„თავისუფალმა დემოკრატებმა“ დაიწყეს რაიონული ოფისების ამოქმედება სამეგრელოში. დღეს მათ ოფისი ზუგდიდში გახსნეს. მზადება პარლამენტის 2016 წლის არჩევნებისთვის, ახალი კადრები პარტიაში, გეგმები და ხედვა სხვადასხვა მიმართულებით, შედგა თუ არა რეალური დეცენტრალიზაცია თვითმმართველობის არჩევნების შემდეგ, რატომ დატოვეს „თავისუფალი დემოკრატების“ რიგები მისმა წევრებმა ხობსა და სენაკში, ამ თემებზე „ლაივპრესი“ ირაკლი ალასანიას ესაუბრა.

ლაივპრესი: ორი დღის წინ გახსენით ოფისი სენაკში, დღეს ზუგდიდში. ეს ნიშნავს თუ არა იმას, რომ დაიწყეთ უკვე პარლამენტის არჩევნებისთვის მზადება? რას გეგმავთ პარტიაში, იგეგმება თუ არა მისი განახლება, ახალი წევრების დამატება?

ირაკლი ალასანია: ჩვენ დღეს ზუგდიდში დავაარსეთ ზუგდიდის და რეგიონული ოფისი, ესეთ ხალხმრავალ და შთამბეჭდავ გარემოში იმიტომ, რომ ვთვლი, ჩვენი გამარჯვების ერთ-ერთი საყრდენი 2016 წელს იქნება სამეგრელო, იქნება ზუგდიდი. ამიტომ, ეს სამი დღეა ჩვენ პრაქტიკულად ჩხოროწყუში, მარტვილში, წალენჯიხაში ვხვდებით ჩვენს ამომრჩევლებს, ვხვდებით მოსახლეობას და ერთი რამ, რაც ყველასთვის გასაგებია, არის ის, რომ კონტაქტი დაკარგა ხელისუფლებამ ხალხთან, და ეს იმედგაცრუება სწორედ ამიტომაც არის ესეთი თვალსაჩინო. ადამიანებს განცდა აქვთ, რომ უპატრონოდ არიან დატოვებული. ჩვენი კავშირი, ჩვენი ურთიერთობა, ჩვენი ყოველდღიური შეხება საზოგადოებასთან და პრობლემების მოგვარების გზების ძიება იქნება ის, რაც გაგვამარჯვებინებს, და ეს ის არის, რაც ხალხს აკლია - სითბო, ხალხს აკლია სითბო, დამოკიდებულება. მე მაგალითად გული შემიწუხდა რომ ვნახე ზუგდიდის გამგეობასთან 78 წლის ქალბატონი 19 დღეა შიმშილობს, და მას წესიერად არავინ არ ეკონტაქტება და არავინ არ უხსნის იმ პრობლემას, რაც მას გააჩნია. ამიტომ, ეს ყველაფერი ჩვენი მხრიდან, „თავისუფალი დემოკრატების“ მხრიდან მიმართულია იმაზე, რომ ხალხმა ისევ ირწმუნოს პოლიტიკის, ხალხმა ისევ დაიწყოს რწმენის აღდგენა ხელისუფლებაში, რომ სხვანაირად, საარჩევნო გზით, მაგრამ სხვანაირად ქვეყნის წინ წაწევა წარმოუდგენელია. და დღეს ქვეყანა მიდის უკან. მაგალითად, გუშინ მე ვიყავი ჩასული ჯვარში და ვნახე პრობლემები, რომელიც სამი წლის წინ იყო, როდესაც იქ დავდიოდი. ის პრობლემები ისევ არის და კიდევ უფრო გაუარესდა მდგომარეობა. პენსიონერები მეუბნებიან, რომ 160 ლარიანი პენსიიდან 120 ლარი მინიმუმ მიდის წამლებზე. არაფერი არ გაუმჯობესებულა მათთვის, პირიქით, უფრო ნაკლები მყიდველუნარიანობა აქვს იმ პენსიას დოლარის და სავალუტო კრიზისის მერე ჩვენს ქვეყანაში. ამიტომ, ამ პრობლემებზე ვლაპარაკობთ, ინფრასტრუქტურის გაუმჯობესებაზე ვლაპარაკობთ და მგონია, რომ ის ეკონომიკური ხედვა, რომელიც შევქმენით, იქნება სწორედ მორგებული რეგიონებსა და რაიონებს. მაგალითად, ახალი სახეები ბრძანეთ თქვენ. ჩვენი ახალი სახეა ვასილ რევიშვილი, რომელიც ჩემთან ერთად იყო სოფლებში და მოსახლეობასთან შეხვედრისას. ის არის ეკონომიკური გუნდის ხელმძღვანელი, ის არის თავად ყოფილი ბიზნესის წარმომადგენელი, და ეხლაც მას ძალიან დიდი, მდიდარი გამოცდილება აქვს სწორედ სტარტტაპეფში, როგორ უნდა დაიწყოს ახალი ბიზნესები და ჩვენი შეთავაზება იქნება ის, რომ რაც შეიძლება მეტმა ადამიანმა მოახერხოს საშუალო ბიზნესის გაჩენა. ანუ, იგივე „აწარმოე საქართველოში“ თუნდაც, პირდაპირ მინდა გითხრათ, რომელიც თავისთავად კარგი იდეაა, იქ წვდომა ჩვეულებრივ ადამიანს, ვისაც ახალი ბიზნესის დაწყება უნდა, არ შეუძლია, იმიტომ, რომ ბანკები თხოვენ უამრავ გარანტიებს, ისევ ის აკეთებს დღეს ფულს საქართველოში, ვინც აკეთებდა 25 წლის განმავლობაში, რაც გვაქვს დაგროვებული კაპიტალი, ამიტომ ჩვენ გვინდა გავაფართოვოთ საშუალო ფენა და მეტმა ადამიანმა შეძლოს კეთილდღეობასთან იყოს შეხებაში. ამას შევძლებთ სწორედ ამ რეფორმებით, რომელსაც ჩვენ ვგეგმავთ, რომ ხელმისაწვდომი ფინანსი ექნება, აგრარული ფინანსები ექნება სოფლად ადამიანებს და მიუყვანთ ყოველ სოფელს, ყოველ სოფელს უნდა ქონდეს ის ტექნიკა-მექანიზაცია, რომელიც მას დაეხმარება დაამუშაოს მიწა. ამიტომ, პრობლემები ძალიან ბევრია ბუნებრივია და ჩვენ ვიწყებთ მუშაობას სამეგრელოში კონკრეტულად უკვე პრობლემების მოგვარების გზების შეთავაზებაზე, და ეს იქნება წარმატების საფუძველი.

ლაივპრესი: ბევრი ახალი სახე თუ გყავთ პარტიაში და რაზე აკეთებთ აქცენტს, როგორ კადრებზე?

ირაკლი ალასანია: ჩვენ ძირითადად ვაკეთებთ აქცენტს ჯერ ეს ერთი ყველასთვის, ვინც არის პატრიოტი ადამიანი, „თავისუფალი დემოკრატების“ კარები ღიაა და აქაც იმედი მაქვს, ამ ოფისში ბევრი ზუგდიდელი მოვა და გაწევრიანდება. ეს ერთი და მეორე, ჩვენ ვაკეთებთ აქცენტს პროფესიონალებზე. დღევანდელი ხელისუფლების უმთავრესი პრობლემა არის ის, რომ არ იციან საქმის კეთება, არ ყავთ პროფესიონალი კადრები სწორ ადგილებზე და გამეფდა ნეპოტიზმი, მხოლოდ ახლობლები და ნათესავები მოჰყავთ თანამდებობებზე და საქმე არ კეთდება. ამიტომ აქცენტი გვაქვს გადატანილი პროფესიონალიზმზე. გითხარით ვასილ რევიშვილი, რომელიც არის მართლაც თავისი საქმის მცოდნე და პროფესიონალი, თამარ ამაშუკელი, რომელიც დღეს ჩვენთან ერთად იყო ზუგდიდში, არის ხელოვნებათმცოდნე, მაგრამ ურბანული განვითარების, კულტურული მემკვიდრეობის დაცვის, ასევე სპეციალისტი, რომელიც რომელიც შემოუერთდა ჩვენს პარტიას და მინდა გითხრათ, რომ კულტურული მემკვიდრეობის დაცვა, გარემოს დაცვა იქნება ერთ-ერთი მთავარი პრიორიტეტი ჩვენთვის და ურბანული განვითარება ქალაქების, მათ შორის ზუგდიდისაც, იმიტომ, რომ არასწორად ვითარდება ქალაქები, არასწორად ვითარდება ზოგადად ჩვენი ურბანული მოწყობაც და ამას სჭირდება ერთიანი ჩანაფიქრით სახელმწიფომ გადამჭრელი ზომები მიიღოს.

ლაივპრესი: თუ ადევნებდით თვალ-ყურს თქვენი პარტიის წარმომადგენლების აქტივობებს ზუგდიდში, იგივე საკრებულოებში, როგორც ქალაქის, ასევე მუნიციპალიტეტის გამგეობის? თუ მოგწონთ მათი საქმიანობა, საქმის კურსში თუ ხართ?

ირაკლი ალასანია: ჩვენ ბუნებრივია არა გვყავს უმრავლესობა საკრებულოებში. გვყავს წარმომადგენლები, იმიტომ, რომ როდესაც მოხდა ისე, რომ კოალიციისგან გამოეყო „თავისუფალი დემოკრატები“ და დავინახეთ, რომ მათ „თავისუფალი დემოკრატები“ არ ჭირდებოდათ, არ ჭირდებოდათ სიმართლის მთქმელი ხალხი მთავრობაში, ამის მერე ბუნებრივია ჩვენ შეგვიმცირდა ჩვენი წარმომადგენლობები საკრებულოებში. მაგრამ მე ვთვლი, რომ ის მუშაობა, რომელიც გაწეული იყო, მე ძალიან კარგად ვიცი. მაგრამ ეს არავითარ შემთხვევაში არ არის დამაკმაყოფილებელი. მე მოვითხოვ უკვე ყველა საკრებულოში, რომ ყოველდღიურ რეჟიმში იყვნენ ხალხთან, ხალხის პრობლემები გააჟღერონ და იმუშაონ მათთვის, ვინც დაიქირავა, და ეს არის საზოგადოება, ეს არის ხალხი. ამიტომ, მე რა თქმა უნდა უფრო მეტს და მეტს ვთხოვ ჩვენი საკრებულოს წარმომადგენლებს, და მე უშუალოდ უკვე ჩავერთვები მათი საქმიანობის გააქტიურებაში.

ლაივპრესი: ხობში „თავისუფალმა დემოკრატებმა“ სრულად დატოვეს პარტია, ასევე მხარდამჭერებმა, და გადავიდნენ „ქართულ ოცნებაში“. სენაკშიც რაიონული ორგანიზაციის თავმჯდომარემ და საკრებულოს წევრმა დატოვა თქვენი რიგები. მიზეზად მათ დაასახელეს თანხვედრა „ნაციონალური მოძრაობის“ და თქვენი პარტიის, რომ თითქოს გახდით „ნაცონალების“ ინტერესების გამომხატველი და აცდით იმ ყველაფერს, რისთვისაც იბრძოდით. თქვენი აზრით, რატომ გაემიჯნენ ისინი „თავისუფალ დემოკრატებს“?

ირაკლი ალასანია: იცით რა, ჩვენ როდესაც კოალიციიდან წამოვედით, ბევრს გაუჭირდა ოპოზიციურ რიტმზე გადაწყობა, იმიტომ, რომ კომფორტში იგრძნეს თავი, განცხრომაში იგრძნეს თავი და აქედან გამომდინარე ისინი, ვინც შემდეგ გააკეთეს განცხადებები, პრაქტიკულად იყვნენ ისედაც წასულები ჩვენი პარტიიდან, ნომინალურად იყვნენ ჩვენს პარტიაში. ჩვენს პარტიას ისეთი ხალხი არ ჭირდება, ვინც ესე გადარბის ერთი პარტიიდან მეორეში.

ლაივპრესი: ნომინალური რას ნიშნავს?

ირაკლი ალასანია: ანუ არ იყვნენ ჩვენი პარტიის წევრები რეალურად, რომ გამოვეყავით კოალიციას. უბრალოდ ინარჩუნებდნენ სტატუსქვოს. ეხლა, როცა ჩვენ მოვთხოვეთ მათ გააქტიურებულიყვნენ იგივე იმ პრობლემებზე, რაც ხალხს აინტერესებს, გადაწყვიტეს წასულიყვნენ ჩვენი პარტიიდან. მე ამ ნაბიჯებს მივესალმები, მივესალმები იმიტომ, რომ არ გვჭირდება ისეთი ადამიანები, ვინც ესე, ერთგულების ნაცვლად დანას დაარტყამს ზურგში საკუთარ პარტიას, და ჩვენ მივიღეთ ეს მონაცემები, როგორც მოცემულობა. ჩვენ მაგით არაფერი დიდი არ დავკარგეთ, პირიქით. ახალი წარმომადგენლები გვყავს სენაკშიც, და ვაგრძელებთ ჩვენი ღირებულებებისადმი ერთგულებას. იმ ღირებულებების, რომლისგანაც გადაუხვია „ქართულმა ოცნებამ“. ჩვენ რომ წამოვედით, ფრაქცია რომ გამოვიდა პარლამენტში და ოპოზიციაში, რითი შეავსო „ქართულმა ოცნებამ“ საკუთარი უმრავლესობა? „ნაციონალური მოძრაობის“ ყოფილი პარლამენტარებით. ამიტომ ჩვენ ვთვლით, რომ ჩვენ არ გვიღალატია „ქართული ოცნების“ იდეალებისთვის, ეს „ქართულმა ოცნებამ“ უღალატა თავად და ჩვენ ვართ რეალური გამგრძელებლები იმ საქმის, რომელიც დავიწყეთ 2012 წელს.

„ნაციონალურ მოძრაობასთან“ დაკავშირებით თქვენ მკითხეთ, რომ თითქოს ეს იყო მიზეზი. მე მინდა გითხრათ, რომ საგანგებოდ, სპეციალურად ავრცელებს როგორც „ქართული ოცნება“, ისე „ნაციონალური მოძრაობა“ ხმებს, რომ ჩვენ შეიძლება ალიანსი გვქონდეს „ნაციონალურ მოძრაობასთან“. მე მინდა კიდევ ერთხელ ნათლად ვთქვა, ჩვენ არ გვესაქმება არაფერი „ნაციონალურ მოძრაობასთან“, და არ გვესაქმება არაფერი „ქართულ ოცნებასთან“. ჩვენ, „თავისუფალი დემოკრატები“ ვართ ის ძალა, ის ალტერნატივა, რომელსაც მართლა შეგვიძლია შემდეგ არჩევნებში გავიმარჯვოთ, იმიტომ, რომ 50% ამომრჩევლის ამბობს, რომ ჯერ არ არის ჩამოყალიბებული. იცით როგორ დაეცა რეიტინგი „ქართული ოცნების“ და არ იზრდება „ნაციონალური მოძრაობის“. ჩვენ მათთან არავითარი საერთო პოლიტიკური ალიანსის კუთხით არ გვაქვს. მაგრამ, როცა მე ვიტყვი თეთრზე თეთრია მეთქი, და „ნაციონალური მოძრაობაც“ იგივეს იტყვის, ეს არ ნიშნავს, რომ ჩვენი აზრი ოპოზიციური ემთხვევა ერთმანეთს, რომ ჩვენ ვართ ერთი ძალის წარმომადგენელი, პირიქით. ჩვენი პარტია შეიქმნა სწორედ იმიტომ, რომ სააკაშვილის რეჟიმს ვებრძოდით. რაც არ მოგვწონდა ოთხი წლის წინ, იგივე არ მოგვწონს დღესაც. იმიტომ დავუპირისპირდით ჩვენ დღევანდელ ხელისუფლებას, რომ ისინი გარდა იმისა, რომ არაპროფესიონალები არიან, უღალატეს მთავარ ღირებულებებს. ჯერ კიდევ პროკურატურა ისევ პოლიტიზირებულია, და მედიაზე მიდის ესეთი ზეწოლა. ამიტომ, ეს ის ღირებულებებია, რისთვისაც ვართ ჩვენ პოლიტიკაში, და დავიცავთ ბოლომდე.

„ლაივპრესი“: სხვა რაიონულ ორგანიზაციებშიც ხომ არ ელოდებით ასე დემონსტრაციულად პარტიის დატოვებას?

ირაკლი ალასანია: ჩვენ სადაც გავხსენით ოფისი, დავიწყეთ ჩვენი რეგიონული სტრუქტურების გამართვა, იქ არის შეკრული პარტია. ჩვენ ასეთ შეკრულ სტრუქტურებს და პარტიას გავაჩენთ ყველა რაიონში. და ის, ვისაც არ უნდა „თავისუფალ დემოკრატებთან“ ყოფნა, მათ აქვთ დიდი არჩევანი. უამრავი პარტიაა, ვისაც უნდათ იმას შეუერთდნენ. ჩვენი ძირითადი ხერხემალი პარტიის არის ერთად, იგივე, ჩვენ ერთ მუშტად ვიკვრებით ყოველთვის. ჩვენი დევიზი, „თავისუფალი დემოკრატების“ არის ყველა ერთისთვის და ერთი ყველასთვის. ამის დემონსტრირება ძალიან კარგად მოხდა ერთი წლის წინ, როდესაც ჩემზე, პარტიის თავმჯდომარეზე და თავდაცვის მინისტრზე პირდაპირი შეტევა წამოიწყეს და შეკერეს საქმე პროკურატურაში, რომელიც დღეს დაშლილია პრაქტიკულად. მაგრამ ყველა გვერდზე დამიდგა, იმიტომ, რომ მე ვუდგევარ ყველას გვერდში, იმიტომ, რომ ეს პარტია დაფუძნებულია ამ ერთობაზე, სიმტკიცეზე, რაც ანერვიულებს როგორც „ქართულ ოცნებას“, ასევე „ნაციონალურ მოძრაობას“. აქედან გამომდინარე ხმები, რომელიც დაყრილია ორივე მხარის მიერ, არის ტყუილი, არ შეესაბამება სიმართლეს.

„ლაივპრესი“: დატოვეს თქვენი პარტიის წევრებმა „თავისუფალი დემოკრატები“ და შეუერთდნენ „ქართულ ოცნებას“, თუმცა მოხდა პირიქითაც. მაგალითად სენაკში საკრებულოს ყოფილი თავმჯდომარე ხვიჩა ჯიშკარიანი თქვენს რიგებში გაწევრიანდა. როგორ ფიქრობთ, ეს იყო განაწყენებული ადამიანის გადაწყვეტილება, თუ გაცნობიერებული პოზიცია?

ირაკლი ალასანია: აბსოლუტურად გაცნობიერებული ადამიანური, პროფესიონალური გადაწყვეტილებაა. ხვიჩა არის მართალი კაცი. მას არ შეუძლია შეეგუოს უსამართლობებს. უნდა, რომ აკეთოს საქმე, რომელიც მას უყვარს. ის პრაქტიკულად სენაკში ყოველ დღე მართვას შეხვედრებს, და მე მომწონს მისი მუშაობის სტილი. ჩვენ ღირებულებითი თანხვედრა გვქონდა. ამიტომ, ეს არ არის პირველი შემთხვევა, და არ იქნება ბოლო შემთხვევა. მაგრამ ჩვენ არ ვცდილობთ ნიშნისმოგებით ვიღაცისგან წამოვიყვანოთ კადრები. ჩვენთან თავისით მოდის ხალხი, იმიტომ, რომ მათ უხარიათ, უყვართ „თავისუფალი დემოკრატების“ ის ღირებულებები, რაზეც ვდგევართ და ხვიჩა მათ შორის არის ერთ-ერთი ძლიერი კადრი, რომელმაც გააძლიერა „თავისუფალი დემოკრატები".

„ლაივპრესი“: თქვენ ახსენეთ NDI-ის კვლევა, რომ არ იზრდება „ქართული ოცნების“ და „ნაციონალური მოძრაობის“ რეიტინგი. თუ არის თქვენთვის დამაკმაყოფილებელი თქვენი მონაცემები და რატომ ვერ მოახერხეთ „ნაციონალური მოძრაობის“ ჩანაცვლება ოპოზიციურ ფლანგზე? ასევე მაინტერესებს, თუ ენდობით ამ კვლევას.

ირაკლი ალასანია: ჩვენი ამოცანა არავის ჩანაცვლება არ არის. ჩვენი ამოცანაა ჩვენი ადგილი დავიკავოთ ქართულ პოლიტიკაში. რეიტინგებში პარტიის ლიდერი, მე თვითონ ვარ ერთ-ერთი ის პოლიტიკოსი, რომლის მიმართ ხალხს მაღალი ნდობა აქვს უკვე წლების განმავლობაში. და ეს მე მეტ პასუხისმგებლობას მკიდებს. ჩვენი პარტიის რეგიონული სტრუქტურების გაშლა დავიწყეთ სწორედ ახლა, სექტემბერში. ის კვლევა ჩატარებულია აგვისტოში. ამიტომ დიდი იმედი მაქვს, ნოემბერში რომ კვლევა ჩატარდება, NDI ატარებს რამდენადაც ვიცი, უკვე რეალობა, პოლიტიკური კონსტალაცია ძალების კიდევ უფრო მკვეთრად გამოჩნდება. მე ვენდობი კვლევებს, იმიტომ, რომ ეს ის განწყობაა, რასაც მე ვხვდები რეგიონებში და დედაქალაქშიც, როდესაც დავდივარ და ხალხს ვხვდები. მათ აქვთ აბსოლუტური უიმედობის განცდა, პოლიტიკისადმი აქვთ უიმედობა. არავის აღარ ვენდობით, იმიტომ, რომ ყველამ მოგვატყუაო. იმედები ყველამ გაგვიცრუო. ეს არის განწყობა. ჩვენი ამოცანა იქნება, რომ ეს განწყობები შევცვალოთ და იმედი გავუჩინოთ ხალხს. ამიტომაც სწორია, რომ დღეს პრაქტიკულად არცერთ პარტიას არ აქვს მაღალი მხარდაჭერა. ჩვენ პოტენციალი გვაქვს, იმიტომ, რომ მეორადი მხარდაჭერა ჩვენს პარტიას ყველაზე მაღალი აქვს, ნებისმიერ სხვა პარტიაზე უფრო. ამიტომ, მე ამ პოტენციალს ვხედავ, ვხედავ, რომ ლიდერების მიმართ არის ნდობა, და ძლიერი მუშაობით, ყოველდღიური მუშაობით დარწმუნებული ვარ გავიმარჯვებთ შემდეგ არჩევნებში.

„ლაივპრესი“: მიიჩნევენ, რომ „ნაციონალურ მოძრაობას“ აქვს ძლიერი დასაყრდენი სამეგრელოში.

ირაკლი ალასანია: ზუგდიდში ძალიან მაღალი შანსები გვაქვს. მე გახსოვთ დეპუტატობის კანდიდატი ვიყავი. და იმდენი ხმა ავიღეთ მაშინ, პრაქტიკულად იმ რეპრესიული რეჟიმის დროს, რომელზე მეტი ხმა შემდეგ უკვე გათავისუფლებულ გარემოში ვერ აიღო ვერცერთმა სხვა პოლიტიკურმა ძალამ. გახსოვთ საპრეზიდენტო არჩევნებშიც, ადგილობრივ არჩევნებშიც პრაქტიკულად ჩემზე მეტი ხმები ვერავინ ვერ აიღო. ეს ნიშნავდა იმას, რომ მაქსიმალურად მობილიზება გავუკეთეთ ხმებს ზუგდიდში, და დიდი იმედი მაქვს, რომ ახლა უკვე ბევრად უფრო თავისუფალ გარემოში ჩვენ დამაჯერებელ გამარჯვებას მოვიპოვებთ ზუგდიდში. მე ამის იმედი მაქვს.

„ლაივპრესი“: ახსენეთ თქვენი მაჟორიტარი დეპუტატობის კანდიდატობის პერიოდი. თქვენ მას შემდეგ, რაც ცესკომ დააფიქსირა მონაცემები, რომ როლანდ ახალაია იყო გამარჯვებული, თქვით, რომ დაიცავდით თქვენს ხმებს. საზოგადოების იმ ნაწილს, რომელმაც ხმა მოგცათ, ალბათ ქონდა გარკვეული მოლოდინი, რომ ეს ასეც მოხდებოდა. რატომ ვერ მოხერხდა მაშინ ამ ხმების დაცვა?

ირაკლი ალასანია: ჩვენ შევიტანეთ მაშინ სარჩელები, გახსოვთ, მაგრამ სასამართლომ მიიღო გადაწყვეტილებები, და ჩვენ, როგორც კანონმორჩილი მოქალაქეები, და პარტია, რომელიც ინსტიტუტებს პატივს სცემს, სასამართლოს წინააღმდეგ ვერ წავიდოდით. მე ეს ჩავთვალე დიდ უსამართლობად. მე ზუსტად ვიცი, როგორ მუშაობდნენ აქ სპეციალური სტრუქტურები. სპეცდანიშნულების რაზმები, გატენილი იყო ზუგდიდი და სამეგრელო. როგორ აშინებდნენ და როგორც მერე აღმოჩნდა, აწამებდნენ მოქალაქეებს „ნაციონალური მოძრაობის“ წარმომადგენლები, გამოყენებით სპეციალური სტრუქტურების. ასე რომ, იმ პირობებში ასეთი მაღალი ნდობა რომ გამომიცხადა ზუგდიდმა, მე დღესაც მეამაყება, ამიტომ ყველაზე დიდი, ყველაზე გამორჩეული წარმომადგენლობა იქნება სწორედ ზუგდიდში და ძალიან მაღალი რწმენა მაქვს გამარჯვების.

„ლაივპრესი“: როცა ზუგდიდის მაჟორიტარი დეპუტატობის კანდიდატი იყავით, შეხვდით ცინარა აბულაძეს. არ ვიცი გახსოვთ თუ არა ეს ქალბატონი, დაკარგული გოგიტა აბულაძის დედას. მაშინ თქვენ დაპირდით, რომ ხელისუფლების ცვლილების შემთხვევაში ეს საქმე გამოძიებული იქნებოდა...

ირაკლი ალასანია: მე ვცადე როგორც თავდაცვის მინისტრმა ჩვენი ძალებით გამერკვია სიმართლე, მაგრამ ბუნებრივია, თავდაცვის სამინისტრო არ არის სამართალდამცავი სტრუქტურა, და მე ვთხოვდი ყოველთვის, მუდმივად პროკურატურასა და შინაგან საქმეთა სამინისტროსაც, რომ რეალურად გამოძიება წინ წაეყვანათ. ეს მათი პრეროგატივა იყო და მე ვერაფერს ვერ გავაკეთებდი დამოუკიდებლად. ეს მართლაც უმძიმესი საქმეა, და მგონია, როდესაც ჩვენ ხელისუფლებაში ვიქნებით, და უკვე სამართალდამცავ სტრუქტურებს ჩაუდგება სათავეში პროფესიონალი ხალხი, ეს საქმე უნდა გაიხსნას. ეს არის ღირსების საქმე თითოეული ჩვენგანისთვის.

„ლაივპრესი“: თქვენ არაერთხელ ახსენეთ, რომ ზუგდიდი უნდა იყოს ხიდი ოკუპირებული ტერიტორიის დაბრუნების კუთხით. რამდენად მოგწონთ ის პოლიტიკა, რასაც ახორციელებს ხელისუფლება ამ მიმართულებით დღეს და თქვენ რას შეცვლით?

ირაკლი ალასანია: მე ვფიქრობ, დღეს საქართველოს სახელმწიფომ რაც უნდა აკეთოს, პირველ რიგში არის, ის, რომ ფართოდ გავხსნათ საშუალებები, ადამიანებმა ერთმანეთთან იურთიერთონ. ოკუპირებულ ტერიტორიასა და კონკრეტულად ზუგდიდსა და სამეგრელოს შორის. მე ვთვლი სახელმწიფომ, ბიზნესმა, უნდა მოვძებნოთ საერთო მეორე მხარესთან და დავაფინანსოთ ერთობლივად ეკონომიკური ინფრასტრუქტურული და სასოფლო-სამეურნეო პროექტები. მე მყავს ძალიან დიდი სანაცნობო წრე საერთაშორისო თანამეგობრობაში და მათთან უკვე ნალაპარაკევი ვარ, რომ მხარი დაუჭირონ და ევროკავშირმა კონკრეტულად ესეთი პროექტების განხორცეიელებას. როდესაც ადამიანები დაიწყებენ ურთიერთობას, ვაჭრობას ერთმანეთთან, დაიწევს ის დაძაბულობის ფონი, რომელიც არსებობს, და დარწმუნებული ვარ, ჩვენ შემდეგ უკვე მოგვეცემა საშუალება უფრო პოლიტიკურ საკითხებზეც ვილაპარაკოთ.

„ლაივპრესი“: აფხაზური მხარე რამდენად წამოვა კონტაქტზე, როგორ ფიქრობთ?

ირაკლი ალასანია: მე მაქვს გარკვეული ძველი კონტაქტები შემორჩენილი, მოლაპარაკებების დროინდელი და მე ვატყობ ამ განცდას და განწყობას, რომ ისინი მზად არიან ამ საკითხებზე დაიწყონ ურთიერთობა.

„ლაივპრესი“: თუ გქონიათ მათთან ბოლო წლების მანძილზე კონტაქტი?

ირაკლი ალასანია: იცით რა, მე მქონდა კონტაქტები, რომ არ შეწყდეს ეს ურთიერთობა, მაგრამ რეალურად საქმეს ხელისუფლებიდან უნდა კეთება. აქედან გამომდინარე, როგორც კი არჩევნები დასრულდება, ჩვენ დავიწყებთ, გავაინტენსიურებთ ურთიერთობას აფხაზურ მხარესთან. ასევე ცხინვალის რეგიონთან.

„ლაივპრესი“: რა აზრის ხართ აფხაზეთის გავლით რკინიგზის აღდგენაზე?

ირაკლი ალასანია: მე დადებითი აზრის ვარ ყველა ინფრასტრუქტურის ამოქმედებაზე, რომელიც ურთიერთობას გააძლიერებს ორ, ომით გახლეჩილ საზოგადოებას შორის. მაგრამ ეს რკინიგზა პოლიტიკური დატვირთვის მატარებელია, ამიტომ აქ საქართველოს ინტერესები, ეკონომიკური ინტერესები უნდა იყოს პირველ რიგში გათვალისწინებული. და დღევანდელ მდგომარეობაში ამ რკინიგზის გახსნის შესაძლებლობას მე ვერ ვხედავ. ამ რკინიგზამ სოციალური ურთიერთობის სამოქალაქო მხარეებს შორის ურთიერთობის აღდგენასთან ერთად უნდა ითამაშოს ასევე ეკონომიკური მასტაბილურებელი როლი. ამას სჭირდება ძალიან სერიოზული ეკონომიკური გათვლები. საბოლოო ჯამში მე პრინციპულად მხარს დავუჭერ ყველა იმ ინფრასტრუქტურის შენებას, რომელიც დააახლოვებს აფხაზეთის დღევანდელ მოსახლეობას და საქართველოს.

„ლაივპრესი“: და ბოლოს გკითხავთ, რა დაგხვდათ ზუგდიდში შეცვლილი? იგივე ინფრასტრუქტურა, განწყობა... და რამდენად გახდა თვითმმართველობის არჩევნების შემდეგ ზუგდიდი თვითმმართველი ქალაქი?

ირაკლი ალასანია: სამწუხაროდ მინდა გითხრათ, რომ თვითმმართველობის რეფორმა არ შედგა საქართველოში. თვითმმართველ ერთეულებს არ აქვთ ის ფინანსური რესურსები თუნდაც, და გარდა ამისა, პასუხისმგებლობა გადაწყვეტილების მიღების, რომელიც ჭირდება რეალურ თვითმმართველობას. არ ჩაიდო რეალური ფული ტრეინინგებში, რომელიც გააგებინებს ადგილზე, ჩვენს თვითმმართველ ერთეულებში მომუშავე ხალხს, თუ რა პასუხისმგებლობები აქვთ და როგორ უნდა მართონ საკუთარი შესაძლებლობებით ცენტრისგან დამოუკიდებლად, ამიტომ, ამ ყველაფერმა მომავალში გადაიწია. და დარწმუნებული ვარ, ჩემი პარტიის ერთ-ერთი იდეოლოგიური გზავნილი არის ის, რომ მაქსიმალური დეცენტრალიზაცია უნდა მოხდეს, რეგიონებზე უფლებების, პასუხისმგებლობების, და ფინანსების, იმიტომ, რომ რეალური დემოკრატიული ქვეყანა ასეთი დეცენტრალიზაციის გარეშე ვერ შედგება. ზოგი იძახის, რომ არ უნდა ვანდოთ რეგიონებს მეტი ფული, იმიტომ, რომ არ იციან როგორ მოიხმარონ. მე ვამბობ, რომ თუ ეს არ დავიწყეთ, ვერასდროს ვერ ისწავლიან ამ პასუხისმგებლობას და აქედან გამომდინარე მე მხარს ვუჭერ რეალურ დეცენტრალიზაციას. დღეს რეალურად თვითმმართველი ერთეულები არ არიან დამოუკიდებლები.

„ლაივპრესი“: დიდი მადლობა ინტერვიუსთვის.

ირაკლი ალასანია: პირიქით, დიდი მადლობა თქვენ. წარმატებებს გისურვებთ.