„ტიბუ“ სამეგრელოში ძველი, ტრადიციული წვნიანია. მას ზუგდიდელი დიასახლისი ეთერ ფაჟავა ბებიის რეცეპტით ამზადებს.

„ამ წვნიანს ბებია მართა გაციების დროს სვამდა და შვილიშვილებსაც ასმევდა. წამალი არასდროს დაულევია და 100 წლამდე იცოცხლა“, - ამბობს დიასახლისი, რომელიც მალე 80 წლის გახდება.

ის ბებია მართას წვნიანს ზამთარში ხშირად ამზადებს და მეგობრებს ეპატიჟება.

„მიირთვით ტიბუ და წამალი აღარ დაგჭირდებათ“, - ამბობს დიასახლისი.

„ტიბუ“ მეგრული სიტყვაა და თბილს ნიშნავს.

წვნიანის მოსამზადებლად საჭიროა: 4 სუფრის კოვზი მჭადის ფქვილი, 1 თავი ნიორი, 1 სუფრის კოვზი ქონდარი, 1 ლიტრი წყალი, პილპილი და მარილი გემოვნებით.