ცენტრალური ხელისუფლების დაპირებიდან ექვსი წლის შემდეგ, დღესაც უცნობია, როდის დაიწყება ზუგდიდში, დადიანების ისტორიულ-არქიტექტურული მუზეუმის, ეკატერინეს სასახლედ წოდებული შენობის რესტავრაცია.


2014 წლის 2 აპრილს, თვითმმართველობის არჩევნებამდე ორი თვით ადრე, მაშინდელმა პრემიერ-მინისტრმა ირაკლი ღარიბაშვილმა დადიანების მუზეუმის ეზოში ამომრჩეველთან შეხვედრაზე თქვა, რომ დაგეგმილი აქვთ ეკატერინეს სასახლის და ბოტანიკური ბაღის სრული რესტავრაცია. თუმცა მაშინ თარიღი არ დაუზუსტებია.

ერთი წლის შემდეგ, 2015 წლის ივნისში, ირაკლი ღარიბაშვილი ამერიკის შეერთებული შტატების მაშინდელ ელჩთან, რიჩარდ ნორლანდთან ერთად ზუგდიდს ეწვია და მუზეუმის ეზოში ჟურნალისტებს უთხრა, რომ დასრულდა ეკატერინეს სასახლის რეკონსტრუქციის პროექტის მომზადება, რაშიც ფინანსურად საელჩო დაეხმარა. მან ინტერვიუში ასევე აღნიშნა, რომ უნდათ წელსვე დაიწყონ სასახლის სარემონტო სამუშაოები.

2015 წლის შემდეგ იყო მხოლოდ განცხადებები. მაგალითად, 2019 წლის მარტში, კულტურული მემკვიდრეობის დაცვის ეროვნული სააგენტოს ხელმძღვანელმა ნიკოლოზ ანთიძემ "ლაივპრესს" უთხრა, რომ სასახლის აღდგენისთვის თანხას ფონდი "ქართუ" გამოყოფდა და სამუშაოებს აპრილში დაიწყებდნენ. ამ განცხადებიდან მალევე, ცნობილი გახდა, რომ "ქართუმ" უარი თქვა მუზეუმის რემონტზე. მიზეზი არც მაშინ უთქვამთ.

მოგვიანებით ნიკოლოზ ანთიძემ "ლაივპრესს" ტელეფონით განუცხადა, რომ გაარკვია და სასახლის რეკონსტრუქციას მუნიციპალური ფონდი განახორციელებს.

ამის შემდეგ "ლაივპრესმა" მუნიციპალური განვითარების ფონდს, 2020 წლის 10 თებერვალს გაუგზავნა წერილი, სადაც ვითხოვდით სასახლის სარემონტო სამუშაოების დაწყების და ფინანსური უზრუნველყოფის შესახებ ინფორმაციას.

ოფიციალურ პასუხში ნათქვამია მხოლოდ ის, რომ მუნიციპალური განვითარების ფონდი აზიის განვითარების ბანკის დაფინანსებით, იწყებენ ტურისტულად მიმზიდველი ქალაქების ურბანული განახლების პროგრამას, რომლის ერთ-ერთ კომპონენტად განიხილება ზუგდიდში ეკატერინე ჭავჭავაძის სასახლის რეკონსტრუქცია.

"ამ ეტაპზე მიმდინარეობს ქალაქების ურბანული განახლების პროგრამის მოსამზადებელი სამუშაოები, რომლის დასრულების შემდეგ გახდება ცნობილი ეკატერინე ჭავჭავაძის სასახლის რეკონსტრუქციის პროექტის შესაძლო ვადები და ღირებულება", - ნათქვამია ფონდის წერილში.

კულტურული მემკვიდრეობის დაცვის ეროვნული სააგენტოს დირექტორი ადასტურებს, რომ მუნიციპალური განვითარების ფონდი დონორებთან მოლაპარაკებებს აწარმოებს. მან "ლაივპრესს" უთხრა, რომ სასახლის რეკონსტრუქციის პროექტის განხორციელებას, რომელიც ჯერ კიდევ 2015 წელს მომზადდა, სამ მილიონ ლარზე მეტი დასჭირდება.

სასახლე აღდგენას საჭიროებს. აქ, ერთ-ერთ დარბაზში შარშან გაზაფხულზე ჭერის ნაწილი ჩამოინგრა და დადიანების ჭურჭლის ნაწილი დაიმსხვრა, ნაწილი კი დაზიანდა.