„ქართული ოცნების“ ფოთის, კუნძულის ერთი უბნის მაჟორიტარი დეპუტატობის კანდიდატი, ალექსანდრე თოფურია დაიბადა 1972 წლის 10 დეკემბერს ფოთში. დაამთავრა ქუთაისის ნ. მუსხელიშვილის სახელობის პოლიტექნიკური ინსტიტუტი. პროფესიით ინჟინერ-ეკონომისტია. 2010 წელს ფოთის საკრებულოში „ნაციონალური მოძრაობის“ პარტიული სიით შევიდა, მაგრამ 2012 წლის პარლამენტის არჩევნების შემდეგ პარტიის რიგები დატოვა და მხარდაჭერა „ქართულ ოცნებას“ გამოუცხადა. ამჟამად საკრებულოში ფრაქცია „ქართულ ოცნება - დემოკრატიული საქართველოს“ წევრია. მანამდე, „ნაციონალური მოძრაობის“ მმართველობის პერიოდში იყო საკრებულოს საფინანსო-სარევიზიო საკითხთა კომისიის თავმჯდომარე. 2008-2010 წლებში იყო საკრებულოს თავმჯდომარის მოადგილე. 2005-2006 წლებში - ფოთის მერის თანაშემწე. 2001-2005 წლებში - შპს „ფლაგმანის“ დირექტორი.

„ლაივპრესი“: „ქართულმა ოცნებამ“ ფოთის კუნძულის (1) უბნის მაჟორიტარობის კანდიდატად წარგადგინათ, თუმცა „ქართულ ოცნებაში“ გაწევრიანებამდე თქვენ წლების განმავლობაში „ნაციონალური მოძრაობის“ გუნდის წევრი იყავით და მისი პარტიული სიით შეხვედით საკრებულოში. 2012 წლის საპარლამენტო არჩევნების შემდგომ კი, დატოვეთ „ნაციონალური მოძრაობის“ რიგები და მხარდაჭერა გამოუცხადეთ „ქართულ ოცნებას“, რა გახდა მიზეზი და თქვენი აზრით რა პრინციპით შეგარჩიათ „ქართულმა ოცნებამ“ მაჟორიტარობის კანდიდატად?

ალექსანდრე თოფურია: საკრებულოში, ფრაქცია „ქართული ოცნების“ თავმჯდომარის მოადგილე გახლდით, შესაბამისად პარტიამ გადაწყვიტა, კუნძული ერთის მაჟორიტარ კანდიდატად დავეყენებინე. გეთანხმებით, რომ 2010 წლის არჩევნების დროს, „ნაციონალური მოძრაობის“ საარჩევნო სიით შევედი საკრებულოში, მაგრამ მე არანაირი სურვილი არ გამაჩნდა მათი სიით ან მაჟორიტარად ვყოფილიყავი საკრებულოში. ჩემზე განხორციელდა ზეწოლა, „ნაციონალების“ სიაში ყოფნას მაიძულებდნენ. სიების რეგისტრაციის ბოლო დღეები იყო, თბილისიდან დამირეკეს, ჩამიყვანეს და იქ მოხდა ის, რომ მე საკრებულოს სიაში უნდა ვყოფილიყავი.

„ლაივპრესი“: კონკრეტულად რა სახის ზეწოლა იყო და ვისგან, ან რატომ არ საუბრობდით ამ ზეწოლებზე „ნაციონალური მოძრაობაში“ ყოფნის დროს?

ალიკა თოფურია: არჩევნებამდე 4 დღით ადრე, როდესაც მე საკრებულოში,  კონკრეტულ საკითხზე წინააღმდეგ წავედი, ისიც შემომითვალეს, რომ ასეთი რამის განმეორების შემთხვევაში ორბიტიდან გავქრებოდი. შესაბამისად მე, ასეთ პარტიასთან ვერ ვითანამშრომლებდი. 4 წლის განმავლობაში იყო არარეალური დაპირებები, თითქოს ფოთი პატარა დუბაი იქნებოდა, მეგაპოლისებზე იყო ლაპარაკი, თითქოს ქარხნები აშენდებოდა, ახალი მოსული მთავრობის პირობებში დამაჯერებელი იყო, მაგრამ როდესაც ვნახე 4 წლის განმავლობაში არაფერი კეთდებოდა, არანაირი სურვილი არ მქონდა ისევ მათ გვერდით ვყოფილიყავი, მაგრამ...

„ლაივპრესი“: იქნებ დააკონკრეტოთ, რა სახის მუქარა იყო, თქვენს ოჯახის წევრებს აქვთ ბიზნესი, იყო ეს ბიზნესის კუთხით მიმართული მუქარები?

ალიკა თოფურია: კონკრეტიზაციისგან თავს შევიკავებ, რა იყო, როგორ იყო, ფაქტი იყო, რომ თბილისიდან დამირეკეს და ისეთნაირად მელაპარაკეს, რომ სანამ ჩვენ ჩამოვლთ, აქეთ ჩამოდი.

„ლაივპრესი“: რა იყო ის საკითხი, რაზეც თქვენ საკრებულოში წინააღმდეგ წახვედით და რასაც როგორც თავად ამბობთ შემდგომში მუქარები მოყვა, კონკრეტულ საკითხზე წინააღმდეგ წასვლა რამდენად წარმოადგენდა რეალურად საკითხის არმიღების საფრთხეს?

ალექსანდრე თოფურია: კონკრეტულად რა საკითხი იყო ვერ გეტყვით, ფაქტი ფაქტად რჩება, არსებობს ამ საკითხის დოკუმენტაციები, სადაც დაფიქსირებულია, რომ მე წინააღმდეგ წავედი. ზოგადად მითითება იყო ასეთი, რომ ყველაფერზე თანხმობა განგვეცხადა. მე პრინციპული ადამიანი ვარ და როცა სხვანაირად ვფიქრობდი, ვერ დავეთანხმებოდი.

„ლაივპრესი“: დღეს, როცა „ქართული ოცნება“ სამართლიანობის აღდგენაზე საუბრობს, რატომ არ ასახელებთ კონკრეტული ადამაინების სახელს ვინც თქვენზე ზეწოლას ახორციელებდა, ხომ არ იწვევს ეს  კითხვისნიშნებს, რომ რაღაც მოგონილ ამბავთან გავქვს საქმე, რადგან მეორეს მხრივ საზოგადოება ხედავდა, რომ წლების განმავლობაში ღია მხარდაჭერას უცხადებდით „ნაციონალურ მოძრაობას“ და თქვენი ოჯახი ფინანსურ დახმარებასაც უწევდა.

ალექსანდრე თოფურია: სხვებისგან განსხვავებით მე სულ სხვა პიროვნება ვარ. ვთვლი, რომ არაა საჭირო ეს სამართლებრივი გზით მივმართო.

„ლაივპრესი“: ისე თუ თვლით, რომ იმ დროს, როცა „ნაციონალური მოძრაობაში“ ყოფნას და კონკრეტული საქმეების კეთებას გაიძულებდნენ თქვენს წინააღმდეგ კანონი დაირღვა?

ალექსანდრე თოფურია: კანონთან მიმართებაში ადრეც ასე იყო, პიროვნებას უნდა ქონოდა იმის კეთების, გამოხატვის უფლება რისი სურვილიც ქონდა.

„ლაივპრესი“: მოსახლეობასთან შეხვედრისას აკრიტიკებთ ყოფილ ხელისუფლებას და იმ გუნდს, რომლის წევრიც იყავით, თქვენ იყავით ორი მოწვევის საკრებულოს წევრი, „ნაციონალური მოძრაობის“ შეუსრულებელ დაპირებეზე, კონკრეტულ საქმეებზე გუნდის ან საკუთარ პასუხისმგებლობას თუ იღებთ?

ალექსანდრე თოფურია: მაგათთან გუნდში არ ვთვლიდი თავს. კლიპები გადიოდა, სადაც სოკოებივით ამოდიოდა ათასი სახლები, შენობები, ცათამბჯენები გაკეთდა ეს, შესრულდა?! თუნდაც ის, პრეზიდენტი ზღვის აკვატორიაში, რომ შემოვიდა და ქარხნების მშენებლობაზე ისაუბრა, ვითომ ეკონომიკური ზონა შექმნეს, კომპანიებს ლიცენზიები გადასცეს და ხალხის დასაქმებას გვპირდებოდნენ, სად არის ეს ჩანს სადმე?! ყველაფერ ამას, რომ ვუყურებდი ვამჩნევდი, რომ ფაქტიურად არაფერი არ სრულდებოდა

„ლაივპრესი“: დიახ, ამას გეკითხებით, წლების განმავლობაში ფოთთან მიმართებაში, შეუსრულებელი დაპირებებზე თუ იღებთ პასუხისმგებლობას? იმიტომ, რომ გულში რას ფიქრობდით არ ვიცით, ფაქტია, მხოლოდ ის, რომ წლების განმავლობაში ამ ყველაფერზე პროტესტი, კრიტიკა ღიად არასდროს დაგიფიქსირებიათ, ღიად მხოლოდ მხარდაჭერას უცახდებდით და წინასაარჩევნოდ ფინანსურადაც ეხმარებოდით „ნაციონალურ მოძრაობას“.

ალექსანდრე თოფურია: მაშინ იყო ასეთი თემა, ვერ ვამბობდით, უამრავია იყო ასეთ მდგომარეობაში. მე ისიც მითხრეს, რომ არჩევნების შემდეგ ცუდად დავამთვრებდი საქმეს, ფაქტიურად დამიჭერდნენ, რადგან არჩევნებში არ მოვეხმარე და არ დავდექი მათ გვერდით. ციხის ცნობილი კადრების შემდეგ, არამგონია მათი საქმე ნორმალური ქართველისთვის მოსაწონი ყოფილიყო.

„ლაივპრესი“: წლების განმავლობაში საკრებულოს საბიუჯეტო-სარევიზიო კომისიას ხელმძღვანელობდით და ბიუჯეტთან მიმართებაში მუდმივად დადებით დასკვნებს დებდით. ამის კეთებასაც გაიძულებდნენ? წლების განმავლობაში ხარვეზს, ბიუჯეტის არამიზნობრივ ხარჯვას ადგილი არ ქონია თუ რითი იყო განპირობებული ყველა შემთხვევაში დადებითი დასკვნები?  რატომ და რის საფუძველზე საუბრობთ დღეს ბიუჯეტის არამიზნობრივ ხარჯვაზე?

ალექსანდრე თოფურია: ძალიან კომპეტენტური ვარ მე ამ საკითხში. ბიუჯეტიდან გამოყოფილი თანხის ხარჯვის კანონიერებას კომისიის მოწვეული სპეციალისტები სწავლობდნენ, მათი აქტებიდან გამომდინარე იწერებოდა ჩემი მოხსენება, განკარგულების პროექტი, თან პარალელურად მე, დამოუკიდებელ აუდიტს ვიწვევდი. როდესაც აუდიტის და მმოწვეული სპეციალისტების დასკვნა იქნებოდა დადებითი შესაბამისად ჩემი დასკვნა და განკარგულების პროექტიც იგივე იქნებოდა.

„ლაივპრესი“: ფოთში, მოსახლეობა ერთ-ერთი ყველაზე პრობლემურ თემად ავტოფარეხების დემონტაჟს ასახელებს, რომელიც ყოფილი მერის, ვახტანგ ლემონჯავას ინიციატივით განხორციელდა, საკრებულოში საკითხის შესწავლასა და კომპენსაციის გაცემაზე შესული იყო მოსახლეობის პეტიცია, თუმცა საკრებულოს აღნიშნულზე იურიდიული გადაწყვეტილება არ მიუღია. ამის პარალელურად კუნძულის უბნის მოსახლეობის ნაწილი საუბრობდა, რომ თქვენ თხოვდით მათ საკუთრების დემონტაჟს, იღებთ პასუხისმგებლობას ამ ყველაფერზე და თქვენი პოზიცია როგორი იყო?

ალექსანდრე თოფურია: ამ საკითხზე ძალიან სერიოზული კონფლიქტი მქონდა ყოფილ მერთან, ვახტანგ ლემონჯავასთან. იყო მოთხოვნა საკრებულოდან, რომ მეც მიმეღო მონაწილეობა და გაწმენდილიყო ეზოები ფარეხებიდან. ჩემი მოანწილეობა იყო ის, რომ ეზოების კეთილმოწყობის პროექტი მივუტანე მოსახლეობას და ვუთხარი, ეს არის თქვენი გადასაწყვეტი და როგორც თქვენ ჩათვლით საჭიროდ ისე მოიქეცით. რაც შეეხება საკუთრების დანგრევას მე ამას არ მივესალმებოდი, რადგან ეს იყო კანონის დარღვევა. თუ რომელიმე მოქალაქე ამბობს,რომ მე ვთხოვდი დანგრევას ეს არის „ნაციონალური მოძრაობის“ დაკვეთა, ჩემთვის პირადად არავის მოუმართავს და არავის უთქვამს, ჩვენ გვაიძულებენო.

„ლაივპრესი“: თქვენ პირადად თუ გქონდათ ავტოფარეხი და თუ აიღეთ, გთხოვათ თუ არა პირადად ქალაქის მერმა მოგეხდინათ მისი დემონტაჟი?

ალექსანდრე თოფურია: პირადად ჩემთან ზარი განახორციელა „ნაციონალური მოძრაობის“ კუნძული ერთის ამჟამინდელმა მაჟორიტარმა კანდიდატმა, გიორგი შამუგიამ.

„ლაივპრესი“: ამას იმიტომ ამბობთ, რომ ის თქვენი კონკურენტია? რადგან „ნაციონალური მოძრაობის“ რიგებიდან გიორგი შამუგია იყო ერთადერთი ვინც საკრებულოს სხდომაზე საკითხის შესწავლა და დემონტაჟის შემდგომ განხორციელება მოითხოვა.

ალექსანდრე თოფურია: არა, სიტყვა-სიტყვით გეტყვით, რაც მითხრა შამუგიამ. მითხრა, რომ წინააღმდეგი ხომ არ ვიყავი, რომ ავტოფარეხი პირველად მე, რომ  ამეღო, ეს იყო ზეწოლა. მე მხვდება მოსახლეობა და მეუბნება, რომ შამუგია ჩვენს ეზოში ვერ შემოვა, რადგან „გარაჟებს“ გვინგრევდაო.

„ლაივპრესი“: ახლა, რას პირდებით მოსახლეობას, რატომ უნდა დაგიჭირონ მხარი?

ალექსანდრე თოფურია: ჩემს თანაქალაქელებთან ერთად ვიზრუნებ ჩემს ქალაქისთვის.

„ლაივპრესი“: კონკრეტულად? გაქვთ თუ არა სამოქმედო გეგმა, პროგრამა?

ალექსანდრე თოფურია: ძალიან ბევრი პრობლემებია დაგროვილი. 2014 წლის ბიუჯეტში არ იქნა გათვალისწინებული ასინიზაციის მაქანა, რომელიც ფოთში კანალიზაციის პრობლემის მოგვარებისთვის აუცილებელია. მე ვფიქრობ, რომ „ნაციონალურმა მოძრაობამ“ ეს შეგნებულად გააკეთა, რომ პრობლემა პრობლემაზე დამატებულიყო და მოსახლეობას დღევანდელ მთავრობაზე გული აცრუებოდა. დღეს მთავრობა მოწადინებულია ქალაქზე მოსახლეობის აზრის გათვალისწინებით ვიზრუნოთ.

„ლაივპრესი“: „ნაციონალური მოძრაობის“ ხელისუფლებაში და საკრებულოში უმრავლესობაში ყოფნის დროს თუ დააყენეთ ეს საკითხი, რატომ არ მოხდა აღნიშნული პრობლემის გადაჭრა, ხელისშემშლელი გარემოება რა იყო იმ დროს? ან ახლა ადგილობრივ ხელსიუფლებაში ხომ „ქართული ოცნებაა“, როგორ შეუშალა ხელი ნაციონალურმა მოძრაობამ“?

ალექსანდრე თოფურია: რა ხდება იცით? ეს მაქანები მუშაობდა, გააკეთებდნენ, ისევ ფუჭდებოდა. დღეს ბოლო-ბოლო გამოვიდა მწყობრიდან და ქალაქი ახლის ყიდვას საჭიროებს.

„ლაივპრესი“: სხვა დაპირება რა არის?

ალექსანდრე თოფურია: ორი წელია ვითხოვ ნიკოლაძის სანაპიროდან გორგასლის ხიდამდე ხეივნის მოწყობას, კორპუსები დანაბომბარს გავს. მოქმედმა საკრებულოს თავმჯდომარემ მითხრა, რომ აზერბაიჯანულმა მხარემ გამოთქვა სურვილი სამუშაოების დაფინანსების თუ ამ ხეივანს 9 აპრილის ნაცვლად, ილჰამ ალიევის სახელობის ხეივანს დაარქმევდნენ. ველოდებოდით ინვესტორებს, შესაძლებელი იყო სხვა ქუჩას დარქმეოდა ალიევის სახელი, მაგრამ არ შედგა ეს პროექტი. ძალიან პრინციპული ვარ, ძალიან საქმის გამკეთებელი პიროვნება  ვარ.

„ლაივპრესი“: გარდა პიროვნული თვისებებისა, რა არის კონკრეტული საკითხი რის გაკეთებასაც პირდებით მოსახლეობას, საკრებულოში ხელახლა მოხვედრის შემთხვევაში რა საკითხს დააყენებთ პირველად?

ალექსანდრე თოფურია: ყველაფრის გაკეთებას ვპირდები. ინიციატივა მოსახლეობისგან უნდა წამოვიდეს, რასაც ბიუჯეტი გაწვდება ყველაფერს შევასრულებ.

„ლაივპრესი“: როგორ ფიქრობთ, დღეისთვის რა არის ფოთის მთავარი პრობლემა?

ალექსანდრე თოფურია: მთვარი პრობლემა არის, რომ სანაპირო მიაქვს ზღვას და მე-7 კილომეტრზე სავალალო მდგომარეობაში მყოფი ხიდი არის ქალაქის უდიდესი პრობლემა.

„ლაივპრესი“: თქვენ როგორ აპირებთ ამ პრობლემის მოგვარებას და რამდენად გაწვდება ადგილობრივი ბიუჯეტი?

ალექსანდრე თოფურია: ეს არის ძალიან ძვირადღირებული პროექტი და მთავრობასთან ერთად უნდა განვიხილოთ, რა კუთხით და როგორ შეიძლება მისი მოგვარება

„ლაივპრესი“: როგორ შეაფასებდით საარჩევნო გარემოს ქვეყანაში და ფოთში, რამდენად თანაბარ პირობებში უწევთ კონკურენტებს კამპანიის წარმართვა?

ალექსანდრე თოფურია: თქვენ თვითონ პირადად ვერ ამჩნევთ იმას, რომ 2012 წლის შემდეგ ყველა არჩევნები როგორ მშვიდ ვითარებაში ჩატარდა. საკუთარი სურვილით მიდიოდნენ არჩევნებზე და  აფიქსირებდნენ თავიანთ აზრს. ძალით და ხმაურით აღარ მიყავდათ არჩევნებზე. ხალხმა იგრძნო შვება და რასაც უნდა იმ პოზიციას აფიქსირებენ

„ლაივპრესი“: ანუ წინა წლებში, როცა თქვენ ღებულობდით არჩევნებში მონაწილეობას იზიარებთ იმას, რომ მოსახლეობაზე ზეწოლა ხორციელდებოდა და ამ გზით მოდიოდნენ ხელისუფლებაში?

ალექსანდრე თოფურია: კი, ვადასტურებ იქედან გამომდინარე, რომ ჩემი მეზობლები ამბობდნენ თუ როგორ იყო და უკვე ხდება განხილვის საგანი, თუმცა გითხარით, რომ 2010 წლის შემდეგ არ მიმიღია არჩევნებში მონაწილეობა.

„ლაივპრესი“: თუმცა ბოლოს 2010 წლის არჩევნებით, „ნაციონალური მოძრაობის“ სიით მოხვედით საკრებულოში, როცა ოპოზიცია საუბრობდა არჩევნების გაყალბებაზე, ზოწოლაზე, რასაც თქვენ დღეს ადასტურებთ, ანუ თქვენ გაყალბებული არჩევნებით ხართ მოსული?

ალექსანდრე თოფურია: ნუ ახლა როდესაც სიაში ჩამსვევს და აიღეს ხმების რაოდენობა შევედი საკრებულოში, თუმცა ერთ თვეში განცხადებასაც ვწერდი, მაგრამ ისიც მთხოვეს, რომ არ წავსულიყავი. ჩემი რესურსის გამოყენების გამო არ უნდოდათ ჩემი გაშვება. ჩემს უკან ნათესაობა, მეგობრები და უამრავი ხალხი იყო, რომელიც დიდ პატივს მცემდა და ჩემი რესურსით ხმების რაოდენობის  გაზრდა უნდოდათ.

„ლაივპრესი“: ელექტორატის რა ნაწილის იმედი გაქვთ და რა შანსები აქვთ თქვენს კონკურენტებს?

ალექსანდრე თოფურია: არანაირი შანსები არა აქვთ ჩემს კონკურენტებს. ჩემი ელექტორატია  დაწყებული პატარიდან დამთავრებული მოხუცებამდე. მათ მხარდაჭერას ვგრძნობ მოსახლეობასთან შეხვედრისას. მე მხარს დამიჭერს 18 წლის ახალგაზრდები, რადგან მთავრობამ იმდენი გააკეთა სტუდენტებისთვის.

„ლაივპრესი“: ფიქრობთ თუ არა, რომ ხელს შეგიშლით თქვენი ყოფილი „ნაციონალობა“?

ალექსანდრე თოფურია: არამგონია, რადგან მოსახლეობამ ეს ყველაფერი კარგად იცის.