ამერიკის შეერთებული შტატების საელჩო ეხმაურება "მთავარი არხის" დამფუძნებლის, ნიკა გვარამიას მიმართ, სააპელაციო სასამართლოს გადაწყვეტილებას, რომლითაც ის პატიმრობაში დარჩა.

განცხადებაში ნათქვამია, რომ მაშინ, როცა საქართველოს ერთგულება მიუკერძოებელი სასამართლოსა და მედია პლურალიზმის მიმართ განსაკუთრებული დაკვირვების საგანია, ეს გადაწყვეტილება რისკის ქვეშ აყენებს ქართველი ხალხის მკაფიო არჩევანს და საქართველოს ლიდერების გაცხადებულ მიზანს, უფრო უსაფრთხო, დემოკრატიული, ევროპული მომავლის შესახებ.

"შეერთებული შტატების საელჩო კიდევ ერთხელ გამოხატავს ღრმა შეშფოთებას დღევანდელ გადაწყვეტილებასთან დაკავშირებით გვარამიას, იაშვილისა და დამენიას საქმეზე. არაერთმა საერთაშორისო და ქართველმა უფლებადამცველმა თავიდანვე წამოჭრა სერიოზული კითხვები ამ საქმის შესახებ, მათ შორის დროსა და ბრალდებებთან დაკავშირებით, აგრეთვე, მსჯავრდებისა და სასჯელის შესახებ. შერჩევითი გამოძიების, სისხლისსამართლებრივი დევნისა და მსჯავრდების აღქმაც კი ასუსტებს საზოგადოების ნდობას სამართალდამცავების, პროკურატურის, სასამართლოებისა და თავად ხელისუფლების მიმართ", - აცხადებს საელჩო.

მათივე თქმით, შეერთებული შტატები გააგრძელებს მედიის თავისუფლებისა და სასამართლო რეფორმის მხარდაჭერას, რაც აუცილებელია სტაბილური და წარმატებული დემოკრატიის ასაშენებლად, და რაც ქართველი ხალხის მკაფიო სურვილია.

თბილისის სააპელაციო სასამართლომ პატიმრობაში დატოვა "მთავარი არხის" დამფუძნებელი და გენერალური დირექტორი ნიკა გვარამია. მას სამი წლით და ექვსი თვით აქვს თავისუფლების აღკვეთა მისჯილი.

ძალაში დარჩა ნიკა გვარამიასთან ერთად ბრალდებულების, კახაბერ დამენიას და ზურაბ იაშვილის მიმართ განაჩენიც, რომლის მიხედვითაც, კახაბერ დამენიას 50 000-ლარიანი ჯარიმა დაეკისრა, ზურაბ იაშვილი კი უდანაშაულოდ ცნეს.

პროკურატურა ნიკა გვარმიას 2019 წლიდან ედავებოდა "რუსთავი 2"- ში მისი დირექტორობის პერიოდში ტელეკომპანიის დიდი ოდენობით ქონების გაფლანგვას, მოსყიდვას, ყალბი დოკუმენტის დამზადებასა და გამოყენებას, უკანონო შემოსავლის ლეგალიზაციასა და უფლებამოსილების ბოროტად გამოყენებას.

სასამართლომ გვარამია დამნაშავედ ცნო ორ ეპიზოდში - ტელეკომპანიისთვის 6 763 509 ლარის ზიანის მიყენებაში და ტელეკომპანიის სარეკლამო დროის ხარჯზე ძვირად ღირებული ავტომობილის მიღებაში.