აფხაზი დიპლომატი, კან ტანია გამოეხმაურა საქართველოს პრემიერ-მინისტრ ირაკლი ღარიბაშვილის განცხადებას, რომლის თანახმადაც, გაერთიანების შემთხვევაში აფხაზეთი შეიძლება გახდეს მეორე მონაკო, სოხუმი მეორე მონტე-კარლო.

კან ტანიას თქმით, აფხაზეთი საქართველოსთან არანაირი თანხის სანაცვლოდ არ გაერთიანდება. მისივე სიტყვებით, თავისუფლებით და სუვერენიტეტით არ ვაჭრობენ.

აფხაზი დიპლომატი ამბობს, რომ 1992-93 წლების შეიარაღებულმა დაპირისპირებამ აფხაზეთს სხვადასხვა შეფასებით 17 მილიარდ დოლარამდე ზიანი მიაყენა.

"თუ ეკონომიკურ ზარალზე ვსაუბრობთ, მაშინ აფხაზეთისთვის გაცილებით დიდი თანხა და ყოველგვარი პირობის გარეშე გმართებთ", - აცხადებს კან ტანია.

მისივე სიტყვებით, ამის მიუხედავად, ღარიბაშვილის განცხადებაში არის რამდენიმე საღი წინადადება, კერძოდ, მოსაზრება, რომ აფხაზეთი შეიძლება გახდეს მონაკო.

ტანია განმარტავს, რომ ამისთვის არ არის საჭირო 10 მილიარდი დოლარის დახარჯვა, საჭიროა მხოლოდ მთავრობის დადგენილების მიღება, რომელიც აღიარებს აფხაზეთის "სუვერენიტეტს", ეს კი საშუალებას მისცემს "ქვეყანას", გაწევრიანდეს გაეროში, ითანამშრომლონ სხვა ქვეყნებთან და კიდევ უფრო განვითარდნენ.

კან ტანია ამბობს, რომ ხელშეკრულება ჯერაც არ არის ხელმოწერილი ძალის არგამოყენების შესახებ, ამ ფონზე კი თბილისი საუბრობს, რომ სამშვიდობო პოლიტიკა აფხაზეთის და ცხინვალის მიმართ არ გადაიხედება. აფხაზი დიპლომატის აზრით, სიტყვები ქმედებებს ეწინააღმდეგება.

პრემიერ-მინისტრმა ირაკლი ღარიბაშვილმა შემაჯამებელი ანგარიშით წარდგენაზე თქვა, რომ გაერთიანების შემთხვევაში აფხაზეთი შესაძლოა მეორე მონაკო გახდეს. საქართველოს შემადგენლობაში დაბრუნების შემდეგ, მთავრობის მეთაურის თქმით, ცენტრალურ ხელისუფლებას აფხაზეთსა და სამაჩაბლოში 10 მილიარდის ინვესტიციის განხორციელება შეუძლია.