ზუგდიდის რაიონული სასამართლო აფხაზეთ-სამეგრელოს საოკუპაციო საზღვართან მოკლულის გიგა ოთხოზორიას საქმეს განიხილავს. დღევანდელ სხდომაზე დისტანციური წესით, „სკაიპის“ საშუალებით დაიკითხა სახელმწიფო ექსპერტიზის ოთხი ექსპერტი და ერთი თვითმხილველი.

მკვლელობაში ეჭვმიტანილ რაშიდ კანჯი ოღლის, რომელიც ძებნაშია, სახაზინო ადვოკატი, მთვარისა ბიგვავა იცავს.

მან „ლაივპრესს“ განუცხადა, რომ საქმესთან დაკავშირებით მტკიცებულებები ძირითადად ბრალდების მხარეს აქვს. სწორედ პროკურატურის მიერ წარმოდგენილი 40-მდე მოწმეა უკვე დაკითხული, მათ შორის თვითმხილველებიც.

სხდომას ესწრებოდა გიგა ოთხოზორიას ცოლი და დედა. ოჯახი სასამართლოს განაჩენს უახლოეს პროცესებზე ელოდება. მანამდე კი კომენტარის გაკეთება არ სურთ.

გიგა ოთხოზორიას საქმის განხილვა ზუგდიდის რაიონულმა სასამართლომ ოქტომბერში დაიწყო. მოსამართლეა შოთა ბიჭია. ბრალდების მხარეს პროკურორი ლევან ფიფია წარმოადგენს.

რაშიდ კანჯი ოღლის მიმართ საქმე აღძრულია საქართველოს სისხლის სამართლის კოდექსის ორი მუხლით: 108-ე მუხლით, რაც განზრახ მკვლელობას გულისხმობს და 236 მუხლის მეორე და მესამე ნაწილით, რაც ცეცხლსასროლი იარაღის მართლსაწინააღმდეგო ტარებას, დამზადება, გადაზიდვა, გადაგზავნა ან გასაღებას გულისხმობს.

გალის რაიონიდან დევნილი გიგა ოთხოზორია 19 მაისს აფხაზეთ-სამეგრელოს ადმინისტრაციულ საზღვართან, თბილისის მიერ კონტროლირებად ტერიტორიაზე, ზუგდიდის მუნიციპალიტეტის სოფელ ხურჩაში რამდენიმე გასროლით მოკლეს.

ბრალდების მხარის მტკიცებით, მას ე.წ. მესაზღვრემ რაშიდ კანჯი ოღლიმ ესროლა, რომელზეც საქართველოს მასშტაბით ძებნაა გამოცხადებული.

გარდაცვლილის ახლობლების და ოჯახის წევრთა ინფორმაციით, გასროლა დე ფაქტო რესპუბლიკის მესაზღვრეს და გარდაცვლილს შორის შელაპარაკებას მოჰყვა. გიგა ოთხოზორია გალში პროდუქტების შეტანას ითხოვდა, რაზეც ვერ შეთანხმდნენ.

სოხუმი იუწყება, რომ გიგა ოთხოზორიას ე.წ. საზღვრის გადმოსალახად საჭირო დოკუმენტები არ ჰქონდა და კონფლიქტიც ამან გამოიწვია.

ოთხოზორიას მკვლელობა გახდა ოკუპირებულ ქალაქ გალში ხუთმხრივი შეხვედრების აღდგენის მიზეზი. გაეროს ლტოლვილთა უმაღლესი კომისარიატის ოფისში ოთხწლიანი წყვეტის შემდეგ, გიგა ოთხოზორიას დაკრძალვიდან მეორე დღეს, 27 მაისს შეიკრიბნენ საქართველოს ცენტრალური ხელისუფლების, აფხაზეთის დე ფაქტო მთავრობის, რუსეთის, ევროკავშირის სადამკვირვებლო მისიის და გაეროს წარმომადგენლები.

მას შემდეგ ადმინისტრაციულ საზღვართან მომხდარი მკვლელობა შეხვედრების მთავარ თემად რჩება. 11 ნოემბერს გამართულ ბოლო, რიგით მეექვსე შეხვედრაზე სუს-ის ანალიტიკური დეპარტამენტის უფროსის მოადგილე, კახაბერ ქემოკლიძემ განაცხადა, რომ მიმდინარეობს აქტიური საუბრები, რათა ბრალდებული რაშიდ კანჯი-ოღლი საქართველოს ცენტრალურ ხელისუფლებას გადმოსცენ და ამ კუთხით ცენტრალური ხელისუფლების პოზიცია არის მყარი.

მანამდე კი შერეულ შეხვედრაზე თბილისმა დე ფაქტო სამხედრო პროკურატურის წარმომადგენლებს გიგა ოთხოზორიას მკვლელობასთან დაკავშირებით მასალები გადასცა, თუმცა მოგვიანებით გაირკვა, რომ დე ფაქტო ხელისუფლება მასალების ხელახლა გადაგზავნას ითხოვს.

საქართველოს ხელისუფლება გიგა ოთხოზორიას მკვლელობის საკითხს არ განიხილავს პოლიტიკურ ჭრილში და იმედს იტოვებს, რომ ოთხოზორიას მკვლელი აუცილებლად წარსდეგბა ქართული მართლმსაჯულების წინაშე. ამასთან, გიგა ოთხოზორიას მკვლელობის საქმე, ჟენევის მოლაპარაკებების ერთ-ერთი საკითხია.

გალის რაიონიდან დევნილი გიგა ოთხოზორია 7-სულიან ოჯახთან ერთად ზუგდიდში, ნაქირავებ ბინაში ცხოვრობდა. მისი დაკრძალვიდან ორ თვეში, მთავრობის გადაწყვეტილებით, დევნილთა და განსახლების სამინისტრომ ოჯახს ზუგდიდის ცენტრალურ უბანში კერძო სახლი გადასცა.