კომენტარი
ქართული სახელმწიფო სხვა გზას არ გვიტოვებს გარდა ერთისა, ვთხოვოთ რუსეთს სამხედრო დახმარება - ინტერვიუ იური ღვინჯილიასთან [Video]
FaceBook Twitter
E-mail Print

ზუგდიდში საზოგადოების ნაწილი მეგრულისთვის რეგიონული ენის სტატუსის მინიჭებას ითხოვს. მათ შორის განსაკუთრებული აქტიურობით სოციალურ ქსელებში განათლების ცენტრ „კოლხიდას“ ხელმძღვანელი იური ღვინჯილია გამოირჩევა. „ლაივპრესი“ გთავაზობთ ინტერვიუს, სადაც ის საუბრობს მიზეზებზე, რა არის მათი მოთხოვნის საფუძველი, რა აფერხებს ამ საკითხის სახელმწიფოებრივ დონეზე განხილვას და რას შეიძლება ველოდოთ, თუკი თემის იგნორირება მომავალშიც გაგრძელდება.

„ლაივპრესი“: თქვენ ქალაქ ზუგდიდის საკრებულოს მიმართეთ კითხვით, არის თუ არა გათვალისწინებული 2015 წლის ბიუჯეტში სახსრები მეგრული ენის განვითარების კუთხით. ახსენეთ გარკვეული პროექტების დაფინანსება. რას ითხოვთ კონკრეტულად? როგორ უნდა შეუწყოს ხელი ადგილობრივ დონეზე ხელისუფლებამ მეგრული ენის განვითარებას?

 

 

იური ღვინჯილია: ადგილობრივი რესურსით რა თქმა უნდა ეს საკითხი ვერ გადაწყდება. პირველი ამოცანა არის ამ ენების აღიარება. საუბარია ლაზურ-მეგრულ-სვანურ ენაზე. სახელმწიფომ უნდა აიღოს იურიდიული ვალდებულება, რომ უზრუნველყოფს ამ ენების შენარჩუნება-განვითარებას, და მოქალაქეს ექნება უფლება, გამოიყენოს ეს ენა შეზღუდვის გარეშე, საზოგადოებრივ და პირად ცხოვრებაში.


„ლაივპრესი“: ხელისუფლებამ რა შეიძლება გაითვალისწინოს ადგილობრივ ბიუჯეტში? რა პროექტები შეიძლება დაფინანსდეს?

 

იური ღვინჯილია: ჩვენი ამოცანა არის ენის პოპულარიზაცია. როგორც ასეთი, ენის ცოდნის პრობლემა შეიძლება არ იყოს ასე მწვავედ, მაგრამ, პოპულარიზაციისთვის ძალიან მარტივი რამის გაკეთება შეიძლება. ეს შეიძლება იყოს მიკროპროექტები, აუდიო-ვიდეო პროდუქციის სახით. შეიძლება ჩვენ კომედი შოუ გავაკეთოთ მეგრულ ენაზე, შეიძლება ფილმების თარგმნა, შეიძლება პოეზიის აუდიოფაილების გაკეთება, მუსიკალური კლიპების და ასე შემდეგ. საუბარია თანამედროვე ტექნოლოგიების გამოყენებაზე.

 

„ლაივპრესი“: უნდა დაიფაროს სამეგრელოს რეგიონი თუ უფრო დიდ მასშტაბებზეა საუბარი?

 

იური ღვინჯილია: ჩვენ მეგრული ენის გამოყენებით შეიძლება კულტურულ-ენობრივი ექსპორტი განვახორციელოთ აფხაზეთის ტერიტორიაზე და ლაზეთის ტერიტორიაზე თურქეთში. ეს კომუნიკაციის ახალი საშუალებაა, რაც არ არის გამოყენებული. მეგრულ ენაზე ძალიან ბევრი მეცნიერი მუშაობს. მაგალითად, ჩვენ ვიცით მამანტი ძაძამია, ედემ იზორია და მრავალი სხვა. ამის პრობლემა არ იქნება, მთავარია პოლიტიკური ნება.

 

„ლაივპრესი“: თქვენ ითხოვთ მეგრული ენისთვის რეგიონული ენის სტატუსის მინიჭების შესახებ. რა არის ამის საფუძველი? რატომ არ კეთდება როგორ ფიქრობთ დღეს ეს?

 

იური ღვინჯილია: არსებობს ენის სტატუსის ორი ფორმა. ან სახელმწიფო ენა უნდა იყოს, ან რეგიონული. მეგრული ენა გამოიყენება სამეგრელოს რეგიონში, შესაბამისად არის რეგიონული ენა. საუბარია იურიდიულ-პოლიტიკურ ვალდებულებაზე სახელმწიფოს მხრიდან. სახელმწიფომ უნდა აღიაროს, რომ მეგრული ენა არსებობს და აიღოს პასუხისმგებლობა მის განვითარებაზე. ეს მარტივი ამოცანაა.

 

„ლაივპრესი“: ვინ ეწინააღმდეგება ამას, შეგიძლიათ დამისახელოთ?

 

იური ღვინჯილია: ამ საკითხის მოწინააღმდეგეები არიან პირველ რიგში საპატრიარქო და მის გარშემო არსებული პრორუსული ძალები, რომლებიც ყველანაირი რეფორმების წინააღმდეგ გამოდიან. არამარტო ამ საკითხში, სხვა რეფორმაც არ განხორციელდება. დღემდე არ არის მაგალითად მიღებული ლუსტრაციის კანონი, ანუ ჯერ საბჭოთა მემკვიდრეობაზე უარი არ გვითქვია.

 

„ლაივპრესი“: პრორუსული ძალები ახსენეთ საპატრიარქოს უკან. ვის გულისხმობთ?

 

იური ღვინჯილია: ნებისმიერი, ყველა. კონკრეტულად მათ, ვინც არის ქარტიის რატიფიცირების წინააღმდეგი.

 

„ლაივპრესი“: თქვენ ამბობთ, რომ რუსეთს არ აწყობს, რომ...

 

იური ღვინჯილია: რუსეთს არ აწყობს, რომ ეს საკითხი იყოს მოგვარებული, მოწესრიგებული, მუდმივად იყოს მანიპულაციის და შანტაჟის საშუალება.

 

„ლაივპრესი“: რუსეთს არ აწყობს, რომ სამეგრელო, მაგალითად პოლიტიკურად დამოუკიდებელი ერთეული იყოს?

 

იური ღვინჯილია: თუ სამეგრელო იქნება პოლიტიკურად დამოუკიდებელი ერთეული, ანუ ავტონომიის სახით, მაშინ მას აქვს ტერიტორიული პრეტენზიები. ისტორიულად ჩვენ ვიცით, რომ გალი და ოჩამჩირე იყო სამეგრელოს სამთავროს ტერიტორია. შესაბამისად, იქ მყოფი სამხედრო ბაზები მათივე არგუმენტებით, იმყოფებიან უკანონოდ. ამის გარდა, ჩვენ ვიცით, რომ აფხაზეთის ტერიტორიაზე მცხოვრები მოსახლეობის ნახევარი არის ეთნიკურად მეგრელი. თვით აფხაზების ეთნიკური შემადგენლობა არის ნახევრად მეგრული, შერეული ოჯახები არის. ანუ, მეგრული ფაქტორი არის პირდაპირ კავშირი აფხაზებთან ურთიერთობის აღდგენის. სამეგრელოს ტერიტორიაზე უკვე არსებობს რუსული მეხუთე კოლონა, ეს არის მოძრაობა „სამეგრელო“, რომლის დამფუძნებელიც არის ალექსანდრე ჭაჭია. ეს სიახლე არ არის. რუსეთი ამ მიმართულებით მუშაობს, მაგრამ ეს თემა არის გამოყენებული სხვა მიმართულებით. ანუ, ქართველებთან დაპირისპირების საშუალება არის. ანუ არსებობენ ბოროტი ქართველები, რომლებიც არ აძლევენ მეგრელებს თავიანთი თვითმყოფადობის შენარჩუნება-განვითარების საშუალებას. ეს არის მარტივი სქემა.

 

„ლაივპრესი“: ცოტა მოგვიანებით მინდოდა დამესვა კითხვა მოძრაობა „სამეგრელოსთან“ დაკავშირებით. მაგრამ, რადგან ახსენეთ, აქვე გკითხავთ. გავეცანი თქვენი და ბატონ ზურაბ კვარაცხელიას კომენტარებს. თანხმდებით, რომ მეგრული ენა უნდა განვითარდეს, რომ სახელმწიფომ უნდა იზრუნოს ამ მიმართულებით, თუმცა ის თქვენ რუსეთის აგენტს გიწოდებთ და პირიქით. რაზე ვერ თანხმდებით, რამ გამოიწვია ეს დაპირისპირება? ვინ დგას თქვენს უკან, თუ დგას ვინმე?

 

იური ღვინჯილია: ჩემს უკან არავინ არ დგას. იცით რა, დაფინანსების და მხარდაჭერის საკითხი ყოველთვის ჩანს, ან ფინანსურად, ან პოლიტიკური მხარდაჭერით, საინფორმაციო საშუალებებით. მე ვიძახი, რომ მეგრული ენის პრობლემის გადაწყვეტა შესაძლებელია ძალიან მარტივად - ღია დისკუსიით საზოგადოებასთან. ჩვენ მოვაწყვეთ შვიდი შეხვედრა დემოკრატიული ჩართულობის ცენტრში. ყველა შეხვედრა იყო ღია. არის მეორე, მათი ვარიანტი. რაღაც სექტანტური ტიპის ორგანიზაციაა, რომელიც არსად არ ჩანს, რომლებიც სულ სხვა მიმართულებით მუშაობენ. თქვენ შეგიძლიათ გადახედოთ გაზეთ „ილორს“ და დარწმუნდებით, რომ მეგრული თემატიკა არის უბრალოდ პლაცდარმი, იდეოლოგიური პლაცდარმი, და მიდის მიმართულება - ანტიდასავლური პროპაგანდა. რამდენიმე ადამიანს ეხმარებიან, დააფინანსებენ, წიგნის გამოცემაში, სხვადასხვა რამეში და ამით არის ამოწურული მათი საქმიანობა. ანტიდასავლური ნიშნავს, ცუდები არიან ევროპელები და..

 

„ლაივპრესი“: ანუ რუსეთის ინტერესებს ემსახურება ეს ორგანიზაცია?

 

იური ღვინჯილია: რუსეთის ინტერესებს პირდაპირ ემსახურებიან. ალექსანდრე ჭაჭია ორჯერ დააჯილდოვა პუტინმა და ეს ცნობილი ფაქტია.

 

„ლაივპრესი“: მაშინ ასე დავსვამ კითხვას, რისი მიღწევა უნდა სამეგრელოში რუსეთს ამ ორგანიზაციის ხელით?

 

იური ღვინჯილია: პოლიტიკური ნიშა ყველა არის დაკავებული. სხვადასხვა პარტიები არსებობენ, სხვადასხვა იდეოლოგია არსებობს და მუშაობენ სხვადასხვა მიმართულებით. ეს არის მეგრული თემატიკა. ანუ, მეგრელების ორგანიზება და მეგრელების გამოყენება, რისთვის, როდის და როგორ, ეს ალბათ გამოჩნდება.

 

„ლაივპრესი“: არის ბრალდებები, რომ თქვენს უკან დგას რუსეთი. ამაზე რას გვეტყვით?

 

იური ღვინჯილია: ჩემს უკან ჯერ იდგა აფხაზეთი, მერე რუსეთი, თურქეთი, ამერიკა და არ ვიცი ახლა, ჩამონათვალი ძალიან დიდია და ყველას დავალიანება აქვს, ყველამ შემიწყვიტა დაფინანსება.

 

„ლაივპრესი“: ვინმესთან თუ გქონიათ მეგრული ენისთვის რეგიონული ენის სტატუსის მინიჭებასთან დაკავშირებით საუბარი, ვგულისხმობ კომპეტენტურ ორგანოებს, გადაწყვეტილებების მიმღებ პირებს. აუხსენით რა გნებავთ, რა პასუხი მიიღეთ?

 

იური ღვინჯილია: „ნაციონალური მოძრაობის“ დროს, ძველი ხელისუფლების დროს გვქონდა სახალხო დამცველთან, მის აპარატთან, ევროპის ეთნიკური საბჭო არის თბილისში, სხვადასხვა უწყებასთან, მაგრამ როგორც ასეთი, კონკრეტული არაფერი. ყველა მხრიდან არის იგნორირებული ეს საკითხი. პასუხი მივიღე ყველგან - ზუგდიდის საკრებულო, გუბერნიიდან, მაგრამ ყველა ჩივის ფინანსების არარსებობაზე. შექმნილია კომისია რეგიონულ ენებთან დაკავშირებით. იქ მეგრული საკითხი საერთოდ არ განიხილება. ეს არის ახალი ინფორმაცია.

 

„ლაივპრესი“: როდის შეიქმნა ეს კომისია?

 

იური ღვინჯილია: ამ დღეებში.

 

„ლაივპრესი“: თქვენ გქონდათ შეხება ზაქარეიშვილის უწყებასთან?

 

იური ღვინჯილია: ზაქარეიშვილთან მქონდა ერთი შეხვედრა სანამ არ იყო მინისტრი. ბევრი რამე დამპირდა, მაგრამ...ეს არის პოლიტიკური ნების საკითხი.

 

„ლაივპრესი“: საზოგადოების ნაწილს მიაჩნია, რომ თქვენი მოთხოვნა მეგრული ენისთვის რეგიონული ენის სტატუსის მინიჭების თაობაზე ატარებს გარკვეული სეპარატიზმის ნიშნებს და ეწინააღმდეგება ერთიანი საქართველოს იდეას. თქვენ რას იტყოდით ამასთან დაკავშირებით, რატომ ჩნდება ეს კითხვის ნიშნები?

 

იური ღვინჯილია: სეპარატიზმი ნიშნავს გამოყოფას. ჩემი პოზიცია არის მარტივი და გასაგები. ჩვენ ყველამ ერთად უნდა მოვახერხოთ ამ ენის შენარჩუნება-განვითარება. ჩვენ უნდა განვავითაროთ თვითმმართველობა. მე მგონი, ეს მისაღები პოზიცია უნდა იყოს. თანაც ეს არის ღიად. ეს არ არის ფარული საქმიანობა.

 

„ლაივპრესი“: თქვენ წერთ, რომ სამეგრელო და ზუგდიდი მზად არის რევოლუციისთვის და აქციები უნდა დაიწყოს ამ მიმართულებით. რას გვეტყოდით ამასთან დაკავშირებით? რამდენად რეალურია აქციების თემა?

 

იური ღვინჯილია: ნებისმიერ შემთხვევაში იგნორირება იწვევს კონფლიქტს. ხალხთა ლინგვისტური და ისტორიული მეხსიერების შეურაცხყოფა არის ეთნოკონფლიქტის წინაპირობა.

 

„ლაივპრესი“: რამდენად რეალურია ეს აქციები?

 

იური ღვინჯილია: თუ ექნება ამ იდეას პოლიტიკური მხარდაჭერა, ეს ნებისმიერ შემთხვევაში შეიძლება მოხდეს, ნებისმიერ დროს უფრო სწორად.

 

„ლაივპრესი“: ვინ შეიძლება დაიწყოს ეს აქციები, ვის შეიძლება თქვენ დაეყრდნოთ?

 

იური ღვინჯილია: კარგით, ჩამოვაყალიბოთ სხვანაირად. ჩვენ ვთხოვთ ქართულ სახელმწიფოს, არ გვაქცევს ყურადღებას, იგნორირებულია ეს საკითხი. ჩემზე ხომ არ არის მარტო საუბარი. მე მარტო ხომ არ ვითხოვ ამას. თქვენ არ ითხოვთ ამას? თქვენ არ გინდათ ენის შენარჩუნება? ენობრივი მემკვიდრეობის შენარჩუნება არის სახელმწიფოს საქმე. ეს არ არის ჩემი საქმე. თუ ქართული სახელმწიფო უარს ამბობს, არ აღიარებს ამ ენებს, არ უნდა ამ ენების შენარჩუნება, ეს არის კულტურული გენოციდის ერთ-ერთი ფორმა. არის მეორე ვარიანტი. ვთქვათ ჩვენ ვთხოვეთ რუსეთს სამხედრო დახმარება. თქვენი აზრით, დაგვეხმარება თუ არა რუსეთი? ანუ აფხაზური სცენარი მეორდება. იგივე მეორდება. იმის ნაცვლად, რომ ჩვენ მოვაგვაროთ არსებული პრობლემები ერთხელ და სამუდამოდ, არის მუდმივი დაპირისპირება.

 

„ლაივპრესი“: თქვენ უშვებთ შესაძლებლობას, რომ...

 

იური ღვინჯილია: არა, სხვა გზას არ გვიტოვებენ. ქართული სახელმწიფო სხვა გზას არ გვიტოვებს გარდა ერთისა, ვთხოვოთ რუსეთს სამხედრო დახმარება.

 

„ლაივპრესი“: თქვენ წერთ, რომ წინააღმდეგ შემთხვევაში სამეგრელო საქართველოს შემადგენლობიდან უნდა გავიდეს..

 

იური ღვინჯილია: უნდა გავიდეს რა თქმა უნდა, თუ სხვა გამოსავალი არ დაგვიტოვეს, გავალთ, აბა რა იქნება.

 

„ლაივპრესი“: თანამოაზრეებზე რას გვეტყვით? ვინ არიან ისინი?

 

იური ღვინჯილია: მე არ მჭირდება თანამოაზრეობა..

 

„ლაივპრესი“: თქვენ წერთ, რომ საქართველო სხვა გზას არ უტოვებს სამეგრელოს იმის გადრა, რომ რუსეთს სამხედრო დახმარების თხოვნით მიმართოს. ეს რაღაც დესტაბილიზაციის მიმანიშნებელი ხომ არ არის?

 

იური ღვინჯილია: ლინგვისტური და ისტორიული მეხსიერების შეურაცხყოფა ეთნოკონფლიქტის წინაპირობა არის.

 

„ლაივპრესი“: ვინ შეიძლება დაიწყოს ეს მოთხოვნები? აქციები, მიმართვა რუსეთისადმი? ვინ შეიძლება აგყვეთ?

 

იური ღვინჯილია: ვისაც გაუჩნდება პოლიტიკური ინტერესი. მოვა ალბათ დრო და გააკეთებენ რაღაცას. არ გაკეთებულა მსგავსი? ეს აპრობირებული სქემა არის. ეს არ არის სიახლე. ასე ხდება ეთნოკონფლიქტების პროვოცირება. არსებობს ერთი მხარე, მჩაგვრელი და მეორე მხარე დაჩაგრული. მე ვიძახი, რომ არის გამოსავალი. უნდა ყველამ ერთად მოვძებნოთ გამოსავალი.

 

„ლაივპრესი“: თქვენ მარტო ხართ ამ განცხადებებში? ბევრი მხარდამჭერი გყავთ? ის, ვინც თქვენ თუ წამოიწყებთ აქციების თემაზე საუბარს, გამოგყვებათ. ჩვეულებრივ მოქალაქეებს ვგულისხმობ და არა ვიღაც მესამე ძალას. იგივე ზუგდიდელებს.

 

იური ღვინჯილია: რომ იყოს, როგორ უნდა ვთქვა, სახელები და გვარები დავასახელო?

 

„ლაივპრესი“: სახელ და გვარს არ გთხოვთ, არიან? და რამდენი არიან?

 

იური ღვინჯილია: ასე არ გამოვა ამაზე პასუხი...ადრე, მეგრულ ენაზე, როგორც მეგრულ ენაზე რთული იყო საუბარი. დღეს ჩვენ უკვე გამოყოფაზე ვსაუბრობთ და ამას მივეჩვიეთ. ეს ჩვეულებრივი რაღაცა გახდა, ხომ? თქვენ არ გიკვირთ, რომ ამაზე საუბრობთ?

 

„ლაივპრესი“: საქართველოს სახელმწიფო მოწყობის როგორ ფორმას ემხრობით თქვენ?

 

იური ღვინჯილია: საქართველო ისტორიულად ყოველთვის იყო ფედერალური სახელმწიფო. სამეგრელოს ისტორიულად ყოველთვის ქონდა ისტორიული სტატუსი. არსებობს საერთაშორისო დოკუმენტები, რომლებიც ამას ადასტურებენ.

 

„ლაივპრესი“: დღეს რა შეიძლება იყოს საუკეთესო გამოსავალი არსებულ პოლიტიკურ სიტუაციაში, იგივე აფხაზების და ოსების ფაქტორის გათვალისწინებით?

 

იური ღვინჯილია: ყველაზე საუკეთესო გამოსავალი არის თვითმმართველობის განვითარება. ლაზური, მეგრული, სვანური ენების აღიარება. ეს არის მუდმივი სტაბილურობის წინაპირობა. რაც უფრო ვშორდებით მეგრული ენის აღიარებას, მით უფრო მივუახლოვდებით სახელმწიფოს დაშლას.

 

„ლაივპრესი“: დღესაც ფედერალური მოწყობის უნდა იყოს საქართველო?

 

იური ღვინჯილია: დიახ, რა თქმა უნდა.

 

„ლაივპრესი“: სამეგრელო რა სტატუსით უნდა იყოს საქართველოს შემადგენლობაში?

 

იური ღვინჯილია: მაგალითად როგორიც ექნება აფხაზეთს. ეს უკვე დეტალებია. ამაზე შეგვიძლია მერე ვილაპარაკოთ. სამეგრელოს ავტონომიური რესპუბლიკის სახით, როგორიც არის აჭარა. ავტონომია არის აღიარებული თვითმმართველობის ფორმა.

 

„ლაივპრესი“: განათლების ცენტრი „კოლხიდა“, ასე ქვია თქვენს ორგანიზაციას. რამდენი წევრია ამ ორგანიზაციაში?

 

იური ღვინჯილია: არ არის ბევრი, თითქმის დაშლილია.

 

„ლაივპრესი“: რატომ?

 

იური ღვინჯილია: საკითხი არის იგნორირებული და სხვანაირად არ გამოვა.

 

„ლაივპრესი“: გაფინანსებდათ ვინმე, თუ მოხალისეების დონეზე იყავით?

 

იური ღვინჯილია: არა, მოხალისეების დონეზე. ამ თემატიკის პოპულარიზაცია იყო ჩვენი მიზანი.

 

„ლაივპრესი“: გამოგივიდათ, როგორ ფიქრობთ?

 

იური ღვინჯილია: რა თქმა უნდა, ხომ ვსაუბრობთ? ყველა იდეას აქვს თავისი ეტაპი. პირველი - შეიძლება გაუკვირდეს ვინმეს, მეორე - მიაქციოს ყურადღბა, მესამე ეტაპი არის აღიარება.

 

„ლაივპრესი“: სოციალურ ქსელებში წავაწყდი თქვენს მიმართ ბრალდებებს - თურქეთთან შესაძლო კავშირი. რა კავშირები გაქვთ თურქეთთან? მომისმენია არაერთგზის, რომ იქ ხშირად ჩადიხართ. არის თუ არა ეს ასე? ვის ხვდებით, რა თემებზე საუბრობთ?

 

იური ღვინჯილია: ჩვენ საერთოდ ამ პოლიტიკურ არეულობაში ლაზების არსებობა. თურქეთის ტერიტორიაზე არიან ჩვენი ძმები. სხვათაშორის, საქართველოს ხელისუფლებისგან განსხვავებით, თურქეთში დაწყებით კლასებში არის განათლება ლაზურ ენაზე, გამოიცემა ლიტერატურა, არის გაზეთიც. არის ლაზური უნივერსიტეტი. იყო ტელევიზიის საწყისი მაუწყებლობა. ანუ, ლაზები მუშაობენ ჩვენგან განსხვავებით.

 

„ლაივპრესი“: თურქეთში ხშირად ჩადიხართ?

 

იური ღვინჯილია: არა, ხშირად არა, მაგრამ ხანდახან.

 

„ლაივპრესი“: ლაზებს ხვდებით იქ?

 

იური ღვინჯილია: ნუ, ვის ვხვდები, შეგვიძლია ერთად წავიდეთ.

 

„ლაივპრესი“: იყო მოსაზრება, რომ თითქოს თურქეთიდან ფინანსდებით, რომ მხარდაჭერა გაქვთ. არის თუ არა ეს ასე?

 

იური ღვინჯილია: დაფინანსება ყოველთვის ჩანს, რაღაც საქმიანობაში. ამას ვერ დამალავს ადამიანი.

 

„ლაივპრესი“: სკოლებში სწავლება როგორ უნდა წარიმართოს მეგრულ ენაზე? რომელი კლასიდან..გაქვთ მოსაზრება ამ საკითხზე?

 

იური ღვინჯილია: ჯერ არ არსებობს პოლიტიკური ნება. შესაბამისად, ნებისმიერი იდეა არის იგნორირებული. ამიტომ, აზრი არ აქვს ამ თემაზე საუბარს საერთოდ.

 

„ლაივპრესი“: მაგრამ ყოველდღიურად მაინც საუბრობთ ამ თემის ირგვლივ. რას აპირებთ მომავალში?

 

იური ღვინჯილია: ეს ავადმყოფობად გადამექცა უკვე. არაფერს არ ვაპირებ. რა უნდა დავაპირო?

 

„ლაივპრესი“: ანუ აპირებთ ასევე აქტიურად ამ საკითხზე საუბარს?

 

იური ღვინჯილია: დავიღალე უკვე...

 

„ლაივპრესი“: ორგანიზაცია „სამეგრელოს“ თქვენგან განსხვავებით პოლიტიკურ დამოუკიდებლობაზე რა აზრი აქვს? აქ ემთხვევა თქვენი მოსაზრებები ერთმანეთს?

 

იური ღვინჯილია: ამაშია მთელი მუღამი, რომ იტყვიან. არ ჩანს, აი ძირითადი არსი არ ჩანს, რა უნდა ამ ხალხს. თქვენ ხომ არ იცით რა უნდათ? მათი საქმიანობა არის მალული. სექტანტური რაღაცა. ვერ შეხვალ იქ, იმათ საზოგადოებაში. ბევრი ხანია ერთმანეთს იცნობენ.

 

„ლაივპრესი“: საბოლოოდ რა მიზანს ემსახურება როგორ ფიქრობთ „სამეგრელო“?

 

იური ღვინჯილია: რუსეთის ამოცანა ყოველთვის არის თბილისი და არა რეგიონები. აფხაზეთი შეიძლება განსხვავებული რამე იყოს. რა ინტერესი აქვს რუსეთს, რომ სამეგრელოში რაღაც მოაწყოს? რაში სჭირდება? რუსეთს სჭირდება თბილისი.

 

„ლაივპრესი“: მაშინ რატომ აფინანსებს?

 

იური ღვინჯილია: პოლიტიკური აქტიურობა..მეგრელები აქტიურები არიან პოლიტიკაში და ამ თემატიკით ხდება გარკვეული ელექტორატის მობილიზება.

 

„ლაივპრესი“: მაქსიმუმ რას შეიძლება რუსეთმა ამით მიაღწიოს?

 

იური ღვინჯილია: როგორც ასეთი, ისინი ალბათ ვერაფერს ვერ მიაღწევენ, მათი მენტალიტეტი იმდენად მოძველებულია, ვერ იმუშავებს, მაგრამ მაინც რაღაც პრობლემას ქმნიან.

 

„ლაივპრესი“: ძველ ჩანაწერში მოვისმინე თქვენი ასეთი ფრაზა - მე არ ვარ ქართველი, მე ვარ მეგრელი. ეს რატომ თქვით?

 

იური ღვინჯილია: ქართველი არის პოლიტიკური სტატუსი მოქალაქის და არა ეთნიკური. ეთნიკურად მეგრელი შეიძლება იყო, მაგრამ ეთნიკურად ქართველი ბუნებაში არ არსებობს. ვთქვათ შეეცვალა სახელწოდება სახელმწიფოს, ეთნიკური იცვლება? ვთქვათ იბერიად გადაიქცა, ვინ ვიქნებით მაშინ, ქართველები თუ იბერიელები? ვერ ჩამოყალიბდა ვერც გამაერთიანებელ სახელწოდებად და პოლიტიკად..აი ჩვენ გვაქვს საქმე ერთ ეთნიკურ ჯგუფთან..წარმოიდგინეთ სიტუაცია, ნებართვა ვის უნდა ვთხოვოთ, სახელმწიფო არ გვაძლევს უფლებას. სახელმწიფო ვინ არის, ისინი არიან, ჩვენ ხომ არ ვართ, ჩვენი ინტერესები ხომ არ არის გათვალისწინებული.

 

„ლაივპრესი“: როგორ ფიქრობთ, რამდენი ეთნიკური ჯგუფია საქართველოში?

 

იური ღვინჯილია: ლაზები, მეგრელები, სვანები, ქართები ძირითადად.

 

„ლაივპრესი“: ქართველი ვინ არის?

 

იური ღვინჯილია: ქართველი არის, ყველა ჩვენ ერთად ვართ, ეს არის ჩვენი პოლიტიკური მდგომარეობა. სახელმწიფოს სახელწოდებიდან გამომდინარე. ჩვენ საქართლეში ხომ არ ვცხოვრობთ? ეს ტერმინი არის ახალი.

 

„ლაივპრესი“: ზოგადად აქციები ვიღაცის მიერ არის მართული. ამ შემთხვევაში ვინ შეიძლება იდგეს ამ აქციების უკან? ვინ უნდა დაუჭიროს მეგრელს მხარი, თუნდაც მატერიალურად, რომ ეს განხორციელდეს?

 

იური ღვინჯილია: მეგრელებს არავინ არ დაუჭერს მხარს. მეგრულის პრობლემა მხოლოდ მეგრელების გადასაწყვეტია. სხვა ამაზე არ წავა, იმიტომ, რომ არცერთ ინტერესში ეს არ შედის. არც რუსეთის ინტერესშია, არც აფხაზების ინტერესშია, არც თურქეთის, არც საქართველოს ინტერესში. მცდარი ის არის, რომ თითქოს რუსეთას უნდა ეს. მანამდე ეს გაკეთებული იქნებოდა. საზღვარი იქნებოდა ცხენისწყალთან. ერთ საათში შეიძლება სამეგრელო გახდეს დამოუკიდებელი. გალიდან გადმოვლენ ტანკები და დადგებიან.

 

„ლაივპრესი“: ეგ დამოუკიდებლობა როგორ იქნება, თუ ტანკები ჩადგებიან?

 

იური ღვინჯილია: ეს დეტალებია უკვე. მერე მოწესრიგდება ყველაფერი. მდგომარეობა ასე შეიძლება შეიცვალოს. ხომ არავინ ელოდა, რომ ყირიმს დაკარგავდა უკრაინა? ამაზე ლაპარაკიც ხომ არ იყო საერთოდ? ერთ თვეში მოხდა ეს. მე უბრალოდ ვლაპარაკობ, რომ აი წარმოიდგინეთ, გადავიდნენ რუსები და დადგნენ იქ. მოაწყვეს რაღაცა პროვოკაცია, ააფეთქეს რაღაცა და თქვეს, რომ ტერორისტული ჯგუფი მოქმედებს სამეგრელოს ტერიტორიაზე. გადმოვიდნენ ამ საბაბით და დარჩნენ აქ. გამოჩნდება ათი ადამიანი, მოითხოვენ დამოუკიდებლობას და ამით ამოიწურება ეს პრობლემა. ასე იყო ეს ისტორიულად. ასე მოხდა. ამის გამეორება რა პრობლემაა? თქვენ გაქვთ იმის გარანტია, რომ ეს ასე არ იქნება?

Print E-mail
Twitter
სხვა მასალები
ამერიკის შეერთებული შტატების ელჩი, კელი დეგნანი
სამეგრელო-ზემო სვანეთის რეგიონს სტუმრობდა,
12:31 / 20.07.2022
ამერიკის შეერთებული შტატების ელჩი, კელი დეგნანი სამეგრელო-ზემო სვანეთის რეგიონს სტუმრობდა,
სამეგრელოს ის მუნიციპალიტეტები, სადაც ადგილობრივი
თვითმმართველობის არჩევნების შემდეგ, საკრებულოებში
21:06 / 05.02.2022
სამეგრელოს ის მუნიციპალიტეტები, სადაც ადგილობრივი თვითმმართველობის არჩევნების შემდეგ, საკრებულოებში
გრიპის მოახლოებული სეზონი, ვაქცინაციის საგანგაშოდ
დაბალი მაჩვენებელი და მეხუთე
15:10 / 14.10.2021
გრიპის მოახლოებული სეზონი, ვაქცინაციის საგანგაშოდ დაბალი მაჩვენებელი და მეხუთე
აფხაზეთში, დანარჩენი საქართველოს მსგავსად, რთული
ეპიდემიოლოგიური ვითარებაა.
09:21 / 03.09.2021
აფხაზეთში, დანარჩენი საქართველოს მსგავსად, რთული ეპიდემიოლოგიური ვითარებაა.
კორონავირუსი

საბჭოთა რეპრესიები

ვიდეო
პატარა “სანტები” თანატოლების დასახმარებლად [ვიდეო]
საღამოს ექვსი საათია. ბავშვები საკლასო ოთახში შეკრებილან და საახალწლო სათამაშოებს ამზადებენ. ზოგი თექას
ისევ მშივრები, ისევ ქუჩაში - მოქალაქეთა აქტივიზმით გადარჩენილი სიცოცხლეები [ვიდეო]
მიუსაფარ ძაღლებს ზუგდიდის ქუჩებში თითქმის ყოველ ნაბიჯზე ნახავთ. პარკებსა და სკვერებში, კვების ობიექტებთან,
პირველი მეგრულენოვანი ანიმაცია - ხობელი ანიმატორის სტუდია დიდი გეგმებით [ვიდეო]
ძუკუ დელფინია და კოღონა გაბისკირია, პირველი მეგრულენოვანი ანიმაციური სერიალის პერსონაჟები არიან. მათზე
სკოლის ნათხოვარ შენობაში დაწყებული ჩხოროწყუელი მოსწავლეების ბრძოლა უკეთესი გარემოსთვის [ვიდეო]
ჩვენ არ გვაქვს სხვა პლანეტა, - ამბობენ ჩხოროწყუელი მოსწავლეები და გარემოს გადასარჩენად ერთიანდებიან.
მდინარე ჯუმისგან მიტაცებული მიწები და სამანქანე გზა - დარჩელელები აქციებით იმუქრებიან [ვიდეო]
ზუგდიდის სოფელ დარჩელში, კიროვის უბანში, ძლიერი წვიმების დროს მდინარე ჯუმი დიდდება, კალაპოტიდან
ფოტო
სკოლაში პირბადით - სწავლა საკლასო ოთახებში განახლდა [ფოტო]
დღეს, 4 ოქტომბერს სასწავლო პროცესი, რომელიც პანდემიის
ვაქცინაცია ავტობუსში [ფოტო]
ზუგდიდის მუნიციპალიტეტის სოფლებსა და ქალაქში
„გვიხარია, რომ მოქალაქეები აქტიურობენ“ - ვაქცინაცია ზუგდიდში [ფოტო]
მოქალაქეთა საყოველთაო ვაქცინაცია ზუგდიდში გრძელდება.
"აქტიურობა მაღალია" - ზუგდიდში "ფაიზერით" ვაქცინაცია დაიწყო [ფოტო]
კორონავირუსის საწინააღმდეგო ამერიკული წარმოების "ფაიზერით"
3 თვე კოვიდტესტირების რეჟიმში - ფოტორეპორტაჟი ენგურის ხიდიდან
აფხაზეთ-სამეგრელოს საოკუპაციო ხაზთან, ენგურის ხიდზე,
მზარეულის მაგიდა
მწყრის ხარჩო მეფურად [ვიდეო]
ხარჩოს მოსამზადებლად დაგვჭირდება:
ხარკალია ლებია
ხარკალია, ძველი მეგრული კერძია,
მარწყვის პანაკოტა
უგემრიელესი დესერტი
ხაჭოს პასკა
ინგრედიენტები
                                     ლეჭკერე
ხულიშ ლეჭკერე - ეს არის ძველი
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.