ახალი წლის მოახლოებასთან ერთად, ხორცპროდუქტებზე მოთხოვნის ზრდის გამო, მისი შეძენა-შენახვის პირობებზე გაეროს სურსათისა და სოფლის მეურნეობის ორგანიზაცია (FAO) მოსახლეობას რეკომენდაციებს შეახსენებს.

„რა უნდა გავითვალისწინოთ ხორცის ყიდვისას?

1. ყურადღება მიაქციეთ, რომ მას თან ახლდეს ეტიკეტი, რომელზეც მითითებული იქნება პროდუქტის უვნებლობასა და ვარგისიანობასთან დაკავშირებული მნიშვნელოვანი ინფორმაცია:

ქვეყნის დასახელება და სასაკლაოს აღიარების ან პირობითი აღიარების ნომერი, დამზადების თარიღი და დრო;

ეტიკეტზე მითითებული უნდა იყოს ცხოველის საიდენტიფიკაციო საყურე ნიშნის ნომერი;

თუ ხორცი იმპორტირებულია, ეტიკეტზე მითითებული უნდა იყოს იმპორტიორი ქვეყნის დასახელება;

ეტიკეტი გამოკრული უნდა იყოს თვალსაჩინო ადგილას იმ მაცივარზე, რომელშიც პროდუქტი ინახება;

ხორცპროდუქტის შეძენისას მომხმარებლებს ასევე საშუალება აქვთ, გაეცნონ შინაური ცხოველის შესახებ დამატებით დეტალურ ინფორმაციას ეტიკეტზე დატანილი QR კოდის საშუალებით.

2. ხორცი უნდა ინახებოდეს სუფთა, დახურულ მაცივარში, შესაბამისი ტემპერატურული რეჟიმის დაცვით, რომელიც განსაზღვრულია 2-დან 6-გრადუსამდე, მითითებული უნდა იყოს შენახვის ვადა.

3. სხვადასხვა სახეობის ცხოველის ხორცი (საქონელი, ცხვარი, ღორი, თხა) მაცივარში განცალკევებით უნდა იყოს განთავსებული. ასევე, ცალ-ცალკე უნდა განთავსდეს სხვადასხვა ქვეყნიდან იმპორტირებული ხორციც.

ვეტერინარული ზედამხედველობის გარეშე დაკლული და რეალიზებული ხორცისა და არასათანადო პირობებში დამზადებული, ცხოველური წარმოშობის პროდუქტებისგან (რძე, ყველი, თევზი და ა. შ) ადამიანი შეიძლება დაავადდეს სიცოცხლისა და ჯანმრთელობისათვის საშიში დაავადებებით“, - აცხადებენ ორგანიზაციაში.

FAO-ს მონაცემებით, ყოველწლიურად, საკვებით გამოწვეული დაავადებებით მსოფლიოში 600 მილიონი ადამიანი ავადდება, ხოლო დაახლოებით 420 000 ადამინისთვის ეს შემთხვევები ფატალურია. დაავადებები, ძირითადად, გამოწვეულია ბაქტერიებით, ვირუსებით, პარაზიტებით, ან სხვადასხვა ნივთიერებებით, რომლებიც ჩვენს სხეულში, ძირითადად,დაბინძურებული საკვებით ან დაბინძურებული წყლით ხვდება.