ვერცხლის სამკაული მეგრული ოდა-სახლის დამახასიათებელი ელემენტებით დიზაინერ რუსუდან შანავას ახალი მიმართულებაა.

რუსუდანი ამბობს, რომ ხელსაქმე ბავშვობიდან უყვარდა, რამდენიმე წლის წინ კი ვერცხლის ნაკეთობებზე მუშაობით დაინტერესდა და შეისწავლა.

"ინტერნეტი ძალიან კარგი საშუალებაა, ახალი უნარების შეასწავლად, დავიწყე ვიდეოების ყურება, მომეწონა, მერე სამსახურში ვიკითხე, ვინმეს ხომ არ ჰყავდა ახლობელი იუველირი და აღმოჩნდა, რომ თანამშრომელს ჰყავდა დეიდაშვილი, რომელსაც შემდეგ მივებარე და მასთან ერთად დავამზადე პირველი საყურე".

რუსუდანს წალენჯიხაში, სახლში საწარმო აქვს. მისი ნაკეთობები "გრეხილის" ბრენდით არის ცნობილი.

მან კულტურული მემკვიდრეობის თემას თანამედროვე მომხმარებლის მოთხოვნები მოარგო და გამორჩეული სამკაული შექმნა.

"მახსოვს, როცა ამ მეგრულ ოდაში მივედი და ფოტო გადავუღე, მეპატრონეს გაუკვირდა, ორი საუკუნის სახლია შვილო და რად გინდა ამის ფოტოებიო, შემდეგ ეს ორნამენტები გამოვიყენე სამკაულში. ოდის ელემენტების გამოყენების იდეა ხალხური რეწვის ასოციაციამ შემომთავაზა, მათ სამეგრელოში ხალხური რეწვის ოსტატებთან ერთად სხვადასხვა პროექტები გააკეთეს, გავიარეთ ტრენინგები და იქ წარმოიშვა იდეა, რომ გამეკეთებინა ჭვირული სამკაული, სადაც გამოყენებული იქნებოდა ძველი ქართული ორნამენტები".

ნაკეთობებს შეკვეთით ამზადებს, თუმცა სახელოსნოში ოდის ორნამენტებით შექმნილი საყურეები და სამაჯური აქვს, რომელიც ერთ-ერთი გამოფენისთვის დაამზადა. ორნამენტების გარდა, სამკაულში იყენებს ასევე ფრესკის მხატვრობას.

"გამოვიყენე ასევე მარტვილის ღვთისმშობლის ტაძრის კედლის მხატვრობაში ქტიტორის სამოსზე მოცემული ორნამენტიც. წითელი ფრინველები, რომლებიც თექაშია შესრულებული. ეს არის ეკოხელნაკეთთან ერთად გაკეთებული პროექტი სადაც ვერცხლის ნაწილში იყო "გრეხილი", ხოლო "ეკომ" დაამუშავა თექა".

დიზაინერი უახლოეს მომავალში ტყავის ჩანთების დამზადებას გეგმავს, სადაც ასევე გამოყენებული იქნება მეტალის ორნამენტები კულტურული მემკვიდრეობის თემაზე.