იდეა ახალგაზრდა ცოლ-ქმარს, გიორგი ჯაფარიძეს და თათია თეთრაშვილს ეკუთვნის. ახლადშექმნილ ოჯახს ბიზნესის წამოწყებაში გიორგის მშობლები ეხმარებიან. მითუმეტეს, რომ მათ უკვე აქვთ ამ სფეროში კარგი გამოცდილება - მესტიის ცენტრში წლებია საოჯახო სასტუმროს ფლობენ.
ფოტოზე: გიორგი ჯაფარიძე და თათია თეთრაშვილი
31 წლის თათია თეთრაშვილი თბილისის მკვიდრია, თუმცა მას შემდეგ, რაც სვანს გაჰყვა ცოლად, მესტიაში გადმობარგდა და აქ თავის დამკვიდრებას ცდილობს. საზოგადოებასთან ურთიერთობა და ტურისტული ბიზნესი მისთვისაც არ არის უცხო. მანამდე თბილისში ჰქონდა ჰოსტელი და ფიქრობს, რომ ეს გამოცდილება ახალ წამოწყებაშიც გამოადგება.
„თავიდან ეს იდეა ბიზნესგეგმასავით არ იყო. გვქონდა ეს ნაკვეთი და ჩვენთვის გვინდოდა რაღაც ხის სახლის აშენება და იქ ცხოვრება. ასე ძაან დიდი ხანი ვფიქრობდით და მერე უკვე ვაქციეთ ეს ბიზნეს იდეად, იმიტომ, რომ იქ კომუნიკაციები მიყვანილი არ იყო და ეს ყველაფერი იმდენად ძვირი ჯდება, რომ მხოლოდ ერთი რაღაცის აშენება უფრო რთული იყო. ამიტომაც გადავწვიტეთ, მოდი ბარემ ბევრი რაღაც გავაკეთოთო“, - უყვება „ლაივპრესს“ თათია თეთრაშვილი.
ფოტოზე: მშენებარე კოტეჯები
ოჯახს ახალი ბიზნესის დაწყების სტიმული სვანეთში ტურიზმის განვითარებამ მისცა. თათია იხსენებს ხუთი წლის წინანდელ მესტიას, როცა პირველად ჩამოვიდა დასასვენებლად. ყვება, რომ მეგობრებთან ერთად მაშინ კვების ობიექტის პოვნაც კი გაუჭირდა, რადგან სულ 2-3 რესტორანი თუ მუშაობდა. თათია ამბობს, რომ მას შემდეგ ბევრი რამე შეიცვალა - აშენდა საოჯახო სასტუმროები და დაიხვეწა მომხმარებლებთან ურთერთობის სერვისი. ახალგაზრდა ქალი გვიხსნის, რომ ახლა ტურისტები ძირითადად მეგობრების რეკომენდაციით ჩამოდიან:
„აი მესტიაში საოჯახო სასტუროში ყოველ წელს ტურისტები ემატება. მოჰყავთ მეგობრები და ოჯახის წევრები“.
თათიას ამიტომაც იმედი აქვს, რომ მათი ბიზნეს იდეა გაამართლებს. მითუმეტეს, რომ წყვილი ბაზარზე სიახლით შემოდის.
ადგილი სადაც "ბუდე" შენდება
ნაკვეთი, სადაც "ბუდე" შენდება, მესტიის ცენტრიდან თითქმის ერთი
კილომეტრით არის დაშორებული. მდებაროებს თეთნულდ-ჰაწვალის
გზაგასაყარზე. 4000 კვ.მ-ის მიწის ნაკვეთი მთლიანად ტყეშია ჩაფლული.
მისი განსაკუთრებულობა, სიმწვანესა და უშბის ხედთან ერთად, მარტვიად
ხელმისაწვდომობაა.
"ათი კოტეჯიდან ოთხი, ოთხ ადამიანზეა გათვლილი. შიგნით ანტრესოლით
იქნება, ანუ ორი ზევით მოთავსდება და ორი დაბლა. დანარჩენი ექვსი
კოტეჯი არის ორ ადამიანზე გათვლილი, მაგრამ პლიუს ორი შესაძლებლობით.
ანუ, ბავშვები ან მეგობრები თუ ეყოლებათ, ერთ ადამიანს შეიძლება
დაემატოს ერთი ან ორი", - გვიხსნის "ბუდის" დიასახლისი.
გარდა კოტეჯებისა, გაშლილ მინდორზე განთავსდება ღია ტიპის რესტორანი.
როგორც თათია თეთრაშვილი განმარტავს, დამსვენებლების პარალელურად
ობიექტით სარგებლობა შეეძლება ნებისმიერ მსურველს.
კოტეჯების მშენებლობა კერძო კომპანიამ 15 აპრილს უნდა დაასრულოს.
შემდეგ დაიწყება ეზოს მოწყობის სამუშაოები. ოჯახი ფიქრობს, რომ
პირველი სტუმრების მიღებას ივნისიდნ შეძლებენ.
ადგილი სადაც "ბუდე" შენდება
„ვგეგმავთ, რომ ნელ-ნელა უნიკალური სერვისი დავნერგოთ. ეს არ იქნება უბრალოდ მოვიდა, მივიღე ადამიანი და დავაძინე. გვინდა რაღაც განსაკუთრებული გარემო შევქმნათ. „ბუდეც“ სწორედ ამიტომ დავარქვით, რომ მყუდროდ იგრძნოს ადამიანმა თავი. გვექნება ისეთი დეტალები, რაზეც მოთხოვნაა. აი, რასაც ჩვენ ვისურვებდით ჩვენთვის, როცა სადმე ვისვენებთ“, - ამბობს თათია.
„ბუდეში“ ერთი ღამის გატარება ორი პირისთვის სავარაუდოდ 150 ლარი ეღირება. სვანეთი წლის ნებისმიერ დროს იპყრობს ტურისტების ყურადღებას, შესაბამისად "ბუდეც" უკვე ზაფხულიდან მზად იქნება დამსვენებლების მისაღებად.