კომენტარი
ინტერვიუ „ბურჯანაძე - ერთიანი ოპოზიციის“ ზუგდიდის მერობის კანდიდატთან [Video]
FaceBook Twitter
E-mail Print

ზუგდიდის მერობის კანდიდატი კოალიციიდან „ბურჯანაძე - ერთიანი ოპოზიცია“ რუსუდან პაჭკორია დაიბადა 1963 წლის 27 სექტემბერს. 1980 წელს დაამთავრა ზუგდიდის #2 საშუალო სკოლა. 1986 წელს თბილისის ივანე ჯავახიშვილის სახელობის სახელმწიფო უნივერსიტეტის იურიდიული ფაკულტეტი, სამართალმცოდნეობის სპეციალობით. არის საქართველოს ადვოკატთა ასოციაციის წევრი. 1989 წელს იყო თბილისის ბიზნესის სახლმწიფო ინსტიტუტის სამეგრელოს ფილიალის უფროსი მასწავლებელი. 2002-2004 წლებში მუშაობდა ასოციაცია „ათინათის“ იურისტად. 2004-2005 წლებში იყო თბილისის ეკონომიკის სახელმწიფო უნივერსიტეტის ზუგდიდის ფილიალის უფროსი მასწავლებებლი. 2005 წელს ნორვეგიის ლტოლვილთა საბჭოს ზუგდიდის ოფისის იურისტი. 2001-2012 წლებში რადიო „ათინათში” იურიდიული გადაცემების ავტორი და წამყვანი. 2006-2007 წლებში იყო საქართველოს იუსტიციის სამინისტროს #4 სასჯელაღსრულების დაწესებულების საზოგადოებრივი მონიტორინგის კომისიის წევრი. 2005 წლიდან დღემდე არის ორგანიზაცია „სამართლებრივი დაცვის ინსტიტუტის“ იურისტი.


ლაივპრესი“: საზოგადოება გიცნობთ, როგორც არასამთავრობო სექტორში მომუშავე იურისტს, ამიტომ მოულოდნელი იყო კოალიცია „ბურჯანაძე - ერთიანი ოპოზიციის“ მიერ თქვენი დასახელება ზუგდიდის მერობის კანდიდატად. ელოდით თუ არა შემოთავაზებას და რატომ გადაწყვიტეთ პოლიტიკაში წასვლა?


რუსუდან პაჭკორია: მართლაც ძალიან საინტერესოა თქვენ მიერ დასმული კითხვა, რადგან მე ძალიან მაინტერესებდა, თუ რა დამოკიდებულება ექნებოდა საზოგადოებას ჩემი გადაწყვეტილების მიმართ. მართალი გითხრათ ძალიან ძნელად მივიღე ეს გადაწყვეტილება. აბსოლუტურად მოულოდნელი იყო ეს შემოთავაზება ჩემთვის, მაგრამ, როცა დავფიქრდი მივხვდი ეს არ იყო ჩვეულებრივი შემოთავაზება, ეს იყო უფრო გამოწვევა. მე ეს გამოწვევა მივიღე. წლების განმავლობაში ვმუშაობდი და ვმუშაობ არასამთავრობო სექტორში და ამ ხნის მანძილზე ჩვენ ჩაგვიტარებია უამრავი ღონისძიება, დისკუსია, განგვიხორციელებია უამრავი პროექტი, რომელიც მიმართული იყო ქალთა უფლებების დაცვისკენ. ძალიან ბევრჯერ დაგვისვამს კითხვა - რატომ არ მოდიან ქალები პოლიტიკაში. მართალი გითხრათ ამ დისკუსიების დროს ჩვენ გამოვხატავდით ჩვენს სუბიექტურ მოსაზრებას რაღაც თეორიებზე დაყრდნობილს. ამ შემთხვევაში კი მე მომეცა შესაძლებლობა გავცე ამ კითხვას რეალური პასუხი. და ამ კითხვას, იმ ადამიანებთან ვისთანაც მომავალში მექნება შეხვედრა სამოქალაქო სექტორში, თუ საჯარო სექტორში დაგეგმილი ღონისძიებების ფარგლებში, ვუთხრა ჩემი პასუხი ამ კითხვაზე, გამომდინარე იმ გამოცდილებიდან, რომელსაც ამ არჩევნებში მივიღებ. შესაძლებელია მე არჩევნების შემდეგ კითხვის ფორმულირება შევცვალო და დავსვა კითხვა ასეთნაირად, რატომ ვერ მოდიან ქალები პოლიტიკაში. რატომ არ მოდიან ქალები პოლიტიკაში ეს სხვა ფაქტორებზეა დამოკიდებული, მაგრამ რატომ ვერ მოდიან, ვფიქრობ ამ კითხვაზე მე შემეძლება პასუხის გაცემა არჩევნების შემდეგ. ეს ერთი ფაქტორი. მეორე არის ასევე ძალიან საინტერესო, ქალაქში მოქალაქეთა გარკვეულმა ნაწილმა, ჯგუფმა გადაწყვიტა, რომ მე ვყოფილიყავი ზუგდიდის მერობის კანდიდატი. უბრალოდ ზუგდიდელების ეს ინიციატივა მხარდაჭერილი იყო ამ პარტიიის მიერ.


„ლაივპრესი“: რა კრიტერიუმებით შეგარჩიათ ამ პარტიამ მერობის კანდიდატად?


რუსუდან პაჭკორია: მართალი გითხრათ არ ვიცი და მე დავსვი ეს კითხვა, ამ ადამიანებმა მითხრეს, ასე ვთქვათ დამარწმუნეს, რომ სადაც გაიკითხეს და სხვადასხვა სფეროში მოღვაწე ადამიანებს ჰკითხეს ჩემ შესახებ, მიიღეს დადებითი შეფასება ჩემი პიროვნების შესახებ, რაც ჩემთვის ძალიან საამაყოა. ამიტომაც მე ვთვლი, რომ უკვე ვარ გამარჯვებული მიუხედავად ნებისმიერი შედეგისა, იმიტომ, რომ თუკი ეს ნდობა არსებობს, თუნდაც მოსახლეობის მცირე ნაწილში, ე.ი. მე ფუჭად არ მიცხოვრია და რაც გავაკეთე მე ამ ხნის მანძილზე ჩემი თანაქალაქელებისთვის, მათი კეთილდღეობისთვის, ეს გარკვეულწილად უკვე დაფასებულია.


„ლაივპრესი“: როგორ ფიქრობთ, რამდენად დიდია მოსახლეობის ნდობა იმ პარტიის მიმართ, რომელმაც თქვენ დაგასახელათ, მას პრორუსულ პარტიად მიიჩნევენ?


რუსუდან პაჭკორია: ამ კითხვაზე ერთმნიშვნელოვანი პასუხი არ მაქვს. შესაძლებელია ნინო ბურჯანაძის მიზანმიმართული დისკრედიტაციას სხვადასხვა ნიშნის მიხედვით ეწეოდნენ და ამაში კარგ იარაღად იყოს გამოყენებული მედია. მე ერთადერთი რამ რაც შეიძლება დაბეჯითებით გითხრათ ის არის, რომ მრავალწლიანი ნაცნობობა მაკავშირებს ნინო ბურჯანაძესთან და ვიცი, რომ მას უყვარს საქართველო. ის არასდროს უღალატებს თავის ხალხს, თავის ოჯახს, თავის შვილებს და არასდროს არაფერს ისეთს არ გააკეთებს რაც ზიანს მოუტანს ამ ქვეყანას და მის მშობლიურ ხალხს. ძალიან ხშირად ადამიანები გარბიან ქვეყნიდან, როცა ისინი კრახს განიცდიან მითუმეტეს პოლიტიკურ ასპარეზზე. ნინო მე მგონი არსად წასულა. ის მუდმივად საქართველოშია, იმიტომ რომ მან იცის, რომ ის სჭირდება თავის ქვეყანას.


„ლაივპრესი“: სხვა პოლიტიკურ სუბიექტებს რომ შემოეთავაზებინათ მერის კანდიდატურა, დასთანხმდებოდით?


რუსუდან პაჭკორია: მე, როგორც უკვე გითხარით, ნამდვილად არ მიფიქრია პოლიტიკურ ასპარეზზე, მაგრამ სხვა პოლიტიკური პარტიების მხრიდან ასეთი შემოთავაზებები არ მქონია ზუგდიდში. ვერ გეტყვით დავთანხმდებოდი თუ არა. უფრო არა. ყოველშემთხვევაში გადაწყვეტილების მიღების დროს გადამწყვეტი მნიშვნელობა ჰქონდა არა იმას თუ ვინ შემომთავაზა, არამედ იმას, რომ ეს ინიციატივა ეკუთვნოდა ზუგდიდელებს. ეს იყო ამოსავალი წერტილი. თუკი მე გადავწყვეტდი პოლიტიკაში მოსვლას, ეს არ მოხდებოდა ზევიდან, თბილისში მიღებული გადაწყვეტილებით. მე ვთვლი, რომ ეს არ არის სამართლიანი, იმიტომ, რომ თუ ქალაქის  მერობაზეა საუბარი, ქალაქელებისგან უნდა წამოვიდეს ინიციატივა. თუკი გენდობიან ადამიანები და თუკი შენს თავში ხედავ ძალას, რომ შეგიძლია ეს ნდობა გაამართლო, მაშინ უნდა მიიღო ეს გადაწყვეტილება. ვიღაცამ უნდა აიღოს პასუხისმგებლობა ამ ქვეყანაში საკუთარ თავზე.


„ლაივპრესი“: რატომ უნდა მოგცეთ ხმა ზუგდიდელებმა, რას პირდებით მათ?


რუსუდან პაჭკორია: ზუგდიდელებმა ხმა იმიტომ უნდა მომცენ, რომ პირველ რიგში რასაც ვთვლი აუცილებლად ეს არის ის, რომ გიყვარდეს ეს ქალაქი. ძალიან ბევრი ადამიანი, რომელიც ცხოვრობდა ზუგდიდში დაიბადა და გაიზარდა, ზუგდიდს არ დაუბრუნდა, იმიტომ რომ მოიხიბლა სხვა დიდი ქალაქების მშვენიერებით, ჩვენი დედაქალაქის ან სხვა დიდი ქალაქების ხიბლით და არ დაბრუნდა. ჩემთვის ამას გულით გეუბნებით და ეს ჩემმა ახლობლებმა იციან, რომ ზუგდიდი არის ყველაზე მშობლიური, ყველაზე თბილი და ახლობელი ადგილი დედამიწის ზურგზე. სტუდენტობის პერიოდში, როცა მე ვსწავლობდი თუ ამის შესაძლებლობა იქნებოდა, ვცდილობდი  ყოველ კვირას ვყოფილიყავი ზუგდიდში. აგვისტოს ომის დროს, როცა თითქმის მთელი ქალაქი დაცარილედა და თავ-პირის მტვრევით გაროდნენ ზუგდიდიდან მე ერთი წუთითაც არ მიმიტოვებია და არც მიფიქრია დამეტოვებინა ზუგდიდი. მე ჩემს ოჯახთან ერთად ვიყავი ჩემ სახლში. ეს არის ერთი ფაქტორი ასე ვთქვათ მიჯაჭვულობა ამ ქალაქთან, მეორე ფაქტორი არის ის, რომ მე ზოგადად ვარ კეთილგანწყობილი ადამიანების მიმართ, ჩემთვის არ არსებობს ადამიანების დაყოფა პარტიული ან სხვა რაიმე ნიშნით, აბსოლიტურად არ ვეთანხმები და ჩემთვის სრულიად მიუღებელია ადამიანის დისკრიმინაცია. მე ვამაყობ იმით, რომ ზუგდიდში მყავს ძალიან ბევრი მეგობარი და მათ შორის არიან ახალგაზრდები მე ვამაყობ, რომ ძალიან ბევრი მეგობარი მყავს იძულებით გადაადგილებულ პირებს შორის. მე ვთვლი, რომ ისინი არიან ყველაზე მგრძნობიარე და ყველაზე ტკივილიანი ნაწილი ჩვენი საზოგადოებისა. მათ განსაკუთრებული მოპყრობა და მოფერება სჭირდება. მე ვამაყობ, რომ ბევრ მათგანს წლების განმავლობაში ეგონა, რომ მეც ვიყავი იძულებით გადაადგილებული პირი. მათ უარყოფითი დამოკიდებულება აქვთ არჩევნების მიმარათ და არც აპირებს ბევრი არჩევნებში მისვლას, მაგრამ არ გამოვრიცხავ და შესაძლებელია მქონდეს მათი მხარდაჭერის იმედი.


„ლაივპრესი“: უფრო კონკრეტულად რა პრიორიტეტები გავქთ, რაზე გააკეთებთ აქცენტებს მერად არჩევის შემთხვევაში?


რუსუდან პაჭკორია: ქალაქი არის მოუწესრიგებელი. ჩემთვის პრინციპულად მიუღებელია ყოველი მომდევნო მერის განცხადება იმის თაობაზე, რომ წინა ხელისუფლებას არაფერი გაუკეთებია. თუ ჩვენ მუდმივად იმაზე ვაპელირებთ, რომ სამართლიანობა უნდა აღდგეს, მაშინ სამართლიანობა უნდა აღდგეს. მე პირადად მახსოვს ზუგდიდის ჩაბნელებული ქუჩები. შეღამების შემდეგ გამოსვლა არ შეიძლებოდა სხვადასხვა მიზეზის გამო, იმ მიზეზის გამო რომ შეიძლებოდა ვიღაც თავზე დაგხსმოდა, იმ მიზეზის გამო, რომ შეიძლებოდა ჩაბნელებულ და დამტვრეულ ქუჩაში დაზიანება მიგეღო. ეს ძალიან კარგად გვახსოვს, მაგრამ ძალიან კარგი მონაპოვარი რაც ამ ხელისუფლებას აქვს, ეს გახლავთ თავისუფლება და რომ არა ამჟამინდელი ასეთი მდგომარეობა მე ვერ მივიღებდი გადაწყვეტილებას, გამოვსულიყავი პოლიტიკურ ასპარეზზე.


„ლაივპრესი“: სამართლიანობის აღდგენა მერობის კანდიდატად დასახელებისას სიტყვით გამოსვლის დროსაც ახსენეთ. რას გულისხმობთ ამ სიტყვებში?


რუსუდან პაჭკორია: სამართლიანობის აღდგენა ვთვლი, რომ ძალიან რთული საკითხია, უფრო ადვილია სამართლიანობის დაცვა. სამართლიანობის აღდგენაში შეიძლება კანონიერება, სამართალი და ბევრი სხვა დამხმარე მექანიზმი დაგჭირდეს, ამიტომ უმჯობესია სამართლიანობა დავიცვათ. უსამართლობა ზოგადად ძალიან თრგუნავს ადამიანს. ძალიან აკნინებს მის პატივსა და ღირსებას. ძალიან მძიმეა ლოდი სატარებლად, როცა ადამიანს აქვს უსამართლობის განცდა. ეს უსამართლობის განცდა შეიძლება ნებისმიერ რამეში გამოვლინდეს. თუკი საჯარო დაწესებულების მისაღებში შენ გექცევიან გამორჩეულად, გაყენებენ რიგში. არ გცემენ პატივს, როგორც ადამიანს და ისინი სხედან საჯარო დაწესებულებაში და გონიათ, რომ შენ ხარ ვიღაც რიგითი მოქალაქე, ეს არის უსამართლობა. უსამართლობა იწყება საჯარო დაწესებულებებიდან, საჯარო მოხელეების კაბინეტებიდან, როცა თანამდებობის პირს შეუძლია თანამდებობის ბოროტად გამოყენება. მე ვთვლი, რომ უსამართლობა იწყება საარჩევნო უბნებიდან და საზოგადოებამ უნდა გააცნობიეროს, რომ უსამართლოდ და გაყალბებით მოსულ ხელისუფლებას არ შეიძლება რომ მოვთხოვოთ დაიცვას ან აღადგინოს სამართლიანობა. მე ვფიქრობ, რომ საზოგადოება უნდა გაიზარდოს იქამდე, რომ არ შეუწყოს ხელი უსამართლობას. უსამართლობა კი როგორ გითხარით შეიძლება დაიწყოს სკოლიდან, ნებისმიერი ჩვენგანის ოჯახიდან, ქუჩაში და ა.შ. მე მახსოვს ზუგდიდის ერთ-ერთ საჯარო სკოლაში წლების წინ წინა ფასადიდან არ შეეძლოთ მოსწავლეებს შესვლა, იქედან მხლოდ პედაგოგები შედიოდნენ, მოსწავლეები კი უკანა კარებიდან შედიოდნენ. ეს უსამართლობაა. უსამართლობა ზოგადი ცნებაა მაგრამ ჩვენს კონკრეტულ ქმედებებში ვლინდება. ჩემთვის უმნიშვნელოვანესია, რომ კანონი იყოს დაცული. პრაქტიკულად კანონის რეალიზების დროს შეიძლება აღმოაჩინო ბევრი უზუსტობა, მაგრამ ეს არ ნიშნავს, რომ კანონი უნდა დავარღვიოთ. კანონი უნდა იყოს დაცული. ჩვენ უნდა ვიზრუნოთ იმაზე, რომ კანონში შევიტანოთ ცვლილებები ისე, რომ სამართლიანობა და კანონიერება დაემთხვეს ერთმანეთს. ეს ძალიან რთული პროცესია, მაგრამ მერიის და მერის საქმიანობაში ეს გამოვლინდება იმაში, რომ ადამიანის პატივი და ღირსება არ იქნება შელახული არც რიგითი მოქალაქის, არც საჯარო მოხელის.


„ლაივპრესი“: თქვენ წარდგენისას ასევე თქვით, „პოლიტიკაში მოდიხართ იმისთვის რომ გასცეთ პასუხი, რატომ არ მოდიან ქალები პოლიტიკაში“. რამდენი ქალი მაჟორიტარი დეპუტატობის კანდიდატია თქვენი პარტიის საარჩევნო სიაში?


რუსუდან პაჭკორია: ჩვენს პარტიულ სიაში რამდენი მაჟორიტარი დეპუტატია ნამდვილად არ ვიცი, იმიტომ, რომ საბოლოო ვერსიას არ გავცნობივარ, საოლქო კომისიაში წაიღეს სააღრიცხვო ბარათები და იქ თუ არ იქნება რაიმე ხარვეზები და რაიმე არ იქნება შესატანი საბოლოო სია გვეცოდინება. ქალი კანდიდატების მოსვლა საკრებულოში მე ვფიქრობ, რომ ძალიან მნიშვნელოვანია, იმიტომ რომ საკრებულომ უნდა გააძლიეროს მერია. მერი და მერია არის აღმასრულებელი სტრუქტურა და საკრებულოში ქალების მოსვლას კიდევ სხვა დატვირთვა აქვს, იმიტომ, რომ ეს არის საკანონმდებლო სტრუქტურა, რომელმაც ასევე ბევრი რამ უნდა გააკეთოს იმისათვის, რომ ასევე რეალური თვითმმართველობა ჩამოყალიბდეს. მიღებულ იქნას ისეთი აქტები, რომელიც პასუხობს მოქალაქეთა მოთხოვნებს.

 

სხვათაშორის ძალიან საინტერესო გამოკითხვა ვნახე „ლაივპრესის“ გვერდზე, როგორი უნდა იყოს ზუგდიდის მერი. ყველა პასუხში პირდაპირ თუ ქვეცნობიერად ინტერვიუერები გულისხმობენ მამაკაცს. რამდენიმემ აღნიშნა, რომ ეს უნდა იყოს განათლებული და დისციპლინიანი კაცი, ის უნდა იყოს სტუმართმოყვარე კაცი. არავის არ დაუფიქსირებია და არ უთქვამს, რომ ეს შეიძლება იყოს ქალი. მე მართლაც მაინტერესებს, ეს არჩევნები არ იქნება ტესტი ჩემი პიროვნებისთვის, ეს იქნება ტესტი საზოგადოებისთვის რამდენად არის მისაღები მისთვის ქალი კანდიდატი. რაც შეეხება ქალაქთან დაკავშირებულ პრობლემებს, დამეთანხმებით ალბათ, რომ ქალაქი ნამდვილად არის მოსაწესრუგებელი. უამრავი საკითხია მოუგვარებელი, რომელიც დგას დღის წესრიგში. ეს შეიძლება გავყოთ საკითხებად. მე კონკრეტულ გეგმას ვერ წარმოგიდგენთ, რადგან ჩვენ კონკრეტულ გეგმაზე ვმუშაობთ, მაგრამ ძირითადი მიმართულებები ეს იქნება სოციალურ სფეროსთან დაკავშირებული, ეს იქნება ინფრასტრუქტურასთან დაკავშირებული, ეს იქნება კულტურასთან, სპორტთან დაკავშირებული. მე ვფიქრობ, რომ სოციალური პროგრამებს უნდა გადავხედოთ, ამ წელს არ იქნება ეს შესაძლებელი, რადგან ბიუჯეტი უკვე დამტკიცებულია. ჩვენ ყურადღება უნდა მივაქციოთ ბენეფიციართა ოდენობას, შერჩევის კრიტერიუმს. რაც შეეხება კულტურის სფეროს, ქალაქი არ არის რაღაც შემოფარგლული ტერიტორია, ქალაქს უნდა ჰქონდეს თავისი სახე სული და კულტურა და კულტურის სფეროს მუშაკები ბევრ წილად განაპირობებენ ამას, კულტურულ ასპექტში მე შემიძლია დანამდვილებით გითხრათ, რომ ზუგდიდს შეუძლია გახდეს რეგიონის ცენტრი. აუცილებლად უნდა მივაღწიოთ იმას, რომ მოქალაქეები არ იყვნენ ინდეფერენტული მიმდინარე მოვლენებისადმი, აუცილებად უნდა ჩაერთონ იმ საკითხების გადაწყვეტაში რაც მათ ეხება. თვითმმართველობა არ არის მარტო მერიაში, საკრებულოში თუ გამგეობაში სავარძლებში მოკალათებული ადამიანები. ადგილობრივი თვითმმართველობა არის მოქალაქეები, რომლებიც ზრუნავენ თვითმმართველ ერთეულზე და თავიანთი უფლებების დასაცავად. არასამთავრობო სექტორის როლის აღქმა ძალიან მნიშვნელოვანია საჯარო სექტორისთვის. ჩვენი პრიორიტეტი იქნება, არასამთავრობო სექტორში არსებული უზარმაზარი რესურსი, რომელიც ხშირ შემთხვევაში არაადექვატურად არის აღქმული, იყოს გამოყენებული დანამატად ხელისუფლების, იმისათვის, რომ მოქალაქეთა ინტერესები იყოს დაცული. ძალიან მნიშვნელოვანია ამ პროცესში მედიის ჩართვა და თუნდაც ნეგატიური სტატია უნდა იყოს ჭკუის სასწავლებელი ყველა საჯარო მოხელისთვის. ქალაქს როგორც გითხარით უნდა ქონდეს ქალაქის სახე. მე ვიცი, რომ მას ყოველდღე გვიან და ასუფთავებენ, მაგრამ დღის ნებისმიერ დროსა და მონაკვეთში ქალაქში არის ნაგავი, ამ შემთხვევაში დამოკიდებულება ნახეთ როგორია. საჯარო სამსახური ფიქრობს, რომ მე ამას ვაკეთებ, მე ამისთვის მაქვს ტექნიკა, ამისთვის ადამიანებს ვუხდი ხელფასს, ეს ადამიანები დღისით, წვიმაში, ქარში გვიან ამ ქუჩებს, მაგრამ ნაგავი, რომ მაინც არსებობს ხელისუფლება ფიქრობს მე ჩემსას ვაკეთებ და რა ვქნა, მე ვფირობ, რომ ასეთია მიდგომა. ვფიქრობ კომლექსური მიდგომაა საჭირო, არასამთავრობოს როლი უნდა გავაძლიეროთ. ბავშვობიდან უნდა დავიიწყოთ სწავლება, რომ რაც გაკეთებულია იმას გაუფრთხილდნენ. მე მინდა, რომ ზუგდიდი განსაკუთრებულად სუფთა ქალაქი იყოს. მე განსაკუთრებულად მტკივნეულად განვიცდი, როცა უცხოელი სტუმრის გვერდით გადავადგილდები ჩემს ქალაქში. მე მინდა, რომ ყველა სკოლოის წინ იყოს უსაფრთხო გადასასვლელი, იმიტომ, რომ ტრაგიკული შემთხვევების მოწმე ვართ ამ ქალაქში და ბოლოსდაბოლოს მინიმალური თანხებია საჭირო, რომ ეს მოწესრიგდეს. ძალიან მნიშვნელოვანია ასევე. ზუგდიდში მე მგონი ერთი მიწისქვეშა გადასასვლელი არსებობს და ამ ხნის მანძილზე რაც ის არსებობს, მუდმივად მოუწესრიგებელია მიუხედავად იმ ფაქტორებისა რაც აძნელებს მის მოწესრიგებას, მე ვთვლი, რომ არასერიოზულია ქალაქში მიწისქვეშა გადასასვლელი იყოს ასეთ მდგომარეობაში. შუქის გამორთვის შემთხვევაში იქ ადამიანისთვის გადაადგილება საშიშია.


„ლაივპრესი“: როგორ შეიძლება მოქალაქის ჩართულობა გაიზარდოს ადგილობრივი თვითმმართველობის საკითხების მოგვარებაში?


რუსუდან პაჭკორია: თვითონ კანონის ნებისმიერ მუხლს თუ ავიღებთ და მივუდგებით იმდაგვარად, რომ ვიკითხოთ, როგორ ჩავრთო ამ მუხლის რეალიზებაში მოქალაქე, აუცილებლად ვიპოვით ამაზე პასუხს. ძალიან მნიშვნელოვანია ყველა ქალაქის გამგებელი და თემის გუბერნატორი შეიკრიბოს გუბერნატორთან და წარუდგინოს მას თვითმმართველი ქალაქის თუ თემის განვითარების გეგმა, ასეთი გეგმების შედგენა არ უნდა ხდებოდეს კაბინეტებში, ეს უნდა ხდებოდეს მოქალაქეთა მონაწილეობით, მოქალაქეთა საჭიროებების გათვალისწინებით,


„ლაივპრესი“: ამომრჩევლების თემას დავუბრუნდეთ. თქვენ გაიხსენეთ „ლაივპრესის“ გამოკითხვა. როგორ ფიქრობთ, ის ფაქტი, რომ ქალი ვერ წარმოუდგენიათ მერად, რამდენად იქნება თქვენთვის ხელისშემშლელი ფაქტი?


რუსუდან პაჭკორია: მე ვერ გამოვრიცხავ, რომ ეს იყოს ჩემთვის ხელისშემშლელი ფაქტორი, მაგრამ მე ვთვლი, რომ ეს იქნება საინტერესო ჩემთვის. როცა ჩვენ ვსაუბრობთ ქალთა ჩართულობის გაზრდაზე პოლიტიკურ საკითხებში, ძალიან ბევრი ოპონენტი გგვყავს და ისინი ამბობენ, რომ გენდერული თანასწორობა და თანასწორობა არის ძალით მოგონილი, ეს თემები რეალურად არ არსებობს საქართველოში, ქალებს ხელს არავინ არ უშლის, თუკი მე დავრწმუნდები და დადგება შედეგი, რომ ქალქები სხვადასხვა მიზეზების გამო ვერ მოდიან პოლიტიკაშიო, მაშინ მე ვბრუნდები სამოქალაქო სექტორში და ჩემს მეგობრებს ვინც ქალთა პოლიტიკაში გააქტიურებას ხელს ვუწყობდით, ვეტყვი, რომ ჩვენი საქმიანობა არის გასაძლიერებელი უფრო მეტი ძალისმევით, იმიტომ რომ საზოგადოება ჯერ კიდევ არ არის მომზადებული მიიღოს ქალი გადაწყვეტილების მიმღების თანამდებობაზე.


„ლაივპრესი“: ასეთ ამომრჩევლებს რას ეტყოდით, რატომ უნდა იყვნენ ქალები პოლიტიკაში?


რუსუდან პაჭკორია: ქალი აუცილებლად უნდა იყოს პოლიტიკაში იმიტომ, რომ მას აქვს ისეთივე უფლებები რაც მამაკაცს. ქალს შესაძლებელია ქონდეს ოდნავ განსხვავებული, ოდნავ რბილი უფრო მშვიდობის მოყვარე შეხედულებები, უამრავის საკითხის გადაწყვეტის დროს. იყოს უფრო კომპრომისული და მიიღოს უფრო მომგებიანი გადაწყვეტილება საზოგადოებისთვის. მისი გადაწყვეტილებები შესაძლოა იყოს ნაკლებად აგრესიული. მე მინდა ავღნიშნო რომ  ზუგდიდი უნდა იყოს ყველა ჩვენთაგანის სახლი და ამ სახლს აუცილებლად სჭირდება დიასახლისი, რომელსაც აქვს მზრუნველი ხელი. შესაძლოა ეს ფუნქცია მამაკაცამაც ძალიან კარგად შეასრულოს მაგრამ მე ვფიქრობ, რომ მე უკეთ ვამჩნევ ყველა წვრილმანს ყველა დეტალს, როგორც ქალი და მითუმეტეს, როგორც არასამთავრობო სექტორში მომუშავე ქალბატონი, არასამთავრობო სექტორში კი ყველაფერი როგორც გამადიდებელ შუშაში ისე კარგად ჩანს, რომელიც აქვს საზოგადოებას, რომელიც აქვს საჯარო უწყებას.


„ლაივპრესი“: ვის მიიჩნევთ კონკურენტად?


რუსუდან პაჭკორია: მე ვთვლი, რომ კონკურენტები, რომლებიც მონაწილეობენ არჩევნებში, არიან ღირსეული კანდიდატები, წინააღმდეგ შემთხვევაში მათ არ წამოაყენებდნენ კანდიდატებად. მათაც ჰყავთ რა თქმა უნდა მხარდამჭერები და დაე გაიმარჯვოს ღირსეულმა. იმ ადამიანმა ვისაც ზუგდიდელ ამომრჩეველთა მეტი წილი, მხოლოდ სამართლიანი არჩევნების პირობებში მისცემს ხმას.

Print E-mail
Twitter
სხვა მასალები
ამერიკის შეერთებული შტატების ელჩი, კელი დეგნანი
სამეგრელო-ზემო სვანეთის რეგიონს სტუმრობდა,
12:31 / 20.07.2022
ამერიკის შეერთებული შტატების ელჩი, კელი დეგნანი სამეგრელო-ზემო სვანეთის რეგიონს სტუმრობდა,
სამეგრელოს ის მუნიციპალიტეტები, სადაც ადგილობრივი
თვითმმართველობის არჩევნების შემდეგ, საკრებულოებში
21:06 / 05.02.2022
სამეგრელოს ის მუნიციპალიტეტები, სადაც ადგილობრივი თვითმმართველობის არჩევნების შემდეგ, საკრებულოებში
გრიპის მოახლოებული სეზონი, ვაქცინაციის საგანგაშოდ
დაბალი მაჩვენებელი და მეხუთე
15:10 / 14.10.2021
გრიპის მოახლოებული სეზონი, ვაქცინაციის საგანგაშოდ დაბალი მაჩვენებელი და მეხუთე
აფხაზეთში, დანარჩენი საქართველოს მსგავსად, რთული
ეპიდემიოლოგიური ვითარებაა.
09:21 / 03.09.2021
აფხაზეთში, დანარჩენი საქართველოს მსგავსად, რთული ეპიდემიოლოგიური ვითარებაა.
კორონავირუსი

საბჭოთა რეპრესიები

ვიდეო
პატარა “სანტები” თანატოლების დასახმარებლად [ვიდეო]
საღამოს ექვსი საათია. ბავშვები საკლასო ოთახში შეკრებილან და საახალწლო სათამაშოებს ამზადებენ. ზოგი თექას
ისევ მშივრები, ისევ ქუჩაში - მოქალაქეთა აქტივიზმით გადარჩენილი სიცოცხლეები [ვიდეო]
მიუსაფარ ძაღლებს ზუგდიდის ქუჩებში თითქმის ყოველ ნაბიჯზე ნახავთ. პარკებსა და სკვერებში, კვების ობიექტებთან,
პირველი მეგრულენოვანი ანიმაცია - ხობელი ანიმატორის სტუდია დიდი გეგმებით [ვიდეო]
ძუკუ დელფინია და კოღონა გაბისკირია, პირველი მეგრულენოვანი ანიმაციური სერიალის პერსონაჟები არიან. მათზე
სკოლის ნათხოვარ შენობაში დაწყებული ჩხოროწყუელი მოსწავლეების ბრძოლა უკეთესი გარემოსთვის [ვიდეო]
ჩვენ არ გვაქვს სხვა პლანეტა, - ამბობენ ჩხოროწყუელი მოსწავლეები და გარემოს გადასარჩენად ერთიანდებიან.
მდინარე ჯუმისგან მიტაცებული მიწები და სამანქანე გზა - დარჩელელები აქციებით იმუქრებიან [ვიდეო]
ზუგდიდის სოფელ დარჩელში, კიროვის უბანში, ძლიერი წვიმების დროს მდინარე ჯუმი დიდდება, კალაპოტიდან
ფოტო
სკოლაში პირბადით - სწავლა საკლასო ოთახებში განახლდა [ფოტო]
დღეს, 4 ოქტომბერს სასწავლო პროცესი, რომელიც პანდემიის
ვაქცინაცია ავტობუსში [ფოტო]
ზუგდიდის მუნიციპალიტეტის სოფლებსა და ქალაქში
„გვიხარია, რომ მოქალაქეები აქტიურობენ“ - ვაქცინაცია ზუგდიდში [ფოტო]
მოქალაქეთა საყოველთაო ვაქცინაცია ზუგდიდში გრძელდება.
"აქტიურობა მაღალია" - ზუგდიდში "ფაიზერით" ვაქცინაცია დაიწყო [ფოტო]
კორონავირუსის საწინააღმდეგო ამერიკული წარმოების "ფაიზერით"
3 თვე კოვიდტესტირების რეჟიმში - ფოტორეპორტაჟი ენგურის ხიდიდან
აფხაზეთ-სამეგრელოს საოკუპაციო ხაზთან, ენგურის ხიდზე,
მზარეულის მაგიდა
მწყრის ხარჩო მეფურად [ვიდეო]
ხარჩოს მოსამზადებლად დაგვჭირდება:
ხარკალია ლებია
ხარკალია, ძველი მეგრული კერძია,
მარწყვის პანაკოტა
უგემრიელესი დესერტი
ხაჭოს პასკა
ინგრედიენტები
                                     ლეჭკერე
ხულიშ ლეჭკერე - ეს არის ძველი
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.