ზუგდიდის რაიონულ სასამრთლოში დღეს, 26 ოქტომბერს შპს „ანაკლია პორტის“ საქმეზე სასამართლო პროცესი განახლდა. საქართველოს ეკონომიკისა და მდგრადი განვითარების სამინისტრო შპს–სგან ხელშეკრულებით ნაკისრი ვალდებულების შეუსრულებლობისთვის 100 მილიონი აშშ დოლარის ოდენობის ჯარიმის დაკისრებას მოითხოვს.
დღევანდელ სასამართლო სხდომას, თავად შპს „ანაკლია პორტის“ დირექტორთა საბჭოს თავჯდომარე და დამფუძნებელი თეიმურაზ ქარჩავა ესწრებოდა.
ანაკლიის საკურორტო ზონაში სატრანსპორტო კვანძის მშენებლობის ნებართვა შპს „ანაკლია პორტმა“ პრეზიდენტ მიხეილ სააკაშვილის 2009 წლის 20 ოქტომბრის № 732 განკარგულების საფუძველზე მიიღო.
ხელშეკრულების თანახმად, მშენებლობა 20013 წელს უნდა დასრულებულიყო და მასში 5–6 მილიარდი აშშ დოლარის ინვესტიცია ჩადებულიყო.
მშენებლობა საზღვაო ნავსადგურის, სარკინიგზო და საავტომობილო გზების, სარკინიგზო და საავტომობილო გადაზიდვების ინფრასტრუქტურის, ენერგეტიკული და საინჟინრო მომსახურების მშენებლობას მოიცავდა.
ქარჩავა ამბობს, რომ ანაკლიის პორტის მშენებლობას ხელი ყოფილმა მთავრობამ შეუშალა. მისი თქმით, იქ, სადაც ანაკლიის პორტი უნდა აშენებულიყო, ყოფილმა მთავრობამ პატრიოტთა ბანაკი და ლაზიკის იუსტიციის სახლი ააშენა. ამის დამადასტურებელი დოკუმენტები ქარჩავამ სასამართლოს და ბრალდების მხარეს დღეს გადასცა. ახალი გარემოებებიდან გამომდინარე, მოსამართლე ირაკლი აბშილავამ ეკონომიკის სამინისტროს წარმომადგენლის შუამდგომლობა დააკმაყოფილა და სასამართლო სხდომა გადადო.
თეიმურაზ ქარჩავა აცხადებს, რომ შპს „ანაკლია პორტის“ საკუთრებაში უკანონოდ შეჭრის შესახებ ინფორმირებულები იყვნენ პრეზიდენტი მიხეილ საკაშვილი და ყოფილი მინისტრები, ზურაბ ადეიშვილი, ნიკა გულაური და ვერა ქობალია.
ამავე თემაზე
თემურ ქარჩავას კომპანიისგან ეკონომიკის სამინისტრო 100 მლნ დოლარის გადახდას მოითხოვს