სახელმწიფო უსაფრთხოების სამსახურის ინფორმაციით, რუსეთის მიერ ოკუპირებულ აფხაზეთში უკანონოდ დააკავეს საქართველოს მოქალაქე.

სუს-ის ცნობით, უკანონო დაკავება მოხდა ოკუპირებულ გალში, ნარკოტიკული ნივთიერებების შეძენა-შენახვის ე.წ. ბრალდებით.

"ოკუპირებული აფხაზეთის საოკუპაციო რეჟიმის წარმომადგენლებმა უკანონოდ დააკავეს საქართველოს მოქალაქე, გალის მცხოვრები ა.თ. ცხელი ხაზით გაზიარებული ინფორმაციით, უკანონოდ დაკავებულს ე.წ. ბრალი ედება ნარკოტიკული ნივთიერებების შეძენა შენახვის ფაქტზე. გაზიარებული უნფორმაციის მიხედვით, უკანონო დაკავება ოკუპირებულ ტერიტორიაზე მოხდა, სადაც ა.თ პერმანენტულად ცხოვრობს.

სახელმწიფო უსაფრთხოების სამსახურის მიერ დაუყოვნებლივ გააქტიურდა ცხელი ხაზი და ინფორმაცია ა.თ-ის უკანონოდ დაკავების შესახებ ეცნობა ევროკავშირის სადამკვირვებლო მისიას და ჟენევის საერთაშორისო დისკუსიების თანათავმჯდომარეებს. ამოქმედებულია ყველა არსებული მექანიზმი და მიმდინარეობს მუშაობა საქართველოს მოქალაქის უკანონო პატიმრობიდან გასათავისუფლებლად.

საოკუპაციო ძალის მიერ უკანონო დაკავებების უკიდურესად დესტრუქციული პრაქტიკა, რომელსაც ახორციელებს საოკუპაციო რეჟიმი, ართულებს ადგილობრივი მოსახლეობის ყოველდღიურ ცხოვრებას და მნიშვნელოვან ზიანს აყენებს უსაფრთხოების გარემოს. საოკუპაციო ძალის მიერ განხორციელებული ყველა დაკავება უკანონოა და აღნიშნულზე სრული პასუხისმგებლობა ეკისრება საოკუპაციო ძალას",- ნათქვამი სუსის მიერ გავრცელებულ ინფორმაციაში.

მიმდინარე კვირაში ეს უკვე მეორე შემთხვევაა, როცა გავრცელდა ინფორმაცია ოკუპირებული აფხაზეთის მიმართულებით საქართველოს მოქალაქის დაკავების შესახებ. სუსი 2 ნოემბერსაც იუწყებოდა, რომ რუსეთის საოკუპაციო ძალის წარმომადგენლების მიერ საქართველოს მოქალაქის უკანონო დაკავება მოხდა.