ზუგდიდის რაიონულ სასამართლოში დღეს, 23 ოქტომბერს, მსახიობ გიორგი ფოჩხუას მკვლელობის საქმეზე სასამართლო სხდომა გაიმართა.
გიორგი ფოჩხუას მკვლელობაში ეჭვმიტანილი ბექა ცობეხიას მიმართ სისხლის სამართლის საქმე განზრახ მკვლელობის მუხლით (საქართველოს სსკ-ის 109-ე მუხლის მესამე ნაწილის „გ“ ქვეპუნქტი) არის აღძრული, რაც 16-დან 20 წლამდე თავისუფლების აღკვეთას, ან უვადო პატიმრობას ითვალისწინებს. ცობეხიას მეგობარ ნიკოლოზ ბაძაღუას დანაშაულის შეუტყობინებლობაში ედება ბრალი, რაც ითვალისწინებს ჯარიმას, ან თავისუფლების აღკვეთას 2-დან 4 წლამდე.
სხდომის დაწყებამდე ბრალდებულის ადვოკატმა ბაჩუკ ყურაშვილმა სასამართლოს სხდომის დახურვის შუამდგომლობით მიმართა, რაც მოსამართლის ნატრული აკობიას გადაწყვეტილებით დაკმაყოფილდა.
გიორგი ფოჩხუას წარმომადგენელმა ადვოკატმა ლონდა შამუგიამ, რომელიც დახურულ სხდომას ესწრებოდა, ჟურნალისტებს განუცხადა, რომ სასამართლოს ჰქონდა უფლება სხდომა დახურულად გამოეცხადებინა და ნაწილობრივ დახურა კიდეც.
ნიკოლოზ ბაძაღუას ადვოკატის მთვარისა ბიგვავას განცხადებით, ბაძაღუასთან საპროცესო შეთანხმების გაფორმების თაობაზე, მან ზუგდიდის რაიონულ პროკურატურას უკვე მიმართა. „მიმდინარეობს მოლაპარაკების პროცესი, საბოლოო გადაწყვეტილება ჯერ მიღებული არ არის. ჩევნ ვითხოვთ, რომ ნიკოლოზ ბაძაღუას შეეფარდოს პირობითი სასჯელი“, – განაცხადა ადვოკატმა.
26 წლის მსახიობის და რეჟისორის გიორგი ფოჩხუას ცხედარი 14 ივლისს ანაკლიის ზღვამ სასტუმრო „ანაკლიის“ ტერიტორიაზე გამორიყა. ცხედარს აღენიშნებოდა მრავლობითი სახის დაზიანებები სახისა და ყელის არეში. ასევე არ აღმოაჩნდა კუთვნილი ნივთები: ფოტოაპარატი, ძვირფასეულობა და მობილური ტელეფონი. სამართალდამცავებმა გიორგი ფოჩხუას კუთვნილი ფოტოაპარატი განსასჯელისგან მას შემდეგ ამოიღეს, როდესაც ის პოლიციას ჩაბარდა.
გიორგი ფოჩხუას მკვლელობის საქმეზე მომდევნო სასამართლო სხდომა 20 ნოემბერს ჩაინიშნა.
ამავე თემაზე
გიორგი ფოჩხუას მკვლელობის საქმეზე სასამართლო სხდომა გაიმართა
მსახიობ გიორგი ფოჩხუას მკვლელობის საქმეზე სასამართლო მოსმენები დაიწყო
გიორგი ფოჩხუას მკვლელობაში ეჭვმიტანილი პოლიციას ჩაბარდა
სამართალდამცავები გიორგი ფოჩხუას მკვლელობის ვერსიაზე მუშაობენ
შსს: გიორგი ფოჩხუას მკვლელობაში ეჭვმიტანილმა დანაშაული აღიარა