ექსპრეზიდენტი მიხეილ სააკაშვილი, მოსამართლე გიორგი არევაძის გადაწყვეტილებით პირდაპირი ჩართვიდან გათიშეს. ეს მას შემდეგ, რაც სააკაშვილმა განაცხადა, რომ საზოგადოებას უკრაინულ ენაზე მიმართავდა.

მოსამართლემ მოუწოდა მსჯავრდებულს ქართულად ესაუბრა, რადგან მიუხედავად იმისა, რომ ის უკრაინის მოქალაქეა, პროცესი ქართულ ენაზე მიმდინარეობს და ყოფილი პრეზიდენტი ქართულად ლაპარაკობს. თუმცა სააკაშვილმა მიმართვა კვლავ უკრაინულ ენაზე განაგრძო. ამის გამო მოსამართლემ ის პირდაპირი ეთერიდან გამორთო.

მანამდე, მიხეილ სააკაშვილის უფლებადამცველმა შალვა ხაჭაპურიძემ ექსპრეზიდენტს უთხრა, რომ წამომდგარიყო და ეჩვენებინა საზოგადოებისთვის ის დაზიანებები, რაც სხეულზე აქვს. მოსამართლის თქმით, თუ სააკაშვილი პერანგს გაიხდიდა, დისტანციური ჩართვაც შეწყდებოდა.

შესვენების შემდეგ ადვოკატმა თქვა, რომ სხდომის მიმდინარეობისას მიხეილ სააკაშვილი ცუდად გახდა, რის გამოც ამ ეტაპზე ის დისტანციურად ჩართვას ვერ შეძლებს.

სასამართლო ექსპრეზიდენტ მიხეილ სააკაშვილისთვის სასჯელის გადავადებაზე მსჯელობს.

მესამე პრეზიდენტი უკრაინიდან საქართველოში ჩამოსვლისას, 2021 წლის პირველ ოქტომბერს დააკავეს. მან პროტესტის ნიშნად მაშინ 50 დღე იშიმშილა. ამის შემდეგ შეექმნა ჯანმრთელობის პრობლემები. ოჯახის წევრების, ადვოკატის თქმით, მიხეილ სააკაშვილის მდგომარეობა მძიმეა, სიცოცხლისთვის სახიფათო, ამიტომ ქვეყნის გარეთ მკურნალობას თვეებია ითხოვენ.

ამ მოთხოვნით ენმ-ის სამი დეპუტატი შიმშილობს.