იარაღის უკანონო შეძენა-შენახვა-ტარების და ნარკოტიკული საშუალებების შეძენა-შენახვისთვის დაკავებული გურამ ლაშქარავას საქმე განიხილეს დღეს, 13 მარტს ზუგდიდის რაიონულ სასამართლოში, სადაც ბრალდების მხარის მიერ წარმოდგენილი ორი მოწმე - დეტექტივ გამომძიებელი ჯონი ბაგათელია და ექსპერტი მადონა ჭელიძე დაკითხეს.
ამ უკანასკნელის თქმით, ლაშქარავას დაკავებისას ამოღებული ნივთმტკიცების ქიმიური ექსპერტიზის შედეგად გაირკვა, რომ ერთჯერადი მოხმარების შპრიცში 0,8 მილიგრამი მოყვითალო შეფერილობის სითხე, კუსტარულად დამზადებული ნარკოტიკული საშუალება აღმოჩნდა.
ექსპერტის განცხადებით, მისთვის უცნობია, რა მინარევების სინთეზით მიიღეს ნარკოტიკი, თუმცა „ფაქტია, რომ ის დამოუკიდებლად დამზადდა“.
დეტექტივ გამომძიებელ ჯონი ბაგათელიამ აღნიშნა, რომ ფოთში, ჭავჭავაძის ქუჩაზე დაკავებული გურამ ლაშქარავა სამხარეო მთავარი სამმართველოდან ნარკოლოგიურ კაბინეტში გადაიყვანეს, სადაც მას ნარკოტიკული საშუალებით თრობა დაუდგინდა.
მისივე თქმით, ბრალდებულის განცხადება მკლავზე ინექციის გაკეთების შესახებ აბსურდია.
ჯონი ბაგათელიამ სასამართლოს განუცხადა, რომ ფოთში სხვა დავალებისთვის ზუგდიდიდან წარგზავნილმა ჯგუფმა ოპერატიული ინფორმაციის მიღებიდან ვიდრე ლაშქარავას დაკავებამდე, უკვე იცოდა დაკითხული მოწმეების შესახებ, რომლებიც ამბობდნენ, რომ ამ უკანასკნელმა დანაშაული ნამდვილად ჩაიდინა.
დეტექტივ გამომძიებლის თქმით, ბრალდებულს იმთავითვე განუმარტეს, რომ მისი დაკავება ცეცხლსასროლი იარაღის მართლსაწინააღმდეგო შეძენა-შენახვა-ტარებას უკავშირდებოდა, ნარკოტიკული საშუალების შესახებ კი მხოლოდ ჩხრეკისას შეიტყვეს.
დღევანდელ სასამართლო პროცესზე ორი მოწმის დაკითხვით დასრულდა ბრალდების მხარის მოწმეების წარმოდგენა.
მომდევნო სხდომა 8 აპრილისთვის ჩაინიშნა, სადაც წერილობით და ნივთიერ მტკიცებულებებს განიხილავენ.
გურამ ლაშქარავა სამართალდამცავებმა მიმდინარე წლის 20 სექტემბერს ფოთში დააკავეს. მას ბრალი 260-ე მუხლის მეორე „ა“ ქვეპუნქტით და 236-ე მუხლის პირველი და მეორე ნაწილით გათვალისწინებული დანაშუალებებისთვის ედება, რაც იარაღის უკანონო შეძენა-შენახვა-ტარებას და ნარკოტიკული საშუალებების შეძენა-შენახვას გულისხმობს.
ოჯახმა სამართლიანი და მიუკერძოებელი გამოძიების მოთხოვნით საპროტესო აქციაც რამდენჯერმე გამართა. ბრალდებულის მეუღლე აცხადებს, რომ ფოთის პოლიციის თანამშრომლები გურამ ლაშქარავას 19 წლიანი პატიმრობის მოხდის დღიდან უთვალთვალებენ. ეს მას შემდეგ, როცა დაკავებული მათ მიერ შემოთავაზებულ თანამშრომლობას არ დათანხმდა. წინააღმდეგ შემთხვევაში მას ქვეყანა უნდა დაეტოვებინა, ან კვლავ ციხეში დააბრუნებდნენ.
ამავე თემაზე
ზუგდიდის რაიონულ სასამართლოში გურამ ლაშქარავას მორიგი სასამართლო პროცესი გაიმართა
გურამ ლაშქარავას სასამართლო პროცესზე ორი მოწმე დაიკითხა
ზუგდიდში გურამ ლაშქარავას მორიგი სასამართლო პროცესი გაიმართა
ბრალდებულის ადვოკატი: ჩემი დაცვის ქვეშ მყოფი წარსული დანაშაულისთვის არ უნდა გასამართლდეს [Video]
ბრალდებულის ცოლი პოლიციას იარაღის და ნარკოტიკის ჩადებაში ადანაშაულებს