სამეგრელოს სოფლების დიდ ნაწილში გლეხებმა თხილის მოსავალი უკვე აიღეს. შარშანდელისგან განსხვავებით, გლეხები წელს თხილის მცირე მოსავალს უჩივიან. ამბობენ, რომ ერთადერთი შემოსავლის წყარო თხილია, რომლის ფასიც წელს ძალიან დაბალია.
ზუგდიდის ბაზარზე ერთი კილოგრამი თხილის ფასი 2 ლარსა და 60 თეთრს არ აღემატება. მიუხედავად დაბალი ფასისა, გლეხებმა თხილის რეალიზაცია მაინც დაიწყეს:
„შარშანდელთან შედარებით, წელს თხილის მოსავალი ძალიან დაბალია. ფასი მეტი რომ იყოს, უკეთესია. ზუგდიდში 2 ლარი და 60 თეთრია. მე სოფელ კახათში ვცხოვრობ და იქ თხილის ფასი 5 თეთრით მეტია, ალბათ ხლხი რომ მიიზიდონ იმიტომ. ამბობენ, თხილის ფასი გაიზრდება, რადგან წელს ძალიან ცოტა არისო. ხალხს უჭირს და ამიტომ აბარებენ. რა ქნან, სოფელში ეს არის შემოსავალი“, – ამბობს სოფელ კახათის მკვიდრი, ნარგიზა ნაჭყებია.
„იქ, სადაც 800 კილო თხილი იყო, წელს მოვიდა 200 კილო, არ ვიცი, მატლების ბრალია, თუ ამინდის... ძალიან ცუდი შემოსავალი გვაქვს. ფასის გაზრდას არ ველოდები. უკვე ჩავაბარე თხილი“, – ამბობს სოფელ ინგირში მცხოვრები ვენერა კვარაცხელია.
ზუგდიდის ბაზართან შედარებით თხილის ფასი გაცილებით დაბალია ოკუპირებულ აფხაზეთში. „ლაივპრესს“ გალის რაიონის სოფლებში მიმავალმა მგზავრებმა ზუგდიდში უთხრეს, რომ გალში 1 კილოგრამი თხილის ფასი 40 თეთრით ნაკლებია, ვიდრე ზუგდიდში. მგზავრების თქმით, მიუხედავად სურვილისა, ზუგდიდში თხილის გადმოტანას ვერ ახერხებენ, რადგან ე.წ–ლ საზღვარზე ტვირთზე გადასახადი მაღალია.
„არის გამონაკლისი, იმ მგზავრებს, ვისაც საზღვარზე ნაცნობები ყავთ, შესაძლოა თხილი გვიან ღამით, ჩუმად გადმოატანინონ, ისე უფლება არ გვაქვს, რომ გადმოვიტანოთ. თუ ცოტა გადმოვიტანეთ, ბევრი ფული უნდა გადავიხადოთ. ჩვენ ამდენი არ გვაქვს. საზღვართან აფხაზები დგანან და ერთ ტომარა თხილზე საშუალოდ 200 რუსულ რუბლს გვახდევინებენ, ისიც თუ იკმარეს. იქ ბაზარში აფხაზები არიან და ისინი იბარებენ, თუ სახლში დაიბარებ, მოვლენ და წაიღებენ, მაგრამ აქაურ და იქაურ ფასს ერთმანეთს ვერ შეადარებ“, – უთხრეს „ლაივპრესს“ გალის რაიონში მიმავალმა მგზავრებმა.
ზუგდიდში თხილის მიმღები ერთ–ერთი პუნქტის თანამშრომელი მანანა უბალავა ამბობს, რომ თხილის ფასი იანვრამდე გაიზრდება.
„ახლა ვინც თხილს აბარებს, მართლა უჭირს ეკონომიურად. ყველამ იცის, რომ იანვრამდე თხილის ფასი გაიზრდება, მაგრამ ფული რომ ჰქონდეთ, იანვარს დაელოდებოდნენ“, –განმრტავს მანანა უბილავა.
თხილის მიმღებ პუნქტებში „ლაივპრესს“ უთხრეს, რომ ზუგდიდში არსებული 4 დიდი და რამდენიმე მცირე თხილის ქარხნიდან ამ ეტაპზე მხოლოდ ნაწილი მუშაობს აქტიურად, რადგან მიმღები პუნქტები ქარხნებში თხილის ჩაბარებას, პროდუქტზე ფასის გაზრდის შემდეგ აპირებენ.