თუ ჩავთვლით, რომ შემთხვევების მატება ივნისის ბოლოს დაიწყო მოსალოდნელია, რომ აგვისტოს ბოლოს შემთხვევები შემცირდეს, - განაცხადა ბავშვთა ცენტრალური საავადმყოფოს სამედიცინო დირექტორმა, ივანე ჩხაიძემ პრესკონფერენციაზე.

მისი თქმით, ქვეყანაში შესაძლოა მიმდინარე და მომავალ კვირას, კორონავირუსის შემთხვევების პიკი აღინიშნოს.

"შემთხვევების მატების ტემპი შენელებულია. თუ გადავხედავთ ევროპის ქვეყნების სტატისტიკას, ეს ტალღა, პირობითად შეგვიძლია შევაფასოთ, როგორც "მეშვიდე ტალღა", რომელიც ორი თვის განმავლობაში გრძელდება.. ხვალინდელი მონაცემი ძალიან მნიშვნელოვანია. არ ვფიქრობ, რომ მკვეთრი მატება იქნება", - განმარტა ივანე ჩხაიძემ.

მანვე აღნიშნა, რომ შემთხვევების მატების დინამიკას თუ შევადარებთ აპრილის და მაისის მონაცემს, ინფიცირებულთა რიცხვი გაზრდილია. მაგრამ, ერთი კვირის განმავლობაში 12 ათასი შემთხვევა არ არის ის ციფრი, რომელიც შეიძლება საგანგაშო იყოს.

ივანე ჩხაიძის განცხადებით, იმისთვის, რომ აგვისტო და სექტემბერი მოსახლეობისთვის შედარებით მშვიდი იყოს, ბუსტერ დოზით აცრა მნიშვნელოვანია.