ის ნახევარზე შვილმა გაიგო გასკდომის ხმა და ნახეს, რომ ავტომანქანას უკვე ეკიდა ცეცხლი. 112-შიც მაშინვე დარეკეს.

"ამ კვალს შეხედეთ, ფერდობი აქვს, დახრილობა აქვს და მანქანიდან გამოჟონილი სითხე ზევით ვერ ამოვიდოდა. აქ მთელი მექანიზმია ადგილზე წარმოდგენილი. მე ამის თქმის უფლებას მაძლევს ეს დაკვირვებები. მანქანაში ესხა 60 ლიტრი ბენზინი, იქ რამე რომ მომხდარიყო... ხომ წარმოგიდგენიათ რასთან გვაქვს საქმე?", - უთხრა მერმა ჟურნალისტებს.

გია ხარჩილავას თქმით, გამოძიებასაც იგივე უთხრა.

ავტომანქანის დაწვას მსხვერპლი არ მჰყოლია. არც არავინ დაშავებულა.

წალენჯიხის მუნიციპალიტეტის მერის, გია ხარჩილავას ავტომობილის დაწვის ფაქტზე შინაგან საქმეთა სამინისტრომ გამოძიება დაიწყო. როგორც "ლაივპრესს" უწყების პრესსამსახურში განუცხადეს, გამოძიება საქართველოს სისხლის სამართლის კოდექსის 187-ე მუხლით დაიწყო, რაც სხვისი ნივთის განადგურებას გულისხმობს.